ភ្នំពេញៈ រដ្ឋាភិបាលអាណត្តិថ្មីដែលចេញរូបរាងថ្ងៃនេះត្រូវបានបញ្ចូលឈាមថ្មី ដែលជាយុវជនក្នុងចំនួនច្រើន ដើម្បីកាន់ការងារក្នុងជួរថ្នាក់ដឹកនាំក្រសួង ស្ថាប័ននានា ខណៈសមាជិករដ្ឋាភិបាលត្រូវបានកំណត់ចាប់ពីរដ្ឋមន្ត្រីដល់ឧបនាយករដ្ឋមន្ត្រីក្រោមការដឹកនាំរបស់នាយករដ្ឋមន្ត្រី ហើយរដ្ឋមន្ត្រី និងទេសរដ្ឋមន្ត្រីដែលជាប់ឆ្នោតជាសមាជិករដ្ឋសភានោះត្រូវលាលែងទៅធ្វើជាសមាជិករដ្ឋាភិបាល។
ប៉ុន្តែអ្វីដែលគេទន្ទឹងរង់ចាំចង់ដឹងបំផុតនោះ គឺឈាមចាស់ និងឈាមថ្មី (រដ្ឋមន្ត្រី) ដែលត្រូវតែងតាំងឲ្យកាន់តំណែងជាថ្នាក់ដឹកនាំតាមស្ថាប័ននីមួយៗនៃរដ្ឋាភិបាលថ្មីដែរនេះជានរណា? មានសមាសភាពមកពីណា? ហើយឈាមចាស់នៅសល់ប៉ុន្មាន? និងឈាមថ្មីមកជំនួសមានចំនួនប៉ុន្មាន?។
ទោះជាយ៉ាងណា បញ្ជីឈ្មោះនៃឥស្សរជនជាថ្នាក់ដឹកនាំស្ថាប័នទាំងនោះមិនត្រូវបានទម្លាយឲ្យដឹងឡើយគិតត្រឹមល្ងាចម្សិលមិញ ប៉ុន្តែការទន្ទឹងរង់ចាំយ៉ាងអន្ទះសាររបស់អ្នកដែលចង់ដឹងគឺនឹងត្រូវមកដល់នាថ្ងៃនេះហើយ។
មន្ត្រីនាំពាក្យគណបក្សប្រជាជនកម្ពុជាលោក សុខ ឥសាន ប្រាប់ភ្នំពេញប៉ុស្តិ៍ ពីម្សិលមិញថាសម្រាប់រាជរដ្ឋាភិបាលថ្មីដែលកើតឡើងថ្ងៃនេះមិនមានបុគ្គលណាមួយដឹងអំពីបញ្ជីឈ្មោះមន្ត្រីជាន់ខ្ពស់ជាសមាជិករាជរដ្ឋាភិបាលដែលមានឋានៈចាប់ពីរដ្ឋមន្ត្រីរហូតដល់ឧបនាយករដ្ឋមន្ត្រី និងមន្ត្រីដែលមិនមែនជាសមាជិករដ្ឋាភិបាលមានឋានៈចាប់ពីអនុរដ្ឋលេខាធិការដល់រដ្ឋលេខាធិការក្នុងអាណត្តិថ្មីនេះជាបុគ្គល ឬសមាសភាពណាខ្លះនោះទេ ក្រៅតែពីនាយករដ្ឋមន្ត្រី ហ៊ុន សែន ដែលកាន់បញ្ជីឈ្មោះនេះ។
ប៉ុន្តែលោក ឥសាន បញ្ជាក់ថាយុវជនជំនាន់ក្រោយជាច្រើននឹងត្រូវដាក់ឲ្យកាន់ការងារក្នុងជួរថ្នាក់ដឹកនាំតាមក្រសួង ឬស្ថាប័នក្នុងរដ្ឋាភិបាលអាណត្តិថ្មីនេះក្នុងមុខតំណែងជារដ្ឋមន្ត្រី រដ្ឋលេខាធិការ និងអនុរដ្ឋលេខាធិការ ប៉ុន្តែតំណែងជារដ្ឋលេខាធិការ និងអនុរដ្ឋលេខាធិការនឹងត្រូវតែងតាំងជាបន្តបន្ទាប់ ក្រោយពីសមាជិករដ្ឋាភិបាលត្រូវបានប្រកាសថ្ងៃនេះ។
លោក ឥសាន ថ្លែងថា៖ «[ការដាក់បញ្ចូលយុវជនច្រើន] អាហ្នឹងវាច្បាស់ហើយ [យើង] ដាក់បន្តឲ្យមាននិរន្តរភាពនៃការដឹកនាំគ្រប់គ្រង។ ទោះបីរដ្ឋមន្ត្រីដែលនឹងមានអនុម័តហ្នឹងក៏មានអ្នកវ័យក្មេងចូលដែរ មិនមែនអត់ទេ»។
ទោះជាយ៉ាងណាលោក សុខ ឥសាន បន្ថែមថាលោកមិនបានដឹងថាមានចំនួនប៉ុន្មាន ឬប៉ុន្មានភាគរយនៃយុវជនដែលនឹងត្រូវដាក់បញ្ចូលឲ្យកាន់ការងារក្នុងជួរថ្នាក់ដឹកនាំនោះទេ។
