The Phnom Penh Post Search

Search form




Logo of Phnom Penh Post newspaper Phnom Penh Post - យុវជន​ត្រូវ​ជំរុញ​ឲ្យ​ចូល​រួម​អភិរក្ស​សត្វ​ព្រៃ ក្នុង​ទិវា​សត្វ​ព្រៃ​ពិភពលោក




យុវជន​ត្រូវ​ជំរុញ​ឲ្យ​ចូល​រួម​អភិរក្ស​សត្វ​ព្រៃ ក្នុង​ទិវា​សត្វ​ព្រៃ​ពិភពលោក

សកម្ម​ភាព​បង្ក្រាប​បទ​ល្មើស​សត្វ​ព្រៃ របស់​ក្រុម​បង្ក្រាប​ចល័ត​កន្លង​មក។
សកម្ម​ភាព​បង្ក្រាប​បទ​ល្មើស​សត្វ​ព្រៃ របស់​ក្រុម​បង្ក្រាប​ចល័ត​កន្លង​មក។ រូបថត Wildlife Alliance

យុវជន​ត្រូវ​ជំរុញ​ឲ្យ​ចូល​រួម​អភិរក្ស​សត្វ​ព្រៃ ក្នុង​ទិវា​សត្វ​ព្រៃ​ពិភពលោក

ភ្នំពេញៈ យុវជន​ត្រូវ​បាន​ជំរុញ​ឲ្យ​ចូលរួម​អភិរក្ស​សត្វ​ព្រៃ នៅ​ក្នុង​ទិវា​សត្វ​ព្រៃ​ពិភពលោក ដែល​កំពុង​តែ​បន្ត​ធ្លាក់​ចុះ​ហើយ​មាន​សត្វ​មួយ​ចំនួន​ទៀត​បាន​ផុត​ពូជ​ពី​ប្រទេស​កម្ពុជា។

អង្គការ USAID និង​វិទ្យាស្ថាន ENRICH រួម​នឹង​អ្នក​បរិស្ថាន​បាន​ប្រារព្ធ​ទិវា​សត្វ​ព្រៃ​ពិភពលោក ៣ មីនា និង​ពិព័រណ៍ រូបភាព​លើក​ដំបូង​នៅ​កម្ពុជា​កាលពី​ថ្ងៃ​អង្គារ នៅ​សាកល​វិទ្យាល័យ​ភូមិន្ទ​ភ្នំពេញ ហើយ​បាន​ជំរុញ​និង​លើក​ទឹក​ចិត្ត​ឲ្យ​យុវជន​ធ្វើ​សម្មភាព​កាន់​តែ​ខ្លាំង​ក្នុង​ការ​ចូល​រួម​អភិរក្ស​សត្វ​ព្រៃ​កម្ពុជា។ នេះ​ជា​ទិវា​សត្វ​ព្រៃ​កម្ពុជា​លើក ទី១ ដែល​ធ្វើ​ឡើង​ក្រោម​ប្រធានបទ «ការ​ចូល​រួម របស់​យុវជន​ក្នុង​ការ​អភិរក្ស​សត្វ​ព្រៃ​នៅ​កម្ពុជា» ដោយ​មាន​ការ​ចូល​រួម​ពី​យុវជន​ជា​និស្សិត​ប្រមាណ​ជា ១០០ នាក់។

រូបថត​ចំនួន ២៣ ផ្ទាំង ស្តីពី​ការ​លក់​ដូរ ការ​បរ​បាញ់ ការ​កាប់​រាន​ជម្រក​សត្វ​ព្រៃ​ខុស​ច្បាប់ និង​ជីវចម្រុះ ត្រូវ​បាន​ដាក់​តាំង​បង្ហាញ រួម​នឹង​សារ «ការ​ជួញ​ដូរ​សត្វ​ព្រៃ​ខុស​ច្បាប់​ត្រូវ​តែ​បញ្ឈប់​ចាប់​ពី​ពេល​នេះ​តទៅ»។ រូប​សត្វ​ព្រៃ​ខ្លះ​ត្រូវ​គេ​កាត់​ដៃ​ជើង​ធ្វើ​ឱសថ​បុរាណ។

លោក Curtis Hundley ប្រធាន​គម្រោង​គាំទ្រ​ព្រៃឈើ និង​ជីវចម្រុះ​របស់​អង្គការ USAID បាន​ថ្លែង​លើក​ទឹក​ចិត្ត​ឲ្យ​យុវជន​ចូល​រួម​សង្គ្រោះ​សត្វ​ព្រៃ​ដែល​នៅ​សេស​សល់ ហើយ​ថា វា​គ្មាន​ការ​សប្បាយ​នោះ​ទេ ដោយ​សារ​តែ​មាន​ការ​បំផ្លិច​បំផ្លាញ​ព្រៃឈើ​និង​សត្វ​ព្រៃ​នៅ​កម្ពុជា ជាច្រើន។

