.jpg)
ជនដៃដល់ និងដាវដែលបានប្រើកាប់ទៅលើយុវជនម្នាក់ដាច់ដៃម្ខាងកាលពីយប់ថ្ងៃទី ១៦ មីនា។ រូបថត នគរបាល
បន្ទាយមានជ័យ៖ យុវជន ៥ នាក់ ក្នុងចំណោមគ្នា ៧ នាក់ ត្រូវបានកម្លាំងនគរបាលស្រុកមង្គលបុរី ចាប់ឃាត់ខ្លួនភ្លាមៗ ក្រោយពីធ្វើសកម្មភាពលួចកាប់ប្រហារទៅលើយុវជនវ័យ ១៥ ឆ្នាំម្នាក់ បណ្ដាលឲ្យរងរបួសដាច់ដៃម្ខាងកាលពីវេលាម៉ោង ៨ យប់ថ្ងៃទី ១៦ ខែ មីនា ឆ្នាំ ២០២០។
លោក លី ឈុនគង់ អធិការរងស្រុកមង្គលបុរីបានប្រាប់ភ្នំពេញប៉ុស្តិ៍នៅថ្ងៃអង្គារថា នៅវេលាម៉ោង ៨ យប់ថ្ងៃទី ១៦ ខែ មីនា ឆ្នាំ ២០២០ មានអំពើហិង្សាមួយដែលបង្កឡើងដោយយុវជន ១ ក្រុមមានគ្នា ៧ នាក់ ព្រួតគ្នាលួចកាប់ប្រហារទៅលើយុវជនម្នាក់ឈ្មោះដេត វណ្ណលីដា អាយុ ១៥ ឆ្នាំ រស់នៅភូមិបោះឡោក ឃុំសឿ ស្រុកមង្គលបុរី ដែលកំពុងជិះម៉ូតូម្នាក់ឯងនៅតាមដងផ្លូវមុខផ្សារ ហ៊ុយ ឡេង បណ្ដាលឲ្យរងរបួសដាច់ដៃស្ដាំម្ខាង បង្កឲ្យមានការភ្ញាក់ផ្អើលដល់អ្នកភូមិ និងសមត្ថកិច្ច។
លោក ឈុនគង់ និយាយថា ខណៈក្រុមអ្នកភូមិ និងសមត្ថកិច្ចមួយចំនួនកំពុងនាំគ្នាជួយអន្តរាគមន៍នាំជនរងគ្រោះទៅមន្ទីរពេទ្យ ដើម្បីព្យាបាលរបួស ក្រុមជនសង្ស័យបានរត់គេចខ្លួន ប៉ុន្តែត្រូវបានកម្លាំងសមត្ថកិច្ចឃុំសឿស្ទាក់ចាប់បានភ្លាមៗ ៥ នាក់ ចំណែក ២ នាក់ទៀតរត់គេចខ្លួន។
បើតាមលោក ឈុនគង់ ករណីប្រើអំពើហិង្សានេះ គឺផ្ដើមចេញពីរឿងបងប្រុសរបស់ជនរងគ្រោះ ទៅញ៉ែស្រីប៉ះចំស្រីស្នេហ៍របស់មិត្តភក្ដិក្រុមជនដៃដល់ ដែលបង្កឲ្យមានភ្លើងគំនុំកើតឡើង។
លោក ឈុនគង់ បញ្ជាក់ថា៖ «នៅចំពោះមុខសមត្ថកិច្ចជនសង្ស័យម្នាក់ឈ្មោះ ផាន់ ជីវ៉ា បានសារភាពថា ពួកគេគ្មានបំណងកាប់ជនរងគ្រោះទេ តែមានបំណងកាប់បងប្រុសរបស់ជនរងគ្រោះ ដែលបានញ៉ែស្រីជាសង្សាររបស់ពួកម៉ាករបស់ពួកគេ។ លុះប្រទះឃើញម៉ូតូជនរងគ្រោះ នឹកស្មានតែបងប្រុសជនរងគ្រោះជាអ្នកជិះក៏នាំគ្នាជិះម៉ូតូតាមកាប់តែម្តងទៅ ព្រោះជនរងគ្រោះមានរូបរាងស្រដៀងគ្នានឹងបងប្រុសរបស់គេ»។
លោក ឈុនគង់ បានប្រាប់ឲ្យដឹងទៀតថា នៅពេលនេះជនរងគ្រោះកំពុងស្ថិតនៅក្រោមការព្យាបាលពីក្រុមគ្រូពេទ្យជំនាញនៃមន្ទីរពេទ្យមិត្តភាពកម្ពុជា-ជប៉ុន មង្គលបុរី។ ចំណែកក្រុមជនសង្ស័យទាំង ៥ នាក់ ត្រូវបានសមត្ថកិច្ចកសាងសំណុំរឿងចោទប្រកាន់ពីបទប៉ុនប៉ងមនុស្សឃាតដោយចេតនា និងគ្រោងបញ្ជូនពួកគេរួមទាំងវត្ថុតាងដាវសាមូរ៉ៃចំនួន ២ ដើម ទៅកាន់តុលាការខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់។ ដោយឡែកជនសង្ស័យ ២ នាក់ទៀត ដែលកំពុងរត់គេចខ្លួននោះ សមត្ថកិច្ចកំពុងបន្តតាមស្វែងរកចាប់ខ្លួនបញ្ជូនឲ្យតុលាការផ្ដន្ទាទោសទៅតាមផ្លូវច្បាប់ផងដែរ។
យោងតាមរបាយការណ៍របស់នគរបាលឃុំសឿ ដែលភ្នំពេញប៉ុស្តិ៍ទទួលបាននៅរសៀលថ្ងៃអង្គារជនដៃដល់ដែលបានកាប់ប្រហារលើជនរងគ្រោះបណ្ដាលឲ្យដាច់ដៃស្ដាំម្ខាងត្រឹមកំភួនដៃជ្រុះដល់ដីនោះ ឈ្មោះ ផាន់ ធីវ៉ា អាយុ ២២ ឆ្នាំ មានលំនៅភូមិជួរខ្ចាស់ ឃុំចំណោម ស្រុកមង្គលបុរី។ ចំណែកជនសង្ស័យ មាស យ៉ត អាយុ ១៨ ឆ្នាំ ជាមេខ្លោងបានញុះញង់ឲ្យជនដៃដល់ និងបក្ខពួក ៦ នាក់ ធ្វើសកម្មភាពកាប់ប្រហារទៅលើជនរងគ្រោះ ដោយនឹកស្មានតែជនរងគ្រោះជាមនុស្ស ដែលបានទៅញ៉ែស្រីជាសង្សារបស់ខ្លួន៕
