.jpg)
ជនសង្ស័យក្រោយពេលសមត្ថកិច្ចចាប់ខ្លួនបាន ។ អាវុធហត្ថ
ព្រះសីហនុៈ សមត្ថកិច្ចកងរាជអាវុធហត្ថខេត្តព្រះសីហនុកាលពីម្សិលមិញបានកសាងសំណុំរឿងបញ្ជូនបុរសជាជនសង្ស័យម្នាក់ទៅសាលាដំបូងខេត្ត បន្ទាប់ពីចាប់ខ្លួនករណីឆក់លុយពីបុរសជាតិខ្មែរម្នាក់នៅក្នុងកាស៊ីណូមួយក្នុងសង្កាត់លេខ ៤ ក្រុង-ខេត្តព្រះសីហនុ ប្រព្រឹត្តកាលពីព្រឹកថ្ងៃទី ៤ ខែកុម្ភៈ។
លោកវរសេនីយ៍ឯក កែវ សុផល មេបញ្ជាការរងកងរាជអាវុធហត្ថខេត្តព្រះសីហនុទទួលផែនស្រាវជ្រាវប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យករណីឆក់លុយនោះឈ្មោះ ជួន ផាន់នី អាយុ ២០ ឆ្នាំ។ ប៉ុន្តែលោកមិនបានបញ្ជាក់ពីឈ្មោះជនរងគ្រោះទេ។
លោកបានប្រាប់ថា៖ «ជនសង្ស័យម្នាក់នេះ ខាងសមត្ថកិច្ចខ្ញុំបញ្ចប់ការស៊ើបសួររួចហើយ ហើយត្រូវបញ្ជូនជននេះទៅតុលាការខេត្តនៅថ្ងៃនេះ (ថ្ងៃទី ៥ កុម្ភៈ) ដើម្បីឲ្យច្បាប់ចាត់ការបន្តទៀត»។
លោកប្រាប់ថា កាស៊ីណូដែលជនសង្ស័យប្រព្រឹត្តបទល្មើសនោះឈ្មោះកាន់ដាវ ស្ថិតនៅក្នុងសង្កាត់លេខ ៤ ក្រុង-ខេត្តព្រះសីហនុ។
លោកថា ជនសង្ស័យបានឆ្លើយថា មុនកើតហេតុវេលាម៉ោង ១០ ព្រឹក ថ្ងៃទី ៤ កុម្ភៈ រូបគេបានចូលទៅលេងល្បែងក្នុងកាស៊ីណូនោះ។
ខណៈកំពុងលេងស្រាប់តែឃើញជនរងគ្រោះចូលទៅលេងល្បែងនៅទីនោះដែរ។ពេលនោះជនសង្ស័យបានឆក់យកកាបូបលុយរបស់ជនរងគ្រោះ ហើយបានរត់ចេញក្រៅអគារកាស៊ីណូនោះបម្រុងគេចខ្លួន។ប៉ុន្តែដោយមានការស្រែកឆោឡោពីជនរងគ្រោះទើបក្រុមសន្តិសុខកាស៊ីណូរត់ដេញតាមហើយគាប់ជួនពេលនោះបានជួបកម្លាំងមន្ត្រីអាវុធហត្ថជិះរថយន្តល្បាតក៏នាំគ្នាដេញតាមចាប់បានជនសង្ស័យតែម្តង។
លោកប្រាប់ថា៖ «ពេលនោះជនសង្ស័យបានព្យាយាមរត់គេចខ្លួនដែរតែដោយមានការសហការជាមួយកងសន្តិសុខនៅកាស៊ីណូនោះរួមគ្នាជាមួយសមត្ថកិច្ចរបស់អាវុធហត្ថយើងក៏តាមចាប់បាន»។
លោកបានបញ្ជាក់ដែរថាក្រោយពីចាប់ខ្លួនសមត្ថកិច្ចដកហូតបានលុយ ២ ម៉ឺនដុល្លារ ដែលជារបស់ជនរងគ្រោះ៕
