The Phnom Penh Post Search

Search form




Logo of Phnom Penh Post newspaper Phnom Penh Post - យុវជន CPP៖ កុំ​យក​មេឃុំ​ប្រូ មក​ដូរ​មេឃុំ​ពិត




យុវជន CPP៖ កុំ​យក​មេឃុំ​ប្រូ មក​ដូរ​មេឃុំ​ពិត

Content image - Phnom Penh Post
ពាក្យ​ស្លោក​គណបក្ស​សង្គ្រោះ​ជាតិ​ដែល​ធ្វើឲ្យ​គណបក្ស​ប្រជាជន​ខឹង​។ រូបថត​ហ្វេសប៊ុក

យុវជន CPP៖ កុំ​យក​មេឃុំ​ប្រូ មក​ដូរ​មេឃុំ​ពិត

ភ្នំពេញៈ គណបក្ស​ប្រឆាំង​ទំនង​ជា​មិន​ខ្វល់​ទៅ​នឹង​ការ​គំរាម​ចាត់​វិធានការ​ផ្លូវ​ច្បាប់​របស់​គណបក្ស​ប្រជាជន​កម្ពុជា​ប្រឆាំង​នឹង​ពាក្យ​ស្លោក «ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្ត្រ» ដែល​ធ្វើ​ឲ្យ​មាន​ភាព​ចម្រូង​ចម្រាស​នោះ​ទេ ខណៈ​ដែល​ក្រុម​យុវជន​គណបក្ស​ប្រជាជន​ក៏​បាន​ចេញ​នូវ​ពាក្យ​ស្លោក​ថ្មី​មួយ​កាលពី​ម្សិលមិញ​ថា «កុំ​យក​មេឃុំ​ប្រូ មក​ដូរ​មេឃុំ​ពិត»។

អ្នក​នាំ​ពាក្យ​គណបក្ស​សង្គ្រោះ​ជាតិ លោក យឹម សុវណ្ណ បាន​ថ្លែង​កាលពី​ម្សិលមិញ​ថា ​គណបក្ស​សង្គ្រោះជាតិ​ដែល​ប្រើប្រាស់​ពាក្យ​ស្លោក «ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្រ្ត» គឺ​មិន​អនុវត្ត​ទៅ​លើ​មេឃុំ​ពី​គណបក្ស​នយោបាយ​ណា​មួយ​ទេ ប៉ុន្តែ​ពាក្យ​ស្លោក​នេះ​នឹង​ត្រូវ​អនុវត្ត​សម្រាប់​មេឃុំ​ពី​គណបក្ស​នយោបាយ​ទាំងអស់ នៅ​ពេល​ពួកគេ​មិន​សកម្ម​ក្នុង​ការ​បម្រើ​ប្រជាពលរដ្ឋ ប៉ុន្តែ​ពួកគេ​សកម្ម​ក្នុង​ការ​បម្រើ​បក្ស។

កាលពី​ថ្ងៃ​អង្គារ​គណបក្ស​ប្រជាជន​កម្ពុជា​បាន​ចេញ​សេចក្តី​ប្រកាស​ព័ត៌មាន​មួយ ដោយ​ចាត់​ទុក​ពាក្យ​ស្លោក​របស់​គណបក្ស​សង្គ្រោះ​ជាតិ​ថា​ជា​ការ​ញុះញង់ បង្ក​ហេតុ និង​ប្រមាថ ហើយ​បាន​ទាមទារ​គណបក្ស​សង្គ្រោះ​ជាតិ​ដក​ពាក្យ​ស្លោក​នេះ​ចេញ​បើ​មិន​ដូច្នោះ​ទេ គណបក្ស​ប្រជាជន​នឹង​ចាត់​វិធានការ​ផ្លូវ​ច្បាប់​ប្តឹង​ទៅ​តុលាការ។

លោក សុវណ្ណ បាន​ថ្លែង​ថា៖ «ប្រសិន​បើ​នរណា​ម្នាក់ បម្រើ​បក្ស​មិន​បម្រើ​ប្រជាពលរដ្ឋ ប្រជាពលរដ្ឋ​ត្រូវ​តែ​ប្តូរ ព្រោះ​យើង​ជា​មេឃុំ ត្រូវ​បម្រើ​ប្រជាពលរដ្ឋ​នៅ​ពេល​ជាប់​ឆ្នោត ហើយ​យើង​មិន​សំដៅ​លើ​គណបក្ស​ណា​មួយ​ទេ។ សូម្បី​គណបក្ស សម រង្ស៊ី គណបក្ស​សិទ្ធិ​មនុស្ស​ក៏​មាន​មេឃុំ​ដែរ»។

