ភ្នំពេញៈ ទោះបីជាមានការរីករាលដាលឆ្លងមេរោគកូវីដ ១៩ ក្នុងសហគមន៍ ដែលបណ្ដាលឱ្យយុវជនបរិស្ថានក្រៀលកម្ពុជា មិនអាចចុះអនុវត្តសកម្មភាពផ្ទាល់ក្នុងការប្រមូលសំរាមតាមទីតាំងនានាក្នុងទីក្រុងភ្នំពេញ និងខេត្តគោលដៅសំខាន់ចំនួន ៤ ទៀតបានក៏ពិតមែន តែគម្រោងរក្សាបរិស្ថានស្អាតនៅតែបន្តធ្វើលើប្រព័ន្ធផ្សព្វផ្សាយក្នុងស្មារតីឱ្យយុវជនស្រឡាញ់បរិស្ថាន និងរួមចំណែកបណ្ដុះស្មារតីបរិស្ថាននេះចូលក្នុងសង្គមដដែល។
រៀងរាល់ថ្ងៃអាទិត្យក្នុងដើមខែនីមួយៗ យុវជនបរិស្ថានក្រៀលកម្ពុជាតែងតែរៀបចំអនុវត្តគម្រោងដែលមានឈ្មោះថា «រក្សាបរិស្ថានស្អាត» ក្នុង ៥ រាជធានី-ខេត្ត ដោយមានការចូលរួមពីសំណាក់យុវជនជាច្រើនរយនាក់ តែខណៈមានការរាតត្បាតជំងឺកូវីដ ១៩ ក្នុងសហគមន៍ខ្លាំងក្នុងខែមីនានេះ គម្រោងក៏ត្រូវបានប្ដូរមកជាយុទ្ធនាការតាមប្រព័ន្ធអនឡាញជំនួសវិញ។
លោក ហួ ឆៃងន់ ស្ថាបនិកក្រៀលកម្ពុជា និងជាប្រធានគម្រោង «រក្សាបរិស្ថានស្អាត» បានថ្លែងឱ្យដឹងថា គម្រោងនេះជាធម្មតាយុវជនត្រូវប្រមូលផ្ដុំគ្នាដើររើសសំរាម និងធ្វើការផ្សព្វផ្សាយជាសារទៅកាន់ប្រជាពលរដ្ឋស្របពេលជាមួយគ្នា ប៉ុន្តែពេលនេះដើម្បីអនុវត្តវិធានការរក្សាគម្លាតសង្គម និងបង្ការការឆ្លងមេរោគ យុវជនមិនអាចចុះអនុវត្តដោយផ្ទាល់បានទេ។
លោកថ្លែងថា៖ «កម្មវិធីដែលយើងបានធ្វើតាមរយៈការអនុវត្តកម្មវិធីក្នុងទម្រង់បរិស្ថានអនឡាញក្នុងបរិបទកូវីដ ១៩ នេះ យុវជនស្ម័គ្រចិត្តបរិស្ថានត្រូវចូលរួមធ្វើការផ្សព្វផ្សាយតាមប្រព័ន្ធសង្គមនានាដោយលេងជាកម្មវិធី Challenge សប្បាយៗដូចជា បង្ហោះសារបរិស្ថាន និងប្ដូរប្រូហ្វាល FaceBook ផ្ទាល់ខ្លួនទាំងអស់គ្នា និងមានការថតវីដេអូអប់រំ ឬវីដេអូអំពីការសម្អាតបរិស្ថានរៀងៗខ្លួននៅទីតាំងណាមួយក្នុងសហគមន៍ជាដើម»។
លោកបានបន្តថា ទោះបីជាមិនអាចចុះអនុវត្តសកម្មភាពផ្ទាល់ក៏ពិតមែន យុវជនក្រៀលកម្ពុជាកសាងស្មារតីស្រឡាញ់បរិស្ថានក្នុងនាមជាធនធានដែលរួបរួមកម្លាំងដោះស្រាយបញ្ហាក្នុងសង្គមជាមួយគ្នា ហើយនៅតែបន្តអនុវត្តសកម្មភាពគម្រោងដូចការគ្រោងទុក។
លោកថ្លែងថា៖ «យើងនៅតែបន្តលើកទឹកចិត្តចង់ឱ្យយុវជនបន្តគិតគូរពីរឿងបរិស្ថាន ហើយយើងក៏គម្រោងថានឹងចុះអនុវត្តផ្ទាល់ដូចមុនវិញនៅដើមខែក្រោយនេះ ប៉ុន្តែស្ថានភាពមានការប្រែប្រួលយ៉ាងណានោះ យើងនឹងចាំមើលទាំងអស់គ្នា»។
លោកថា យុវជនដែលបានចុះឈ្មោះក្នុងការចូលរួមសម្អាតបរិស្ថានតាមអនឡាញនេះមានចំនួន ៣៦៥ នាក់។
គួរបញ្ជាក់ផងដែរថា គម្រោងរក្សាបរិស្ថានស្អាតបង្កើតឡើងដើម្បីក្រើនរំឭកយុវជន និងប្រជាពលរដ្ឋពីបញ្ហាបរិស្ថាន ការទុកដាក់សំរាមឱ្យបានល្អ និងបញ្ជ្រាបការយល់ដឹងពីបរិស្ថាននៅលើប្រព័ន្ធផ្សព្វផ្សាយសង្គមទៅដល់អ្នកប្រើប្រាស់បណ្ដាញសង្គមបន្ថែម។
ដោយមានការគាំទ្រពីក្រសួងបរិស្ថាន ក្រសួងទេសចរណ៍ និងសាលារាជធានីភ្នំពេញគម្រោងរក្សាបរិស្ថានស្អាតនេះបានអនុវត្តនៅក្នុង ៥ រាជធានី-ខេត្តរួមមាន រាជធានីភ្នំពេញ ខេត្តកំពត ខេត្តកែប ខេត្តសៀមរាប និងខេត្តបាត់ដំបង នៅរៀងរាល់ថ្ងៃអាទិត្យនៃដើមខែនីមួយៗចាប់ពីខែកុម្ភៈនឹងបញ្ចប់នៅខែធ្នូ ឆ្នាំ ២០២១។
លោក នេត្រ ភក្ត្រា អ្នកនាំពាក្យក្រសួងបរិស្ថានបានឱ្យដឹងថា ក្រសួងឯកភាពជាមួយនឹងក្រុមយុវជនក្រៀលកម្ពុជា មិនធ្វើសកម្មភាពចុះផ្ទាល់ដោយសាររាជរដ្ឋាភិបាល និងក្រសួងសុខាភិបាលមិនឱ្យមានការជួបជុំក្នុងទ្រង់ទ្រាយធំទេ ដែលជាហេតុក្រសួងបានផ្តល់យោបល់ឱ្យធ្វើការផ្សព្វផ្សាយតាមប្រព័ន្ធអនឡាញវិញ។ «យើងគ្រប់គ្រងទុកដាក់សំរាមឱ្យបានត្រឹមត្រូវ និងការផ្សារភ្ជាប់ទៅនឹងការបង្ការខ្លួន ទប់ស្កាត់មិនឱ្យមានការឆ្លងកូវីដ ១៩ ទាំងខ្លួនយើង និងសហគមន៍»៕