ស្ទឹងត្រែងៈ ក្មេងទំនើង ៧០ នាក់ ត្រូវបានដោះលែងវិញហើយកាលពីម្សិលមិញ បន្ទាប់ពីសមត្ថកិច្ចកងរាជអាវុធហត្ថ និងនគរបាលក្រុងស្ទឹងត្រែង ឃាត់ខ្លួនកាលពីយប់ថ្ងៃទី ២២ ធ្នូ រឿងប្រើម៉ូតូចំនួន ៤០ គ្រឿងដែលមានភ្លើងឡាស៊ែរ និងកាត់តបំពង់ស៊ីម៉ាំងឲ្យសំឡេងរំខានអ្នកដទៃ។
លោក សាយ កុសល អភិបាល និងជាគណៈបញ្ជាការឯកភាពក្រុងស្ទឹងត្រែង បានប្រាប់ពីម្សិលមិញថា ក្រុមយុវជនទំនើងទាំងនោះត្រូវបានដោះលែងវិញ បន្ទាប់ពីហៅអាណាព្យាបាលរបស់ពួកគេមកណែនាំ និងអប់រំដល់ក្រុមយុវជនទាំងនោះ។ ប៉ុន្តែក្នុងចំណោម ៧០ នាក់នោះមាន ៧ នាក់ផ្ទុកសារធាតុញៀន បន្ទាប់ពីសមត្ថកិច្ចបានពិនិត្យទឹកនោមតែមិនធ្ងន់ធ្ងរអីទេ។ ដូច្នេះពួកគេត្រូវចាប់កោរសក់ មុនពេលហៅអាណាព្យាបាលមកធានា។
លោកបន្តថា ក្រុមយុវជនទំនើងរបៀបនេះមិនសូវមាននៅក្រុងស្ទឹងត្រែងទេ ប៉ុន្តែច្រើនមកពីតាមស្រុកជាយក្រុងស្ទឹងត្រែង។
ភាគច្រើននៃពួកគេគឺចូលក្នុងក្រុងចាប់ពីម៉ោង ៩ យប់ដល់ម៉ោង ២ ទៅម៉ោង ៣ ទៀបភ្លឺ ទើបចេញទៅវិញ។
លោកថ្លែងថា៖ «ម៉ូតូពួកគេមានចម្រុះ មានប្រើភ្លើងឡាស៊ែរ មានតបំពង់ស៊ីម៉ាំង និងម៉ូតូខ្លះអូសកាងតាមថ្នល់គឺមានសព្វគ្រប់។
បើយើងមានកម្លាំងតែ ៥ ទៅ ១០ នាក់ គឺធ្វើមិនបែកទេ ព្រោះពួកនេះមានដាវសាមូរ៉ៃផង»។
ប៉ុន្តែលោក សាយ កុសល ប្រាប់ថា មានម៉ូតូ ៨ គ្រឿងត្រូវបានអនុញ្ញាតឲ្យយកត្រឡប់ទៅវិញ ដោយសារមានឯកសារគ្រប់គ្រាន់។
លោកបន្តថា៖ «បើម៉ូតូគ្មានពន្ធគ្មានអ្វីសម្គាល់ត្រឹមត្រូវ គឺនៅថ្ងៃក្រោយពេលមានអំពើចោរកម្ម ឬឃាតកម្មផ្សេងៗយើងពិបាកស្រាវជ្រាវណាស់»។
ដោយឡែកលោក ស៊ឹម គួន ប្រធានមន្ទីរស្តីទីនៃបញ្ជាការដ្ឋានកងរាជអាវុធហត្ថខេត្តស្ទឹងត្រែងប្រាប់ពីម្សិលមិញដែរថាក្រុមយុវជនទំនើងនេះ ក្រោយពីធ្វើការអប់រំណែនាំពួកគេមកគឺសមត្ថកិច្ចបានអនុញ្ញាតឲ្យត្រឡប់ទៅផ្ទះវិញអស់ហើយ៕