បាត់ដំបងៈ ក្រុមយុវជនទំនើង ៤ នាក់ ដែលប្រើកាំភ្លើងកែច្នៃចំនួន ៧ ដើម ត្រូវបានតុលាការខេត្តបាត់ដំបង សម្រេចឃុំខ្លួននៅពន្ធនាគារខេត្តកាលពីថ្ងៃទី ២៧ ខែមីនា បន្ទាប់ពីត្រូវបានសមត្ថកិច្ចចាប់ខ្លួនបាននៅភូមិអូរតាញា ឃុំតាគ្រាម ស្រុកបាណន់។
លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបងឱ្យដឹងពីម្សិលមិញថា ជនសង្ស័យដែលសុទ្ធតែភេទប្រុស ទី១- ឈ្មោះ សាន រក្សា ហៅប្រុស អាយុ ២៦ ឆ្នាំ ទី២- ឡឹង លេង អាយុ ៣០ ឆ្នាំ, ទី៣- ឈឿង សុភ័ក្ត្រ អាយុ ២៦ ឆ្នាំ និង នៅ ណា ហៅ ជ្រូក អាយុ ២៥ ឆ្នាំ។ ពួកគេមានលំនៅក្នុងភូមិតាង៉ែន ឃុំតាគ្រាម ស្រុកបាណន់ ។
លោក ឈឿង គឹមសុង ថ្លែងថា៖ «លោកចៅក្រមស៊ើបសួរ គឹម ហេង បានចេញដីកាឃុំពួកគេ។ ក្នុងដីកានោះចោទប្រកាន់ពីបទដឹកជញ្ជូនអាវុធដោយគ្មានការអនុញ្ញាតតាមមាត្រា ៤៩០ នៃក្រមព្រហ្មទណ្ឌ»។ យោងមាត្រា ៤៩០ នេះ ប្រសិនបើតុលាការរកឃើញថា ជនទាំង ៤ នាក់ពិតជាបានប្រព្រឹត្តដូចការចោទប្រកាន់មែននោះនឹងត្រូវផ្ត្តន្ទាទោសដាក់ពន្ធនាគារពី ៦ ខែ ទៅ ៣ ឆ្នាំ និងពិន័យជាប្រាក់ពី ១ លានទៅ ៦ លានរៀល។
លោក តាន់ វ៉ាន់នី អធិការនគរបាលស្រុកបាណន់ថ្លែងពីម្សិលមិញតាមសម្តីប្រជាពលរដ្ឋថា ក្រុមជនសង្ស័យទាំង ៤ នាក់តែងតែកាន់កាំភ្លើងសម្ញែងដើរក្នុងភូមិហាក់មិនក្រែងញញើតអ្វីឡើយ ខណៈអាជ្ញាធរភូមិ-ឃុំតែងផ្សព្វផ្សាយអប់រំពលរដ្ឋអំពីគោលនយោបាយភូមិ-ឃុំមានសុវត្ថិភាព។
មិនតែប៉ុណ្ណោះជនទាំង ៤ នាក់ មិនត្រឹមតែបង្កភាពអនាធិបតេយ្យនៅក្នុងភូមិ-ឃុំប៉ុណ្ណោះទេតែថែមទាំងនាំគ្នាចូលបាញ់សត្វនៅក្នុងព្រៃសហគមន៍ក្នុងស្រុកបាណន់ ដែលជាព្រៃហាមឃាត់ទៀតផង។
លោកថា៖ «ពួកគាត់បាញ់សត្វរបៀបជាក្រុមអនាធិបតេយ្យ ហើយពួកគាត់បាញ់សត្វនៅព្រៃសហគមន៍ជាព្រៃគេហាមឃាត់ទៀត។ នៅក្នុងស្រុកបាណន់មាន ២ ទៅ ៣ ព្រៃសហគមន៍ និងមានឈ្មោះហៅផ្សេងៗគ្នា។ ព្រៃសហគមន៍នោះ គឺខាងមន្ទីរបរិស្ថានគេការពារថែរក្សា»។
លោក វ៉ាន់នី បញ្ជាក់ប្រាប់តាមសម្តីពលរដ្ឋថា យុវជនទំនើងទាំង ៤ នាក់នេះ សុទ្ធតែជាក្រុមបោះបង់ការសិក្សាហើយតែងតែដើរបង្កចលាចលក្នុងស្រុកក្នុងភូមិធ្វើឱ្យប្រជាពលរដ្ឋមានការភ័យខ្លាច។ ចំពោះកាំភ្លើងដែលពួកគេកែច្នៃចំនួន ៧ ដើមប្រើគ្រាប់កាំកង់ (គ្រាប់ដែកបាដាង) ហើយថ្វីដ្បិតតែកាំភ្លើងនេះមិនបាញ់គ្រាប់កាំភ្លើងពិតក្តី តែបើបាញ់មនុស្សចំកន្លែងសំខាន់ គឺអាចមានគ្រោះថ្នាក់ដល់ជីវិតបាន ព្រោះវាមានកម្លាំងខ្យល់ខ្លាំង។
ពាក់ព័ន្ធនឹងក្មេងៗប្រើកាំភ្លើងកែច្នៃនេះ មិនមែនមានតែក្នុងស្រុកបាណន់តែមួយប៉ុណ្ណោះទេ តែក៏មាននៅក្រុងបាត់ដំបងផងដែរ ដែលក្មេងទំនើងកាន់កាំភ្លើងកែច្នៃដើរសម្ញែងរក្នុងភូមិចំការសំរោងរាល់ថ្ងៃ ហើយមិនទាន់មានសមត្ថកិច្ចណាឃាត់ខ្លួនទេ។
បើតាមមន្ត្រីនគរបាល ១ រូបដែលរស់នៅក្នុងភូមិចំការសំរោង ១ ឃុំចំការសំរោងបានប្រាប់ ភ្នំពេញ ប៉ុស្តិ៍ ពីម្សិលមិញ ដោយសុំមិនឱ្យបញ្ចេញឈ្មោះថា ក្រុមក្មេងទំនើងកំពុងតែបង្កការភ័យខ្លាចដល់អ្នកភូមិព្រោះតែពួកគេប្រើប្រាស់កាំភ្លើងកែច្នៃនេះ។ មន្ត្រីនគរបាលរូបនេះថ្លែងថា៖ «ពួកក្មេងប្រើកាំភ្លើងកែច្នៃនេះ ខ្ញុំបានរាយការណ៍ទៅប៉ុស្តិ៍ឃុំចំការសំរោងដែរតែមិនទាន់ឃើញកម្លាំងចុះមក។ ក្រុមគេដើរកាន់កាំភ្លើងសម្ញែងរាល់ថ្ងៃហ្នឹង។ បើឃើញពួកវាហើយប្រជាពលរដ្ឋយើងភ័យដែរហ្នឹង»៕