The Phnom Penh Post Search

Search form




Logo of Phnom Penh Post newspaper Phnom Penh Post - យុវជន​នៅ​តែ​ខ្វះ​លទ្ធភាព​ក្នុង​ការ​ចូល​រួម​អភិវឌ្ឍ​សង្គម

យុវជន​នៅ​តែ​ខ្វះ​លទ្ធភាព​ក្នុង​ការ​ចូល​រួម​អភិវឌ្ឍ​សង្គម

យុវជន​ប្រឡង​បាក់ឌុប​ជាប់​និទ្ទេស A ក្នុង​ឆ្នាំ​នេះ។ ពួក​គេ​អាច​នឹង​មាន​ឱកាស​ច្រើន​ដើម្បី​ចូល​រួម​ជួយ​អភិវឌ្ឍ​សង្គម។
យុវជន​ប្រឡង​បាក់ឌុប​ជាប់​និទ្ទេស A ក្នុង​ឆ្នាំ​នេះ។ ពួក​គេ​អាច​នឹង​មាន​ឱកាស​ច្រើន​ដើម្បី​ចូល​រួម​ជួយ​អភិវឌ្ឍ​សង្គម។ ផា លីណា

យុវជន​នៅ​តែ​ខ្វះ​លទ្ធភាព​ក្នុង​ការ​ចូល​រួម​អភិវឌ្ឍ​សង្គម

ភ្នំពេញៈ យុវជន​កម្ពុជា បច្ចុប្បន្ន​អាច​ចូល​រួម​ចំណែក​ក្នុង​ការ​អភិវឌ្ឍ​សង្គម តាម​បែប​លទ្ធិ​ប្រជាធិបតេយ្យ​បាន​តិច​តួច ដោយ​សារ​ខ្វះ​លទ្ធភាព​គ្រប់​គ្រាន់ និង​ទិស​ដៅ​ច្បាស់​លាស់​សម្រាប់​ការ​ផ្លាស់​ប្តូរ។ នេះ​បើ​តាម​ការ​លើក​ឡើង​របស់​វាគ្មិន និង​យុវជន នៅ​ក្នុង​សន្និសីទ​សារ​ព័ត៌មាន​ស្តីពី ឱកាស​របស់​យុវជន​ក្នុង​សង្គម​ប្រជាធិបតេយ្យ​ដែល​ធ្វើ​ឡើង​កាល​ពី​ម្សិល​មិញ​ក្នុង​ទិវា​អន្តរជាតិ​ប្រជាធិបតេយ្យ រៀបចំ​ដោយ​ក្រុម​ប្រឹក្សា​យុវជន​កម្ពុជា (YCC)។

យុវតី ម៉ម ណា និស្សិត​សកល​វិទ្យាល័យ​មួយ និង​ជា​សមាជិក​នៃ​ក្រុម​ប្រឹក្សា​យុវជន​កម្ពុជា បាន​ថ្លែង​ថា កញ្ញា​គាំទ្រ​ចំពោះ​ការ​បើក​ទូលាយ ការ​បញ្ចេញ​មតិ លើ​ប្រព័ន្ធ​ទំនាក់​ទំនង​សង្គម ប៉ុន្តែ កញ្ញា​មាន​ការ​ព្រួយ​បារម្ភ លើ​ការ​រឹត​ត្បិត​សេរីភាព​ក្នុង​ការ​បញ្ចេញ​មតិ​របស់​យុវជន​ទៅ​ថ្ងៃ​អនាគត​បន្ទាប់​ពី​លេច​ឮ​ថា រដ្ឋាភិបាល​មាន​គម្រោង​បង្កើត​ច្បាប់​គ្រប់​គ្រង​ប្រព័ន្ធ​អ៊ីនធឺណិត។

ម៉ម ណា បាន​និយាយ​ថា៖ «យុវជន​បច្ចុប្បន្ន មិន​ហ៊ាន​បញ្ចេញ​មតិ​ជា​សាធារណៈ ពាក់​ព័ន្ធ​នឹង​រឿង​នយោបាយ​ឡើយ ពួក​គេ ច្រើន​ប្រើ​ប្រាស់​ហ្វេសប៊ុក ដើម្បី​បញ្ចេញ​ទស្សនៈ ចុះ​បើ​រដ្ឋាភិបាល បង្កើត​ច្បាប់​គ្រប់​គ្រង​អ៊ីនធឺណិត​នេះ តើ​យុវជន​គួរ​ធ្វើ​បែប​ណា?»។

លោក អ៊ូ វីរៈ ប្រធាន​ក្រុម​ប្រឹក្សា​ភិបាល នៃ​មជ្ឈមណ្ឌល​សិទ្ធិ​មនុស្ស​កម្ពុជា បាន​ឲ្យ​ដឹង​ថា សេចក្តី​ព្រាង​ច្បាប់​គ្រប់​គ្រង​ប្រព័ន្ធ​អ៊ីនធឺណិត​កំពុង​ស្ថិត​ក្នុង​ការ​ពិចារណា​របស់​រដ្ឋាភិបាល ហើយ​សង្គម​ស៊ីវិល បាន​កំពុង​ជំរុញ​ការ​អនុម័ត​ច្បាប់ ឲ្យ​មាន​ការ​ចូល​រួម​ពី​ភាគី​ពាក់​ព័ន្ធ ដើម្បី​ធានា​ការ​លើក​កម្ពស់​សិទ្ធិ​បញ្ចេញ​មតិ។

