.jpg)
កោះកុងៈ នគរបាលក្រុងខេមរភូមិន្ទបានបញ្ជូនក្មេងប្រុសម្នាក់ទៅស្នងការដ្ឋាននគរបាលខេត្តកោះកុងកាលពីរសៀលម្សិលមិញ ក្រោយពីចាប់ខ្លួនបានពេលជនសង្ស័យកំពុងលាក់ខ្លួននៅភូមិតាចាប ឃុំទួលគគីរ ស្រុកមណ្ឌលសីមា បន្ទាប់ពីសម្លាប់ក្មេងរងគ្រោះកាលពីថ្ងៃទី ១២ ខែឧសភាឆ្នាំ ២០១៨ កន្លងមកនេះ។
លោក ង៉ែត សុវណ្ណារ៉ា អធិការរងនគរបាលក្រុងខេមរភូមិន្ទបានប្រាប់ឲ្យដឹងថា មុនចាប់ខ្លួនសមត្ថកិច្ចបានប្រើពេលអស់ ៣ ថ្ងៃដើម្បីស្រាវជ្រាវរកកន្លែងលាក់ខ្លួនរបស់ជនសង្ស័យ ហើយក៏មានការសហការជាមួយម្តាយឪពុកជនសង្ស័យដែរ។
លោកប្រាប់ថា៖ «ជនសង្ស័យបានសារភាពប្រាប់សមត្ថកិច្ចខ្ញុំថា គេចាក់សម្លាប់ជនរងគ្រោះ ព្រោះខឹងជនរងគ្រោះមានគ្នា ៥-៦ នាក់ព្រួតគ្នាវាយលើរូបគេ ខណៈរូបគេកំពុងហូបប្រហិតចៀន ហើយចៃដន្យឃើញកាំបិតទុកនៅក្រោមតុក៏យកទៅចាក់ជនរងគ្រោះទៅ»។
លោកប្រាប់បន្តថាជនសង្ស័យក្រោយពីចាប់ខ្លួនបានកម្លាំងរបស់លោកបានធ្វើកំណត់ហេតុ និងចាប់បញ្ជូនបន្តទៅស្នងការដ្ឋាននគរបាលខេត្តនៅរសៀលនេះ (ថ្ងៃអង្គារ) ដើម្បីឲ្យសមត្ថកិច្ចជំនាញសាកសួរបន្តទៀត។
គួររំឭកថាជនសង្ស័យក្នុងឃាតកម្មនេះឈ្មោះ នួន សុខណា អាយុ ១៥ ឆ្នាំមានលំនៅក្នុងភូមិ ២ សង្កាត់ដងទង់ ក្រុងខេមរភូមិន្ទ មានមុខរបរជាជាងធ្វើគ្រឿងសង្ហារិមស្នាក់នៅផ្ទះជួល។ រីឯក្មេងរងគ្រោះឈ្មោះ ចាន់ ហាក់ អាយុ ១២ ឆ្នាំ ឈប់រៀននៅថ្នាក់បឋមសិក្សា និងមានលំនៅឋានក្នុងភូមិទី ៤ សង្កាត់ ដងទង់ ក្រុងខេមរភូមិន្ទខេត្តកោះកុង។
លោក សុវណ្ណារ៉ា បានប្រាប់តាមសម្តីសាក្សីដែលបានឃើញនៅកន្លែងកើតហេតុថា ការចាក់សម្លាប់គ្នានេះកើតឡើងនៅវេលាម៉ោង ១៩ និង ២០ នាទីនៅតាមផ្លូវបេតុងត្រង់ចំណុចប្រសព្វគ្នាជាមួយភូមិលេខ ៤ និងភូមិលេខ ២ ក្នុងសង្កាត់ដងទង់។ ក្រោយពីនគរបាលធ្វើកោសល្យវិច័យបង្ហាញថា នៅលើខ្លួនសាកសពក្មេងរងគ្រោះមានស្នាមចាក់ត្រូវ ២ កាំបិតដោយ ១ កាំបិតត្រូវពោះខាងឆ្វេង និង ១ កាំបិតទៀតត្រូវចំដោះខាងឆ្វេង។
ពាក់ព័ន្ធនឹងអាយុនៃការទទួលខុសត្រូវផ្នែកព្រហ្មទណ្ឌនោះត្រូវបានលោក មេធាវី យុង ផានិត ជាអនុប្រធាននាយកដ្ឋានការពារក្តីជូនជនក្រីក្របានប្រាប់ថា ចំពោះក្មេងបង្កបទឧក្រិដ្ឋនោះតាមផ្លូវច្បាប់គឺគិតពីអាយុ។ បានន័យថា បើក្មេងនោះអាយុក្រោម ១៤ ឆ្នាំហើយប្រព្រឹត្តបទល្មើសចាក់គេស្លាប់គឺច្បាប់ចែងថា គាត់មិនអាចទទួលខុសត្រូវផ្នែកព្រហ្មទណ្ឌបានទេ។ ប៉ុន្តែបើក្មេងនោះមានអាយុលើស ១៤ ឆ្នាំគឺគាត់ត្រូវតែប្រឈមចំពោះមុខច្បាប់ ប៉ុន្តែច្បាប់ចែងថា ជនល្មើសមានអាយុក្រោម ១៨ ឆ្នាំគឺទោសស្មើតែពាក់កណ្តាលនៃមនុស្សពេញវ័យប៉ុណ្ណោះ៕
