.jpg)
ជនសង្ស័យ ពេលត្រូវបានសមត្ថកិច្ចចាប់ខ្លួន។ រូបថត ប៉ូលិស
សៀមរាបៈ នគរបាលខេត្តសៀមរាប បានបញ្ជូនជនសង្ស័យម្នាក់ទៅសាលាដំបូងខេត្តកាលពីរសៀលម្សិលមិញ បន្ទាប់ពីចាប់ខ្លួនកាលពីថ្ងៃទី ៤ ខែឧសភា នៅភូមិ-សង្កាត់ស្វាយដង្គំពាក់ព័ន្ធករណីជួញដូរអាវុធខ្លីពីប្រទេសថៃ។
លោក ហួត សុធី ស្នងការរងទទួលបន្ទុកផែនសន្តិសុខនៃស្នងការដ្ឋាននគរបាលខេត្តសៀមរាបឲ្យដឹងថា ជនសង្ស័យឈ្មោះ អ៊ុ ពេជ្ររស្មីឧត្តម ភេទប្រុស អាយុ ២០ ឆ្នាំរស់នៅភូមិស្វាយដង្គំ ត្រូវសមត្ថកិច្ចបញ្ជូនទៅសាលាដំបូងខេត្តសៀមរាបជាប់ពាក់ព័ន្ធអំពើជួញដូរអាវុធ។
លោកបន្តថា មុនមានការចាប់ខ្លួនយុវជនខាងលើគឺសមត្ថកិច្ចបានស្រាវជ្រាវដឹងថា ជនសង្ស័យបានលួចទិញអាវុធខ្លីពីប្រទេសថៃចូលមកកម្ពុជា។ ក្រោយពីសមត្ថកិច្ចជំនាញធ្វើការស៊ើបអង្កេតច្បាស់លាស់ និងកំណត់គោលដៅបានហើយ សមត្ថកិច្ចបានសុំការសម្របសម្រួលផ្នែកផ្លូវច្បាប់ពីអយ្យការអមសាលាដំបូងខេត្តសៀមរាប ហើយបន្ទាប់ពីមានការអនុញ្ញាតពីព្រះរាជអាជ្ញា និងដោយមានការបញ្ជាពីលោកស្នងការខេត្តសៀមរាបហើយនោះ លោកបានដឹកនាំកម្លាំងចុះបង្ក្រាបកាលពីវេលាម៉ោង ៤ កន្លះរសៀល ថ្ងៃទី ៤ ខែឧសភា នៅចំណុចភូមិស្វាយដង្គំ។
សមត្ថកិច្ចបានចូលឆែកឆេរក្នុងផ្ទះជនសង្ស័យដោយឃាត់ជនសង្ស័យរួមនឹងដកហូតវត្ថុតាងរួមមាន ទី ១- កាំភ្លើងម៉ាក Glock19 ពណ៌ខ្មៅជាប្រភេទប្រើហ្គាស គ្រាប់ជ័រ គ្រាប់ដែក (គ្រាប់កង់) ១ ដើម និងបង់ចំនួន ១។ ទី ២- កាំភ្លើងម៉ាក Combat master ពណ៌ខ្មៅជាប្រភេទប្រើហ្គាស គ្រាប់ជ័រ គ្រាប់ដែក ១ ដើមរួមនឹងបង់ចំនួន ២។ ទី ៣ កាំភ្លើងម៉ាក Combat master ពណ៌ខ្មៅជាប្រភេទប្រើហ្គាស គ្រាប់ជ័រ គ្រាប់ដែក ១ ដើមមានបង់ ២ និងសម្ភារមួយចំនួនទៀត។
លោកបញ្ជាក់ថា កាំភ្លើងនោះអាចបាញ់បានទាំងគ្រាប់ដែក និងគ្រាប់ជ័រ ហើយបើបាញ់គ្រាប់ដែកត្រូវភ្នែកគឺនឹងបែកគ្រាប់ភ្នែកខ្ទេចតែម្តង៕
