The Phnom Penh Post Search

Search form




Logo of Phnom Penh Post newspaper Phnom Penh Post - យុវជន​វាស់​ដី​ពុល​ចង្រិត​១៥​នាក់​ត្រូវ​បញ្ជូន​ទៅ​មន្ទីរ​ពេទ្យ

យុវជន​វាស់​ដី​ពុល​ចង្រិត​១៥​នាក់​ត្រូវ​បញ្ជូន​ទៅ​មន្ទីរ​ពេទ្យ

យុវជន​វាស់​ដី​ពុល​ចង្រិត​១៥​នាក់​ត្រូវ​បញ្ជូន​ទៅ​មន្ទីរ​ពេទ្យ

បាត់ដំបងៈក្រុម​យុវជន​ស្ម័គ្រ​ចិត្ត លោក​នាយក​រដ្ឋ​មន្ត្រី​ហ៊ុន​សែន និង​មន្ត្រី​ជំនាញ​ចំនួន ​១៥​នាក់ ក្នុង​ក្រុម​លេខ​ ៥៥ ដែល​បាន​ចុះ​បំពេញ​បេសកកម្ម​វាស់​វែង​ដី​ធ្លី ជូន​ប្រជា​ពលរដ្ឋ​នៅ​ឃុំ​បឹង​ប្រាំ ស្រុក​បវេល បាន​ពុល​ចង្រិត បណ្ដាល​ឲ្យ​ចុក​ពោះ​និង​ក្អួត​ចង្អោរ​យ៉ាង​ខ្លាំង​ត្រូវ​បញ្ជូន​ទៅ​មន្ទីរ ពេទ្យ​កាល​ពី​ព្រឹក​ម្សិលមិញ។

លោក​ម៉ូត ចំរើន នាយ​នគរបាល​ប៉ុស្តិ៍​ឃុំ​បឹង​ប្រាំ​បាន​ឲ្យ​ដឹង​ថា ក្រុម​យុវជន​ស្ម័គ្រចិត្ត​លោក​ហ៊ុន សែន ចំនួន ១០ នាក់ គ្រូ​ពេទ្យ ២​នាក់ អ្នក​បើក​បរ ២​ នាក់ ​និង​ចុង​ភៅ​ម្នាក់​ បាន​ពុល​ក្អួត​ចង្អោរ និង​ចុក​ពោះ​យ៉ាង​ខ្លាំង បន្ទាប់​ពី​ពួក​គេ​បាន​ទទួល​ទាន​សត្វ​ចង្រិត ខ្មុល និង​កន្តេះ​ឡង់​លីង។ លោក​បាន​បន្ត​ថា​៖«​ពួក​គេ​ត្រូវ​បាន​បញ្ជូន​ទៅ​មន្ទីរ​ពេទ្យ​បង្អែក​ខេត្ត​ បាត់ដំបង​ភ្លាមៗ ដើម្បី​ព្យាបាល»។

លោក មុត រី អាយុ ៣០ ឆ្នាំ ប្រធាន​ក្រុម​យុវជន​ស្ម័គ្រចិត្ត​លេខ ៥៥ ឲ្យ​ដឹង​ថា នៅ​ម៉ោង​ប្រហែល​ជា ៨ ព្រឹក មុន​ពេល​ចេញ​ទៅ​ធ្វើ​ការ​វាស់​វែង​ដី​ធ្លី​ជូន​ប្រជា​ពលរដ្ឋ ពួក​គេ​បាន​នាំ​គ្នា​​ហូប​ចង្រិត ខ្មុល និង​កន្តេះ​ឡង់ ដែល​ចុង​ភៅ​បាន​លីង​វា​លាយ​ជាមួយ​ស្លឹក​ខ្ទឹម។ លោក​បាន​ថ្លែង​ថា៖«យើង​មាន​ម្ហូប​គ្រប់​គ្រាន់ តែ​ចង្រិត​លីង​នោះ​មាន​ក្លិន​ឈ្ងុយ​គួរ​ឲ្យ​ចង់​ញ៉ាំ...ពួក​គេ​បាន​ហូប​វា។ ក្រោយ​ពី​ហូប​រួច​បាន​ប្រមាណ ១៥ ​នាទី​ពួក​គេ​ក៏​ពុល ក្អួត​ចង្អោរ និង​ចុក​ពោះ​តែ​ម្ដង​ លើក​លែង​តែ​ខ្ញុំ​ ដែល​មិន​បាន​ហូប​ចង្រិត​លីង​នោះ»។ លោក​មុត រី បន្ត​ថា បច្ចុប្បន្ន​ពួក​គេ មាន​អាការ​ធូរស្រាល​ឡើង​វិញ​ហើយ បន្ទាប់​ពី​បាន​សម្រាក​ព្យាបាល​នៅ​មន្ទីរ​ពេទ្យ​ធំ​ខេត្ត​បាត់ដំបង។

លោក បាន​ប្រាប់​ឲ្យ​ដឹង​ផង​ដែរ​ថា​ ក្រុម​របស់​លោក ​បាន​បំពេញ​បេសកកម្ម​វាស់​វែង​ដីធ្លី​ ជូន​ប្រជា​ពលរដ្ឋ​នៅ​ក្នុង​ឃុំ​បឹង​ប្រាំ ស្រុក​បវេល បាន​សម្រេច​ ៧៧ ភាគរយ លើ​ផ្ទៃ​ដី​ចំនួន​ ៣៦៣៨​ ហិកតា ហើយ​ក្រុម​នេះ​ នឹង​បញ្ចប់​បេសកកម្ម​របស់​ខ្លួន​ នៅ​ថ្ងៃ​ទី​ ២៨ ខែ​ធ្នូ​ខាង​មុខ​នេះ។ តែ​ទោះ​ជា​បែប​ណា​ក្ដី​ ក្រុម​យុវជន​ស្ម័គ្រចិត្ត​វគ្គ​ទី ២ នឹង​ចូល​មក​ជំនួស ដើម្បី​ធ្វើ​ការ​វាស់​វែង​ដីធ្លី​ ជូន​ប្រជា​ពលរដ្ឋ​ក្នុង​តំបន់​នេះ​ជា​បន្ត​ទៀត។

ក្រុម​យុវជន​ដែល បង្កើត​ឡើង​ដោយ​លោក​នាយក​រដ្ឋ​មន្ត្រី​ ហ៊ុន​សែន ប្រមាណ​ជាង ២ ពាន់​នាក់ កំពុង​ចុះ​វាស់​ដី​ ចែក​ជូន​ប្រជា​ពលរដ្ឋ នៅ​តាម​តំបន់​ជាច្រើន នៅ​ទូទាំង​ប្រទេស៕

អត្ថបទគួរចាប់អារម្មណ៍