លោក​បាន​បញ្ជាក់​ថា៖ «បើ​អត់ [មាន​ការ​ចូល​រួម] ទេ សត្វ​ព្រៃ​ដែល​នៅ​សេស​សល់ វា​ច្បាស់​ជា​នឹង​បាត់បង់​អស់​មិន​ខាន​ឡើយ ពីព្រោះ​មនុស្ស​ត្រូវ​ការ​ឈើ ហើយ​បើ​គ្មាន​ព្រៃ​ទេ សត្វ​ព្រៃ​ក៏​គ្មាន​នៅ​ទៀត​ដែរ»។

លោក ហេង ភក្តី ស្ថាបនិក​វិទ្យាស្ថាន ENRICH ថ្លែង​ថា ទិវា​នេះ​វា​ជា​ឱកាស​សម្រាប់​លើក​កម្ពស់​ការ​យល់​ដឹង ជា​ពិសេស​យុវជន​ឲ្យ​ចូល​រួម​បន្ទាន់​ក្នុង​ការ​ប្រយុទ្ធ​ប្រឆាំង​នឹង​បទ​ល្មើស​សត្វ​ព្រៃ​ដើម្បី​សង្គ្រោះ​សត្វ​ព្រៃ​ក៏​ដូច​ព្រៃ​ឈើ​នៅ​កម្ពុជា។ លោក​ថា៖ «សត្វ​ព្រៃ​នៅ​ទូទាំង​ពិភពលោក​ត្រូវ​ការ ការ​ការពារ​ពី​អ្នក​ទាំង​អស់​គ្នា»។

ជា​និស្សិត​និង​ជា​អ្នក​ការពារ​សត្វ​ព្រៃ​កម្ពុជា​កញ្ញា កូវ ច័ន្ទនិច អាយុ ២០​ឆ្នាំ និយាយ​ថា យុវជន​ត្រូវ​ព្យាយាម​ចូល​រួម​គ្រប់​សកម្មភាព​ដែល​ទាក់ទង​ទៅ​នឹង​ការ​ការពារ​សត្វ​ព្រៃ​ដើម្បី​ទទួល​បាន​ការ​យល់​ដឹង​ឲ្យ​កាន់​តែ​ច្រើន។ លើស​ពី​នេះ​យុវជន​មាន​ទំនាក់​ទំនង​ច្រើន​ក្នុង​សង្គម ហេតុ​ដូច្នេះ ពួកគេ​អាច​បង្កើត​សកម្មភាព​ផ្សេងៗ ដូចជា ការ​ចុះ​ទៅ​សហគមន៍​ដើម្បី​បណ្តុះ​គំនិត​និង​អប់រំ​សហគមន៍​ឲ្យ​យល់​ដឹង​ពី​ផល​ប្រយោជន៍​សត្វ​ព្រៃ។

កញ្ញា​បន្ត​ថា៖ «តាម​ការ​ចុះ​សាកសួរ​ផ្ទាល់ ខ្ញុំ​ឃើញ​ថា សត្វ​ព្រៃ​មាន​ការ​ធ្លាក់​ចុះ។ អ៊ីចឹង​ទោះ​យើង​មិន​អាច​ចុះ​ល្បាត​ការពារ​សត្វ​ព្រៃ​បាន តែ​យើង​អាច​ធ្វើ​សកម្មភាព​ផ្សេងៗ​ដែល​ជួយ​គាំទ្រ​ពីក្រោយ ផ្តល់​គំនិត និង​បង្រៀន​អ្នក​ភូមិ​បាន​ដែរ»។

ទិវា​នេះ​ក៏​មាន​ការ​លើក​ទឹក​ចិត្ត​ឲ្យ​បញ្ឈប់​ការ​បរិភោគ​សត្វ​ព្រៃ ហើយ​ជួយ​ធ្វើ​យុទ្ធនាការ អភិរក្ស​សត្វ​ព្រៃ​តាម​បណ្តាញ សង្គម​ផង​ដែរ។

អង្គការ USAID កត់​សម្គាល់​ថា នៅ​ប៉ុន្មាន​ឆ្នាំ​កន្លង​ទៅ​នេះ ប្រទេស​កម្ពុជា​មាន​ការ​ទទួល​ស្គាល់​ថា មាន​ការ​កើន​ឡើង​គួរ​ឲ្យ​កត់​សម្គាល់​នៃ​ការ​បរបាញ់​និង​ការ​ជួញ​ដូរ​សត្វ​ព្រៃ។ សត្វ​ព្រៃ​នៅ​កម្ពុជា​មួយ​ចំនួន​បាន​ផុត​ពូជ ហើយ​ប្រភេទ​សត្វ​ខ្លះ​ទៀត​កំពុង​ឈាន​ទៅ​រក​ការ​ផុត​ពូជ​ផង​ដែរ៕

អត្ថបទគួរចាប់អារម្មណ៍