ពោធិ៍សាត់ៈ នគរបាលស្រុកបានបញ្ជូនយុវជនម្នាក់ទៅស្នងការដ្ឋាននគរបាលខេត្តពោធិ៍សាត់ពីរសៀលម្សិលមិញ បន្ទាប់ពីចាប់ខ្លួនភ្លាមៗតាមបណ្តឹងរបស់ម្តាយក្មេងស្រីរងគ្រោះកាលពីថ្ងៃទី ៦ កញ្ញា ពាក់ព័ន្ធពីបទរំលោភសេពសន្ថវៈក្មេងស្រីអាយុ ៤ ឆ្នាំ ប្រព្រឹត្តនៅភូមិរហាទិល ឃុំតាលោ ស្រុកតាលោសែនជ័យ។
លោក ហែម មុនី អធិការនគរបាលស្រុកតាលោសែនជ័យ ថ្លែងពីម្សិលមិញថា ជនសង្ស័យឈ្មោះ វ៉ុន ស៊ីហៃ អាយុ ២០ ឆ្នាំ រីឯក្មេងស្រីរងគ្រោះឈ្មោះ ស.ថ អាយុ ៤ ឆ្នាំ ពួកគេរស់នៅក្នុងភូមិ-ឃុំកើតហេតុខាងលើ។
លោកបន្តថា ជនសង្ស័យបានសារភាពអំពីការប្រព្រឹត្តទៅលើក្មេងរងគ្រោះអស់ហើយ គឺស៊ីចង្វាក់គ្នាទៅនឹងបណ្តឹងរបស់ម្តាយក្មេងរងគ្រោះ។ «ក្រៅពីជាប់ពាក់ព័ន្ធនឹងបទល្មើសរំលោភសេពសន្ថវៈជនសង្ស័យក៏ពាក់ព័ន្ធនឹងការប្រើគ្រឿងញៀនដែរ ព្រោះក្នុងទឹកនោមគាត់មានផ្ទុកសារធាតុញៀន»។
លោក មុនី ប្រាប់តាមសម្តីជនសង្ស័យដែលធ្លាប់ទៅធ្វើកម្មករនៅប្រទេសថៃ ហើយបានប្រើប្រាស់គ្រឿងញៀនថា ជននេះទើបតែមកស្រុកបានតែកន្លះខែប៉ុណ្ណោះក៏កើតមានហេតុការណ៍នេះ។ តែជននេះថា រូបគេនៅផ្ទះមិនបានប្រើគ្រឿងញៀនទេ។ នៅវេលាម៉ោងជាង ៨ ព្រឹកថ្ងៃទី ៦ កញ្ញា ក្មេងស្រីរងគ្រោះបានទៅលេងផ្ទះជនសង្ស័យដែលផ្ទះរបស់ពួកគេនៅចម្ងាយពីគ្នាតែប្រមាណ ៤០ ម៉ែត្រប៉ុណ្ណោះ។
លោកថា ពេលនោះជនសង្ស័យបានបបួលក្មេងរងគ្រោះទៅខាងក្រោយផ្ទះរបស់ខ្លួន ដើម្បីបេះផ្លែត្របែកហើយជនសង្ស័យបានចាប់ក្មេងស្រីរងគ្រោះរំលោភសេពសន្ថវៈតែម្តង។ បន្ទាប់ពីបានទទួលរងនូវការចាប់រំលោភ ក្មេងស្រីរងគ្រោះបានដើរត្រឡប់ទៅផ្ទះវិញ ដោយស្រែកយំផង។
ដោយមានការសង្ស័យ ម្តាយក្មេងស្រីរងគ្រោះបានសួរកូន ប៉ុន្តែក្មេងរងគ្រោះមិនចេះនិយាយរៀបរាប់ដូចមនុស្សពេញវ័យបាន គិតតែពីយំ ហើយដៃចង្អុលទៅប្រដាប់ភេទរបស់នាង។ ក្មេងរងគ្រោះមានស្នាមជាំនៅត្រង់ប្រដាប់ភេទ។ ក្រោយទទួលបានពាក្យបណ្តឹងភ្លាម កម្លាំងនគរបាលឃុំបានចុះដល់ផ្ទះជនសង្ស័យ ហើយក៏នាំខ្លួនមកសាកសួរតែម្តង៕