ក្រចេះ: យុវជន ១ ក្រុមឈ្មោះ អេកូយុវទូត (Young Eco Ambassador) ចំនួន ១៥ នាក់ បានចុះធ្វើទស្សនកិច្ចសិក្សានៅតំបន់ការពារសត្វផ្សោតក្នុងខេត្តក្រចេះរយៈពេល ៣ ថ្ងៃ ដើម្បីស្វែងយល់ពីកម្មវិធីអភិរក្សនានារបស់អង្គការ WWF និងវិធីសាស្ត្រធ្វើការងារក្នុងភាពជាដៃគូពហុភាគី។
លោក ទេព អស្នារិទ្ធ ប្រធានកិច្ចការសាធារណៈ និងគ្រប់គ្រងព័ត៌មាននៃអង្គការមូលនិធិសកលសម្រាប់អភិរក្សធម្មជាតិ (WWF) បានថ្លែងពីម្សិលមិញថា ក្រុមការងាររបស់អង្គការ WWF បានដឹកនាំក្រុមយុវជនអេកូយុវទូតទាំង ១៥ នាក់នេះទៅតំបន់ទេសភាពព្រៃលិចទឹកមេគង្គ។ ដំណើរទស្សនកិច្ចសិក្សានេះគឺដើម្បីស្វែងយល់ពីកម្មវិធីអភិរក្សរបស់ WWF និងវិធីសាស្ត្រធ្វើការងារក្នុងភាពជាដៃគូពហុភាគីជាមួយស្ថាប័នរដ្ឋាភិបាល ថ្នាក់ជាតិ អាជ្ញាធរ សហគមន៍តាមដងទន្លេមេគង្គយុវជន វិស័យឯកជន អង្គការដៃគូ និងភាគីពាក់ព័ន្ធនានា។
លោកបន្តថា ដំណើរទស្សនកិច្ចសិក្សានេះគិតចាប់ពីថ្ងៃទី ២៤ ដល់ថ្ងៃទី ២៦ ខែតុលា ដោយក្រុមយុវជនទទួលបានបទពិសោធផ្ទាល់ពីការត្រួតពិនិត្យតាមដានសត្វផ្សោតទន្លេមេគង្គ និងស្វែងយល់អំពីវិធីប៉ាន់ប្រមាណចំនួនសត្វផ្សោត។
លោកថា៖ «ក្រុមយុវជនបានជួបសំណេះសំណាលជាមួយមន្ត្រីពង្រឹងការអនុវត្តច្បាប់របស់រដ្ឋាភិបាលដែលប្រចាំការនៅអន្លង់ផ្សោតកាំពី ដើម្បីស្វែងយល់អំពីកិច្ចការរបស់ឆ្មាំទន្លេ លទ្ធផលការងារ និងបញ្ហាប្រឈម។ ពួកគាត់ចាប់អារម្មណ៍ខ្លាំងលើកិច្ចការដែលយើងកំពុងធ្វើនេះ»។
កញ្ញា វិន ពុទ្ធាលី មន្ត្រីទំនាក់ទំនងក្រុមយុវជនអេកូយុវទូតបានថ្លែងពីម្សិលមិញថា ដំណើរទស្សនកិច្ចសិក្សានេះត្រូវបានរៀបចំដោយអង្គការ WWF ដើម្បីផ្ដល់ឱកាសឱ្យក្រុមយុវជនស្វែងយល់ពីការអភិរក្សសត្វផ្សោត និងធនធានធម្មជាតិនានា។
កញ្ញា បន្តថា បន្ទាប់ពីបញ្ចប់ដំណើរទស្សនកិច្ចសិក្សានេះ ក្រុមយុវជននឹងប្រើប្រាស់ចំណេះដឹង និងបទពិសោធ ដើម្បីផ្សព្វផ្សាយបន្តទៅសាធារណជនតាមរយៈប្រព័ន្ធឌីជីថល។ ការផ្សព្វផ្សាយនេះក្នុងបំណងផ្តល់ព័ត៌មានដល់យុវជនកម្ពុជាទូទៅអំពីស្ថានភាពសត្វផ្សោតទន្លេមេគង្គ និងជំរុញឱ្យចូលរួមការពារសត្វផ្សោតដែលនៅសល់ក្នុងទន្លេកុំឱ្យផុតពូជ។
កញ្ញា វិន ពុទ្ធាលី បញ្ជាក់ថា៖ «ដំណើរទស្សនកិច្ចសិក្សានេះ ពួកខ្ញុំបានទទួលចំណេះដឹងច្រើនពីមន្ត្រី WWF និងអាជ្ញាធរដែលពួកគាត់បានធ្វើបទបង្ហាញពីកិច្ចការអភិរក្ស និងផលប៉ះពាល់នានា។ កិច្ចការបន្តទៀត គឺពួកខ្ញុំនឹងចងក្រងជាមាតិកាសំខាន់ៗ ឬចងក្រងរូបភាព និងវីដេអូផ្សព្វផ្សាយ ដើម្បីបំផុសគំនិតឱ្យចូលរួមការពារបរិស្ថាន និងការពារអភិរក្សជីវចម្រុះផងដែរ»។
នៅពេលទាក់ទងទៅកាន់លោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះពីម្សិលមិញដើម្បីសុំអត្ថាធិប្បាយបន្ថែមពីការងារអភិរក្សសត្វផ្សោតនេះលោកបានថ្លែងថា កំពុងជាប់រវល់ប្រជុំមិនអាចនិយាយទូរស័ព្ទបានទេ។
ក៏ប៉ុន្តែតាមរបាយការណ៍នៃការតាមដានសត្វផ្សោតទន្លេមេគង្គឆ្នាំ ២០២០ របស់អង្គការ WWF ដែលបានបង្ហាញក្នុងទិវាអន្តរជាតិនៃសត្វផ្សោតទឹកសាបនៅថ្ងៃ ២៤ ខែតុលាថា អ្នកវិទ្យាសាស្ត្របានប៉ាន់ប្រមាណថា មានសត្វផ្សោតតែ ៨៩ ក្បាលប៉ុណ្ណោះកំពុងរស់នៅក្នុងទន្លេមេគង្គកម្ពុជាដែលជាចំនួនថេរ បន្ទាប់ពីបានធ្លាក់ចុះក្នុងប៉ុន្មានទសវត្សរ៍កន្លងទៅនេះ។
រដ្ឋបាលជលផល និង WWF បានអំពាវនាវឱ្យមានការអនុវត្តសកម្មភាព និងវិធានការរួមគ្នាជាបន្ទាន់បន្ថែមទៀតពីស្ថាប័នរាជរដ្ឋាភិបាលកម្ពុជាដែលពាក់ព័ន្ធ សហគមន៍ និងពីសំណាក់ដៃគូបច្ចុប្បន្ន និងដៃគូផ្សេងទៀតនៅថ្ងៃអនាគត៕