ប៉ុន្តែ​នៅ​ពេល​សួរ​ថា តើ​គណបក្ស​សង្គ្រោះ​ជាតិ​នឹង​ប្តូរ​ពាក្យ​ស្លោក​នេះ​ឬ​អត់ បន្ទាប់​ពី​គណបក្ស​ប្រជាជន​បាន​ទាមទារ​ឲ្យ​ដក​ចេញ បើ​មិន​ដូច្នោះ​គណបក្ស​ប្រជាជន​នឹង​ចាត់​វិធានការ​ផ្លូវ​ច្បាប់ លោក យឹម សុវណ្ណ បាន​ថ្លែង​ថា៖ «នេះ​ជា​រឿង​របស់​គាត់ [គណបក្ស​ប្រជាជន] ព្រោះ​ [យើង]​ មិន​ដឹង​ធ្វើ​ដូចម្តេច យើង​បាន​អះអាង​រួច​ហើយ នេះ​ជា​សារ​នយោបាយ ហើយ​មិន​សំដៅ​ទៅ​មេឃុំ គណបក្ស​ណា​មួយ​ទេ»។

សរសេរ​នៅ​លើ​ហ្វេសប៊ុក​បង្ហោះ​ កាលពី​ម្សិលមិញ ​អនុប្រធាន​គណបក្ស​សង្គ្រោះជាតិ ​លោក អេង ឆៃអ៊ាង ក៏​បាន​បញ្ជាក់​ផង​ដែរ​ថា ​ពាក្យ​ស្លោក​នយោបាយ​មួយ​ដែល​និយាយ​ថា «ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្រ្ត» ដែល​ត្រូវ​បាន​ប្រើ​ដោយ​គណបក្ស​សង្គ្រោះ​ជាតិ​នៅ​ក្នុង​កម្មវិធី​នយោបាយ គឺ​ដើម្បី​ជំរុញ​មេឃុំ​ដែល​ទទួល​បាន​ការ​គាំទ្រ​ពី​ប្រជាពលរដ្ឋ ឲ្យ​ធ្វើការ​ដើម្បី​ប្រជាពលរដ្ឋ​មិនមែន​ធ្វើការ​ដើម្បី​បក្ស​នោះ​ទេ។ «ចំពោះ​ខ្ញុំ យល់​ថា​ពាក្យ​ស្លោក​នេះ​គឺជា​ការ​ជំរុញ និង​លើក​ទឹកចិត្ត​មេឃុំ ដែល​ទទួល​បាន​ការ​គាំទ្រ​ពី​ប្រជាពលរដ្ឋ​នៅ​ពេល​បោះឆ្នោត​ឲ្យ​ធ្វើ​ការងារ​ដើម្បី​ប្រជាពលរដ្ឋ មិនមែន​បម្រើ​បក្ស​ទេ»។

លោក ឆៃអ៊ាង បាន​បន្ថែម​ថា៖ «ពាក្យ​ស្លោក​នេះ ពួកគេ [គណបក្ស​ប្រជាជន] អាច​ហាមឃាត់​គណបក្ស​សង្គ្រោះជាតិ​មិន​ឲ្យ​ប្រើ​ ប៉ុន្តែ​ពួកគេ​មិន​អាច​ហាមឃាត់​ប្រជាពលរដ្ឋ​មិន​ឲ្យ​ប្រើ​បាន​ទេ ពីព្រោះ​ពាក្យ​ស្លោក​នេះ​មកពី​ប្រជាពលរដ្ឋ»។

កាលពី​ម្សិលមិញ​ក្រុម​យុវជន​ដែល​អះអាង​ថា​ជា​យុវជន​របស់​គណបក្ស​ប្រជាជន​បាន​ចេញ​នូវ​ពាក្យ​ស្លោក​ថ្មី​មួយ​ដែល​ត្រូវ​បាន​សារព័ត៌មាន​ក្នុង​ស្រុក​មួយ​ចុះ​ផ្សាយ​ថា៖ «កុំ​យក​មេឃុំ​ប្រ៉ូ មក​ដូរ​មេឃុំ​ពិត»។

នៅ​ពេល​ទាក់ទង​កាលពី​ម្សិលមិញ​អ្នក​នាំពាក្យ​របស់​គណបក្ស​ប្រជាជន​លោក សួស យ៉ារ៉ា បាន​បញ្ជាក់​ថា​សារនយោបាយ​ថ្មី​នេះ​មកពី​សាធារណជន ដូច្នេះ​គណបក្ស​ប្រជាជន​មិន​ស៊ី​ជម្រៅ​ជាមួយ​សារ​នេះ​ទេ ប៉ុន្តែ​លោក​បន្ថែម​ថា​យុវជន​ដែល​គាំទ្រ​គណបក្ស​ប្រជាជន​មាន​សេរីភាព​ក្នុង​ការ​បញ្ចេញមតិ។