លោក អ៊ូ វីរៈ ថ្លែង​ថា បើ​ទោះ​បី​ជា អំឡុង​ប៉ុន្មាន​ឆ្នាំ​ចុង​ក្រោយ​នេះ យុវជន​ហាក់​បាន​ចូល​រួម​យ៉ាង​សកម្ម​ក្នុង​ការ​បញ្ចេញ​មតិ​និង​បង្ហាញ​ពី​អ្វី​ដែល​ខ្លួន​ចង់​បាន​ក្តី តែ​កម្រិត​និង​ការ​ផ្លាស់​ប្តូរ ដែល​ពួក​គេ​ចង់​បាន​គឺ​នៅ​មាន​កំណត់​ដោយ​សារ​តែ​ភាគ​ច្រើន​យុវជន​ទាំង​នោះ​មិន​មាន​លទ្ធភាព​និង​ឱកាស​ពេញ​លេញ​ក្នុង​ការ​បង្ហាញ​ពី​សមត្ថភាព​របស់​ខ្លួន។

លោក​បន្ត​ថា បញ្ហា​ប្រឈម​របស់​យុវជន​ក្នុង​ការ​ផ្លាស់​ប្តូរ​គឺ​ដោយ​សារ​ការ​កំណត់​ទិស​ដៅ​និង​ទស្សន​វិស័យ​មិន​ច្បាស់​លាស់។

លោក អ៊ូ វីរៈ បញ្ជាក់​ថា៖ «ខ្ញុំ​ចាប់​អារម្មណ៍​ឃើញ​កាល​ពី ១ ឆ្នាំ​មុន យុវជន​ចាប់​ផ្តើម​ប្រើ​ប្រាស់ Facebook ហើយ​ហ៊ាន​បង្ហាញ​សកម្មភាព និង​ទស្សនៈ​របស់​ខ្លួន តែ​ពួក​គេ​ហាក់​ជឿ​លើ​ព័ត៌មាន​ទាំង​នោះ​ពេក។ ក្រោយ​មក ខ្ញុំ​ឃើញ​ថា ពួក​គេ​ចាប់​ផ្តើម​ងឿង​ឆ្ងល់​លើ​ព័ត៌មាន ដែល​ទទួល​បាន​ខុសៗ​គ្នា និង​បាន​ចាប់​ផ្តើម​សិក្សា​បន្ថែម​លើ​បញ្ហា​ទាំង​នោះ»។

កញ្ញា ជេស៊ីកា ឃីហ្គេន នាយក​កម្មវិធី​អង្គការ (IRI) ប្រចាំ​កម្ពុជា បាន​ថ្លែង​ដោយ​ផ្អែក​លើ​ការ​ស្រាវជ្រាវ​ថា ការ​ចូល​រួម​របស់​យុវជន​ក្នុង​កិច្ចការ​សង្គម ស្រប​តាម​លទិ្ធ​ប្រជាធិបតេយ្យ​បច្ចុប្បន្ន ប្រឈម​នឹង​ឧបសគ្គ​ច្រើន ដោយ​សារ​តែ​ឱកាស នៃ​ការ​កសាង​សមត្ថភាព ចំណេះ​ដឹង និង​ជំនាញ​របស់​ពួក​គេ នៅ​មាន​កម្រិត​ទាប ព្រោះ​ប្រព័ន្ធ​អប់រំ នៅ​កម្ពុជា នៅ​មាន​ភាព​ទន់​ខ្សោយ​ហើយ​អំពើ​ពុក​រលួយ បក្ខពួក​និយម នៅ​តែ​បន្ត​កើត​មាន។ ទន្ទឹង​នឹង​នេះ កញ្ញា​យល់​ថា ការ​មិន​យក​ចិត្ត​ទុក​ដាក់ របស់​ថ្នាក់​ដឹក​នាំ​ក្នុង​ការ​ផ្តល់​ឱកាស​ដល់​យុវជន ក្នុង​ការ​ចូល​រួម​ដោះ​ស្រាយ​បញ្ហា​ជាតិ ក៏​ជា​ផ្នែក​មួយ​ដែល​នាំ​ឲ្យ​យុវជន​មិន​អាច​ចូល​រួម​ចំណែក​ក្នុង​ការ​អភិវឌ្ឍ​ប្រទេស​ជាតិ​ផង​ដែរ។

សម្រាប់​នាយក​ប្រតិបត្តិ​ស្តីទី នៃ​ក្រុម​ប្រឹក្សា​យុវជន​កម្ពុជា លោក គួយ គឹមរើន បាន​ថ្លែង​ថា យុវជន​ក៏​មាន​តួនាទី​សំខាន់​ផង​ដែរ​ក្នុង​កិច្ច​ការងារ​នយោបាយ ជា​ពិសេស​កិច្ចការ​កម្រិត​ថ្នាក់ ឃុំ សង្កាត់ ដើម្បី​រួម​ចំណែក​ក្នុង​ការ​អភិវឌ្ឍ​តាម​មូលដ្ឋាន៕

អត្ថបទគួរចាប់អារម្មណ៍