.jpg)
គ្រូពេទ្យព្យាបាលអ្នកជំងឺដែលបរិភោគត្រសក់ពុល។ រូបថត សហការី
បន្ទាយមានជ័យ: លោក អាត់ ខែម ស្នងការនគរបាលខេត្តបន្ទាយមានជ័យបានប្រាប់ភ្នំពេញប៉ុស្ដិ៍ពីម្សិលមិញថាយុវជន ២ នាក់ស្លាប់ និង ២៤៣ នាក់ កំពុងសម្រាកព្យាបាល អាការក្អួតចង្អោរ រាករូស ថប់ដង្ហើម វិលមុខ ទន់សន្លាក់ដៃជើង ក្រោយពីពួកគេបរិភោគផ្លែត្រសក់ខ្ចីដោយសង្ស័យថាមានសារធាតុគីមីថ្នាំសម្លាប់សត្វល្អិតដែលបានប្រើទៅលើបន្លែត្រសក់នោះមិនទាន់អស់សុពលភាពជាតិថ្នាំ។ ផ្លែត្រសក់ខ្ចីទាំងនោះត្រូវបានគេយកមកធ្វើម្ហូបកាលពីថ្ងៃទី ៣០ ខែ វិច្ឆិកា ឆ្នាំ ២០១៩។
យុវជនទាំងនោះកំពុងស្នាក់នៅក្នុងមជ្ឈមណ្ឌលជីវិតថ្មីភ្នំបាក់ស្ថិតក្នុងភូមិភ្នំបាក់ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ដើម្បីព្យាបាលសារធាតុគ្រឿងញៀនដែលក្នុងមជ្ឈមណ្ឌលនោះមានយុវជន-យុវនារីសរុបចំនួនជាង ៨០០ នាក់ កំពុងត្រូវបានធ្វើការអប់រំ កែប្រែ ដោយសារឥទ្ធិពលគ្រឿងញៀន។
លោក អាត់ ខែម បានឲ្យដឹងថា យុវជន-យុវនារីទាំង ២៤៣ នាក់នោះ បាននិងកំពុងសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យមួយចំនួន ហើយខ្លះទៀតបានសម្រាកព្យាបាលនៅក្នុងមណ្ឌលកែប្រែផ្ទាល់ (ចំពោះអ្នកស្រាល) និងក្រុមគ្រួសារយកទៅព្យាបាលនៅប្រទេសថៃម្នាក់។
លោក ខែម ថ្លែងថា៖ «ករណីនេះសមត្ថកិច្ចបានធ្វើការស្រាវជ្រាវច្បាស់លាស់ហើយ ដែលបណ្ដាលមកពីពួកគាត់បានបរិភោគបន្លែត្រសក់ដែលបានទិញពីអ្នកភូមិក្បែរនោះ។ ឥឡូវនេះ យើងបានជួយសង្គ្រោះគាត់បានច្រើនហើយ ដោយមួយចំនួនទៀតនៅមានស្ថានភាពធ្ងន់ធ្ងរ ប៉ុន្ដែគ្រូពេទ្យជំនាញយើងបានយកចិត្តទុកដាក់តាមដានស្ថានភាពជំងឺគាត់ហើយ»។
លោក ស្នងការ អះអាងថាផ្លែត្រសក់ខ្ចីនោះចុងភៅមជ្ឈមណ្ឌលគាត់តែងតែទិញពីអ្នកភូមិក្បែរនោះ ដូច្នេះប្រហែលជាអ្នកដាំនៅក្នុងភូមិនោះគាត់ប្រើថ្នាំសម្លាប់សត្វល្អិតច្រើនពេកបានជាពុលបែបនេះ។
លោក កែវ សុភ័ក្ត្រា ប្រធានមន្ទីរសុខាភិបាលខេត្តបន្ទាយមានជ័យបានថ្លែងពីម្សិលមិញថា រហូតមកដល់ថ្ងៃទី ២ ខែធ្នូនេះ ស្ថានភាពជំងឺយុវជនដែលពុលផ្លែត្រសក់នោះមានអាការធូរស្រាលឡើងវិញហើយប្រមាណជាង ៧០ ភាគរយ នៃចំនួនសរុប ២៤៣ នាក់ ដោយក្រុមគ្រូពេទ្យជំនាញបាននិងកំពុងយកចិត្តទុកដាក់បន្តតាមដានស្ថានភាពអាការរបស់ពួកគាត់ទៀត។
យុវជនដែលមានអាការធ្ងន់ធ្ងរត្រូវបានសមត្ថកិច្ចជួយបញ្ជូនមកសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យ រីឯអ្នកដែលមានស្ថានភាពស្រាលៗ ត្រូវបានគ្រូពេទ្យជំនាញទៅព្យាបាលនៅក្នុងមជ្ឈមណ្ឌលនោះផ្ទាល់ដោយបានដាក់សេរ៉ូម ចាក់ថ្នាំ និងតាមដានសុខភាពបន្តទៀត។