លោក យ៉ារ៉ា បន្ថែម​ថា៖ «ពួកគេ​គ្រាន់​តែ​ប្រកាស​ដោយ​ខ្លួនឯង ពួកគេ​មិន​បាន​ប្រើ​ឡូហ្គោ​ផ្លូវការ​របស់​បក្ស​ទេ។ ពួកគេ​គ្រាន់​តែ​ជា​អ្នក​គាំទ្រ​គណបក្ស​ប្រជាជន​កម្ពុជា​មិន​ពាក់ព័ន្ធ​ជាមួយ​គណបក្ស​ទេ»។

អ្នក​នាំពាក្យ​គណៈកម្មាធិការ​ជាតិ​រៀបចំ​ការ​បោះឆ្នោត​លោក ហង្ស ពុទ្ធា បាន​បដិសេធ​ធ្វើ​អត្ថាធិប្បាយ​អំពី​ភាព​ស្រប​ច្បាប់ និង​អត្ថន័យ​នៃ​ពាក្យ​ស្លោក​នយោបាយ​របស់​គណបក្ស​សង្គ្រោះ​ជាតិ​ដោយ​ថ្លែង​ថា ពេល​នេះ​មិនមែន​ជា​ពេល​សម្រាប់​ការ​ឃោសនា​ក្នុង​យុទ្ធនាការ​បោះឆ្នោត​របស់​គណបក្ស​នីមួយៗ​ដែល​ជា​តួនាទី​របស់ គ.ជ.ប. ជួយ​ដោះស្រាយ​ទេ ហើយ​លោក​បាន​ជំរុញ​ឲ្យ​គណបក្ស​ទាំង​ពីរ​ដោះស្រាយ​បញ្ហា​ចម្រូង​ចម្រាស​នេះ​ដោយ​ការ​សម្រុះ​សម្រួល​ណា​មួយ​ដែល​អាច​ទទួល​យក​បាន​ទាំងអស់​គ្នា។

អ្នក​នាំពាក្យ​គណបក្ស​ប្រជាជន​ម្នាក់​ទៀត​លោក​ សុខ ឥសាន បាន​បញ្ជាក់​ជាថ្មី​កាលពី​ម្សិលមិញ​ថា​ជំហរ​របស់​គណបក្ស​ប្រជាជន​គឺ​នៅ​តែ​ដដែល​ក្នុង​ការ​ចាត់​វិធានការ​ផ្លូវ​ច្បាប់ ទៅ​លើ​គណបក្ស​សង្គ្រោះជាតិ​ប្រសិន​បើ​គណបក្ស​នេះ​មិន​ផ្លាស់ប្តូរ​ពាក្យ​ស្លោក​នយោបាយ​នេះ​ដោយ​លោក​ថ្លែង​ថា ពាក្យ​ស្លោក​នេះ​មាន​ចរិត​ញុះញង់​ដើម្បី​ឲ្យ​មាន​ការ​រើសអើង​ជា​សាធារណៈ។ «យើង​ពិនិត្យ​លទ្ធភាព​ ប្រសិន​បើ​គាត់​អាច​ប្តូរ វា​សម្រុះ​សម្រួល​ស្ថានភាព​នយោបាយ។ ប៉ុន្តែ​ប្រសិន​បើ​គាត់​មិន ប្តូរ យើង​មាន​តែ​ទៅ​រក​អាជ្ញា​កណ្តាល​ដែល​ជា​ចៅក្រម​នោះ​គឺ​តុលាការ»។

លោក សំ គន្ធាមី នាយក​ប្រតិបត្តិ​នៃ​អង្គការ​ឃ្លាំ​មើល​ការ​បោះឆ្នោត NICFEC បាន​ថ្លែង​ថា ពាក្យ​ស្លោក​នេះ​មិន​ធ្វើ​ឲ្យ​មាន​ចលាចល​ក្នុង​សង្គម​ទេ ប៉ុន្តែ​លោក​លើក​ទឹកចិត្ត​ឲ្យ​គណបក្ស​សង្គ្រោះជាតិ​ប្តូរ​ពាក្យ​ស្លោក​នេះ​ដើម្បី​បញ្ចៀស​កុំ​ឲ្យ​មាន​ភាព​តានតឹង​នយោបាយ​រវាង​គណបក្ស​ប្រជាជន និង​គណបក្ស​សង្គ្រោះជាតិ៕ PS

អត្ថបទគួរចាប់អារម្មណ៍