ព្រះវិហារៈ យុវជនម្នាក់របួសក្បាលធ្ងន់ត្រូវប្រជាពលរដ្ឋបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកជាំក្សាន្តដោយសារបើកអេស្កាវ៉ាទ័រកាយដីធ្វើប្រឡាយបង្ហូរទឹកហើយប៉ះចំមីនតោន ១ គ្រាប់ ផ្ទុះនៅក្នុងភូមិកំប្រាក់ ឃុំយាង ស្រុកជាំក្សាន្តកាលពីថ្ងៃទី ១៧ ខែឧសភា។
លោក ជុំ សាវីន នាយប៉ុស្តិ៍រដ្ឋបាលឃុំយាង ប្រាប់ភ្នំពេញប៉ុស្តិ៍ពីម្សិលមិញថា យុវជនរងគ្រោះឈ្មោះ សុខ រដ្ឋា អាយុ ១៨ ឆ្នាំ ជាកម្មករស៊ីឈ្នួលបើកអេស្កាស្កាវ៉ាទ័រឲ្យគេប៉ុន្តែជនរងគ្រោះមិនរស់នៅអចិន្រៃ្តយ៍ក្នុងភូមិ-ឃុំខាងលើទេគឺនៅខេត្តបន្ទាយមានជ័យ។ ជនរងគ្រោះកំពុងព្យាបាលរបួសនៅមន្ទីរពេទ្យបង្អែកស្រុកជាំក្សាន្តនៅឡើយកាលពីម្សិលមិញ។ លោកបន្តថា៖ «គាត់ត្រូវអំបែងគ្រាប់របួសត្រង់ក្បាលគួរសមដែរ តែមិនស្លាប់ទេ។ គាត់កាយដីប្រឡាយនោះហើយប៉ះចំមីនផ្ទុះទៅ»។
លោក ជុំ សាវីន ឲ្យដឹងតាមសម្តីជនរងគ្រោះថា យុវជនរូបនោះជាតៃកុងបើក អេស្កាវ៉ាទ័រហើយត្រូវបានគេជួលគាត់ឲ្យកាយដីប្រឡាយ ដើម្បីបង្ហូរទឹកធ្វើស្រែ។ នៅវេលាម៉ោង ៦ ព្រឹកថ្ងៃទី ១៧ ខែឧសភា គាត់បានកាយដីស្រាប់តែគាត់បានឮសំឡេងផ្ទុះកក្រើកគ្រឿងចក្រដែលគាត់កំពុងបើកកាយដីនោះ។ តែភ្លាមៗនោះគាត់មិនដឹងថាត្រូវគ្រាប់មីនតោនទេមួយសន្ទុះក្រោយមក ទើបឃើញមានមនុស្សមកចោមរោមនៅកន្លែងកើតហេតុ។
លោកបន្តថា ចំណែកគ្រឿងចក្រនោះត្រូវរងការខូចខាតច្រើនដែរ។ តំបន់ដែលផ្ទុះនោះ ជាតំបន់អតីតសមរភូមិប្រយុទ្ធគ្នារវាងកងកម្លាំងប្រដាប់អាវុធអតីតរដ្ឋកម្ពុជាជាមួយនឹងកងទ័ពខ្មែរក្រហម។ បើតាមលោក ជុំ សាវីន ក្នុងរយៈពេល ៣ ឆ្នាំ គិតពីឆ្នាំ ២០១៨ ដល់ដើមឆ្នាំ ២០២០ នេះករណីផ្ទុះមីនតោនមានតែ ៣ ករណីប៉ុណ្ណោះ តែមិនស្លាប់មនុស្សទេ។
លោក សំ សាមឿន ស្នងការរងខេត្តព្រះវិហារទទួលផែនអាវុធជាតិផ្ទុះថ្លែងពីម្សិលមិញដែរថា នៅទូទាំងខេត្តព្រះវិហារមិនសូវមានករណីផ្ទុះមីនតោនកើតឡើងទេ ដោយសារតែអង្គភាពកម្ចាត់មីន (ស៊ីម៉ាក់) បានធ្វើការបោសសម្អាតគ្រាប់មីនស្ទើរអស់ហើយដែរនៅតំបន់ជាប់ព្រំដែនកម្ពុជា-ថៃ។ «បច្ចុប្បន្នមានអង្គភាពស៊ីម៉ាក់មានមូលដ្ឋាននៅជិតប្រាសាទព្រះវិហារ។ ក្រៅពីរាវរកគ្រាប់គឺប្រជាពលរដ្ឋពេលប្រទះឃើញគ្រាប់មិនទាន់ផ្ទុះហៅខាងស៊ីម៉ាក់ឲ្យប្រមូលដែរ»៕