លោក សុភ័ក្ត្រា ថ្លែងថា៖ «យើងអត់មានកត់សម្គាល់ ឬសង្ស័យអ្វីផ្សេងទៀត ក្រៅពីពួកគាត់បានបរិភោគផ្លែត្រសក់នោះទេ ព្រោះចុងភៅគាត់បានទិញត្រសក់ពីអ្នកភូមិ មកធ្វើជាម្ហូបអាហារប្រចាំថ្ងៃសម្រាប់ពួកគាត់ទាំងជាង ៨០០ នាក់ហូប ប៉ុន្ដែក្នុងនោះមានអ្នកហូបតិច និងហូបច្រើន។ អ៊ីចឹងបានជាមានអ្នកខ្លះអាការស្រាលៗ និងខ្លះទៀតអាការធ្ងន់ធ្ងរ»។
លោក តូច ចាន់នី អ្នកនាំពាក្យ និងជាអគ្គនាយកនៃអគ្គនាយកដ្ឋានបច្ចេកទេសក្រសួងសង្គមកិច្ច អតីតយុទ្ធជន និងយុវនីតិសម្បទាបានថ្លែងថា៖ «យើងចូលរួមសោកស្ដាយចំពោះអ្នកបាត់បង់ជីវិត ២ នាក់ ហើយអ្នកផ្សេងទៀតគឺពួកគាត់បានធូរស្បើយហើយ ប៉ុន្ដែនៅមាន ៣ នាក់ទៀត គាត់មិនទាន់បានធូរច្រើនទេ គឺនៅរវើរវាយ គាត់មិនទាន់វិលមករកភាពដើមវិញ។ អ៊ីចឹងពួកគាត់នឹងត្រូវបន្តតាមដានស្ថានភាពជំងឺគាត់ទៀត»។
លោក ស៊ុំ ចន្ទគា មន្ត្រីសម្របសម្រួលផ្នែកសិទ្ធិមនុស្សអាដហុកប្រចាំខេត្តបន្ទាយមានជ័យបានបង្ហាញការព្រួយបារម្ភចំពោះការទិញបន្លែ ផ្លែឈើពីទីផ្សារមានប្រភពមិនច្បាស់លាស់មកបរិភោគ ជាពិសេសបន្លែដែលប្រើប្រាស់នៅក្នុងមជ្ឈមណ្ឌលកែប្រែ និងពន្ធនាគារមួយចំនួនទៀត។ ដោយអ្នកទិញបន្លែ ផ្លែឈើ ពិបាកនឹងកត់សម្គាល់រកបន្លែគ្មានជាតិពុល និងបន្លែមានជាតិពុល។ បន្លែ ផ្លែឈើដែលនាំចូលពីបរទេសភាគច្រើនត្រូវបានគេរកឃើញថា មានផ្ទុកសារធាតុគីមីច្រើន។
ដូច្នេះអ្នកទិញយកទៅប្រើប្រាស់ ឬបរិភោគត្រូវតែប្រុងប្រយ័ត្នឲ្យបានខ្ពស់ «នៅតាមពន្ធនាគារ ឬមជ្ឈមណ្ឌលកែប្រែមួយចំនួន មិនគិតពីសុវត្ថិភាពចំណីអាហារទេ គឺគាត់គិតតែអ្វីចំណេញ ចំណាយលុយតិច បានទំនិញច្រើន។ គាត់គិតតែរឿងចំណេញបែបនេះគឺនឹងមានអ្នករងគ្រោះបន្ថែមទៀត»។
តាមរបាយការណ៍របស់អគ្គស្នងការដ្ឋាននគរបាលជាតិបានឲ្យដឹងថា កាលពីថ្ងៃទី ៣០ ខែវិច្ឆិកា មានម៉ូយបន្លែដែលតែងទិញយកមកស្លហូបប្រចាំថ្ងៃនោះ បានដឹកបន្លែយកមកឲ្យដល់មជ្ឈមណ្ឌលដូចសព្វមួយដង។ លើសពីនេះ អ្នកលក់បន្លែបានថែមផ្លែត្រសក់ខ្ចីឲ្យប្រមាណជា ៤ ថង់ (មិនគិតលុយ)។
ពេលនោះមានក្រុមយុវជនជាជនរងគ្រោះបាននាំគ្នាយកមកហូបឆៅជ្រលក់ជាមួយអំបិលម្ទេសញ៉ាំហើយខ្លះបានលាងទឹក និងខ្លះក៏អត់លាងទឹក។ ក្រោយពីហូបរួចនៅយប់នោះមានអ្នករាក ក្អួតចង្អោរ និងទន់ដៃជើងជាបណ្ដើរៗរហូតដល់រសៀលថ្ងៃទី ១ ខែ ធ្នូ ឆ្នាំ ២០១៩ ហើយលោក អាត់ ខែម បានបញ្ជាឲ្យកម្លាំងនគរបាលនាំយករថយន្តមកជួយដឹកជញ្ជូនទៅព្យាបាលនៅមន្ទីរពេទ្យបង្អែកខេត្តដោយក្នុងថ្ងៃទី ១ ខែធ្នូ នោះ ចំនួន ៧៣ នាក់ (ស្រី ១៣ នាក់) ខណៈយុវជនម្នាក់បានស្លាប់តាមផ្លូវទៅមន្ទីរពេទ្យ។ ដោយរហូតមកដល់រសៀលថ្ងៃទី ២ ខែធ្នូនេះ កើនឡើងដល់ ២៤៥ នាក់ ក្នុងនោះមានយុវជនស្លាប់ម្នាក់បន្ថែមទៀត៕