ដោយឡែកសម្រាប់តំណែងជាសមាជិករដ្ឋសភាក្នុងអាណត្តិទី ៦ នេះលោក ឥសាន បញ្ជាក់ថា ឥស្សរជនណាដែលមានតំណែងជាទេសរដ្ឋមន្ត្រី ហើយជាប់ឆ្នោតជាតំណាងរាស្ត្រ ឬ សមាជិករដ្ឋសភានោះ ពួកគេត្រូវតែលាលែងពីតួនាទីជាតំណាងរាស្ត្រក្នុងស្ថាប័ននីតិប្បញ្ញត្តិទៅបម្រើការងារក្នុងតំណែងជាទេសរដ្ឋមន្ត្រីក្នុងនីតិប្រតិបត្តិ។ ពួកគេមិនអាចបម្រើការនៅក្នុងស្ថាប័នរដ្ឋសភាផង និងរដ្ឋាភិបាលផងដូចក្នុងអាណត្តិមុនៗបានឡើយ។
លោកបន្ថែមថា៖ «ឥឡូវក្នុងជួររដ្ឋាភិបាលមានតែថ្នាក់ឧបនាយករដ្ឋមន្ត្រីធ្វើឧបនាយករដ្ឋមន្ត្រីផង ធ្វើតំណាងរាស្ត្រផង»។
ជាមួយគ្នានេះដែរអ្នកនាំពាក្យរដ្ឋាភិបាលលោក ផៃ ស៊ីផាន ឲ្យដឹងដែរថា ក្រោយពីគណៈរដ្ឋមន្ត្រីត្រូវបានរដ្ឋសភាបោះឆ្នោតអនុម័តគាំទ្រ និងចូលស្បថនៅចំពោះព្រះភក្ត្រ ព្រះមហាក្សត្រ ដើម្បីដំណើរការក្នុងអាណត្តិទី ៦ នាថ្ងៃនេះ តំណែងរដ្ឋលេខាធិការ និងអនុរដ្ឋលេខាធិការនឹងត្រូវលោកនាយករដ្ឋមន្ត្រី ហ៊ុន សែន ធ្វើបញ្ជីដើម្បីថ្វាយទៅព្រះមហាក្សត្រសុំព្រះរាជទាននូវព្រះហស្តលេខាដើម្បីដាក់បញ្ចូលពួកគេចូលបម្រើការងារក្នុងរដ្ឋាភិបាល។
លោក ស៊ីផាន បញ្ជាក់ខ្លីថា៖ «ទំនោររបស់រាជរដ្ឋាភិបាលថ្មីជាទំនោរបង្កើតនូវការបន្តវេន [ដូច្នេះ] ច្បាស់ជាមានឈាមថ្មីចូលច្រើន»។
យោងតាមប្រព័ន្ធផ្សព្វផ្សាយ Fresh News ចេញផ្សាយកាលពីសប្តាហ៍មុន ក៏បានបង្ហាញអំពីចក្ខុវិស័យរបស់លោកនាយករដ្ឋមន្ត្រី ហ៊ុន សែន ក្នុងការដាក់បញ្ចូលយុវជនទៅក្នុងជួរថ្នាក់ដឹកនាំក្នុងក្រសួង ឬ ស្ថាប័នផងដែរ ដើម្បីបន្តវេនរបស់គណបក្សប្រជាជនកម្ពុជាដោយថាលោក ហ៊ុន សែន ពិតជាបានគិតគូរយ៉ាងហ្មត់ចត់លើអ្នកបន្តវេនរបស់គណបក្សប្រជាជនកម្ពុជា សម្រាប់បច្ចុប្បន្ន និងទៅអនាគត។ តាមរយៈការយកចិត្តទុកដាក់ និងកំណើននៃធនធានមនុស្សជាយុវជនរបស់គណបក្សប្រជាជនកម្ពុជា យុវជនត្រូវបានរំពឹងថានឹងលេចមុខច្រើននៅក្នុងជួរថ្នាក់ដឹកនាំ កាន់តំណែងជារដ្ឋលេខាធិការ និងអនុរដ្ឋលេខាធិការនៅតាមក្រសួងនីមួយៗ។
ប៉ុន្តែប្រធានសមាគម ជយលាភី បញ្ញាជន កម្ពុជា និងជាអ្នកវិភាគ លោក រស់ សារ៉ុម ដែលថ្លែងតាមការកត់សម្គាល់ក្នុងអាណត្តិកន្លងមករបស់រដ្ឋាភិបាល ហាក់មិនរំពឹងថារដ្ឋាភិបាលថ្មីដែលបញ្ចូលឈាមថ្មីជាយុវជនចំនួនច្រើនឲ្យកាន់ការងារក្នុងជួរថ្នាក់ដឹកនាំនៃស្ថាប័ន ក្រសួងនានារបស់រដ្ឋាភិបាលនោះ អាចជួយរុញដំណើរការរីកចម្រើនរបស់ប្រទេសកម្ពុជាបានច្រើននោះទេ ដោយលោកថារដ្ឋាភិបាលបានប្រកាសកែទម្រង់តាំងពីអាណត្តិទី ៥ មកម្ល៉េះ ប៉ុន្តែមិនមានលទ្ធផលអ្វីជាដុំកំភួននោះឡើយ។
លោក សា រ៉ុម ថ្លែងថា៖ «ឈាមថ្មីដែលខ្ញុំមើលឃើញហ្នឹង វាអត់មានឈាមថ្មីណា ដែលក្រៅតែពីកូនរបស់ឥស្សរជនជាន់ខ្ពស់នៅក្នុងជួរគណបក្សប្រជាជន។ អ៊ីចឹងវាឈាមថ្មីដែរ ប៉ុន្តែឈាមពីឪទៅកូន។ ខ្ញុំមិនរើសអើងទេ សំខាន់សមត្ថភាពការអនុវត្តការងារជាក់ស្តែងឲ្យប្រជារាស្ត្រឃើញថា ខ្លួនពិតជាឈាមជ័រថ្មីហើយបង្កើតបាននូវសមិទ្ធផលថ្មី»៕