The Phnom Penh Post Search

Search form




Logo of Phnom Penh Post newspaper Phnom Penh Post - យូណេស្កូ ត្រៀម​បញ្ចូល​តំបន់​ធម្មជាតិ​របស់​កម្ពុជា​ ក្នុងបញ្ជី​បេតិកភណ្ឌ​ធម្មជាតិ​ពិភពលោក




យូណេស្កូ ត្រៀម​បញ្ចូល​តំបន់​ធម្មជាតិ​របស់​កម្ពុជា​ ក្នុងបញ្ជី​បេតិកភណ្ឌ​ធម្មជាតិ​ពិភពលោក

Content image - Phnom Penh Post
ទិដ្ឋភាពដើមឈើ​ត្រឈឹងត្រឈៃ​ ដុះ​ក្នុង​ផ្ទៃ​បឹង​ទន្លេសាប ដែល​ជា​តំបន់​គាំទ្រ​ដោយ​ យូណេស្កូ​​។ រូបថត UNESCO

យូណេស្កូ ត្រៀម​បញ្ចូល​តំបន់​ធម្មជាតិ​របស់​កម្ពុជា​ ក្នុងបញ្ជី​បេតិកភណ្ឌ​ធម្មជាតិ​ពិភពលោក

ភ្នំពេញៈ អង្គការ​យូណេស្កូ​បាន​ពិភាក្សា​ជាមួយ​ក្រសួង​បរិស្ថាន​ដើម្បី​ផ្តល់​ជំនួយ​បច្ចេកទេស​ក្នុង​ការកំណត់ ​ជ្រើសរើស និង​វាយតម្លៃ​តំបន់​ដែល​មាន​សក្តានុពល​សម្រាប់​ធ្វើ​បច្ចុប្បន្នភាព​បញ្ជី​បេតិកភណ្ឌ​នៃ​តំបន់​ធម្មជាតិ​ដាក់​បញ្ចូល​ក្នុង​បញ្ជី​ត្រៀម​នៃ​បេតិកភណ្ឌ​ធម្មជាតិ​ពិភពលោក។ នេះ​បើ​តាម​មន្ត្រី​គម្រោង​វិទ្យាសាស្ត្រ​នៃ​អង្គការ​យូណេស្កូ​កាលពី​ចុង​ខែ​មុន។

លោក​ Sriharsha Masabathula ​មន្ត្រី​គម្រោង​វិទ្យាសាស្ត្រ ​នៃ​អង្គការ​យូណេស្កូ​ប្រាប់​ភ្នំពេញ​ប៉ុស្តិ៍​តាមរយៈ ​អ៊ីមែល​កាលពី​ថ្ងៃទី ៣០ ខែ​វិច្ឆិកា​ថា ​គោលបំណង​នៃ​ការផ្តល់​ជំនួយ​បច្ចេកទេស​នេះ​គឺ​ដើម្បី​រៀបចំ​ទម្រង់​បញ្ជី​ដែល​ជា​បញ្ជី​សារពើភណ្ឌ​នៃ​តំបន់​ទាំងនោះ​សម្រាប់​ប្រទេស​ណាមួយ​មាន​បំណង​ពិចារណា ​ដើម្បី​ធ្វើការ​ដាក់​តំបន់​ធម្មជាតិ​ចូល​ជា​បេតិកភណ្ឌ​ពិភពលោក​របស់​អង្គការ​យូណេស្កូ។

លោក​បន្ថែមថា ​បច្ចុប្បន្ន​នេះ​ប្រទេស​កម្ពុជា​មាន​តំបន់​វប្បធម៌​ចំនួន​ ៣​ គឺ​ឧទ្យាន​​អង្គរ ​ប្រាសាទ​ព្រះវិហារ ​និង​តំបន់​ ប្រាសាទ​សម្បូរ​ព្រៃគុក​ត្រូវ​បាន​ចុះក្នុង​បញ្ជី​បេតិកភណ្ឌ​វប្បធម៌​ពិភពលោក​របស់​អង្គការ​យូណេស្កូ។ ប៉ុន្តែ​មិន​ទាន់​មាន​តំបន់​ធម្មជាតិ​ណាមួយ​ត្រូវបាន​ចុះ​ក្នុង​បញ្ជី​បេតិកភណ្ឌ​ធម្មជាតិ​ពិភពលោក​​ឡើយ។ ប្រទេស​កម្ពុជា​មាន​ឱកាស ​ដើម្បី​ចុះបញ្ជី​ទីតាំង​ធម្មជាតិ​ក្នុង​បញ្ជី​បេតិកភណ្ឌ​ធម្មជាតិ​នៃ​បេតិកភណ្ឌ​ពិភពលោក​ដោយសារ​ប្រទេស​នេះ​សម្បូរ​​ទៅ​ដោយ​តំបន់​បេតិកភណ្ឌ​ធម្មជាតិ​រួមទាំង​ជម្រក​ធម្មជាតិ ​ប្រព័ន្ធ​អេកូឡូស៊ី ​និង​ជីវចម្រុះ។

លោក​ថ្លែង​ថា​៖ «ជា​ជំហាន​ដំបូង​អង្គការ​យូណេស្កូ​នឹង​ផ្តល់​ការគាំទ្រ​ផ្នែក​បច្ចេកទេស ​ដើម្បី​ធ្វើឱ្យ​ប្រសើរ​ឡើង​នូវ​សមត្ថភាព​មន្ត្រី​ក្រសួង​បរិស្ថាន និង​អ្នកពាក់ព័ន្ធ​នានា​ស្តីពី​ដំណើរការ​នៃ​ការដាក់​ឈ្មោះ​បេតិកភណ្ឌ​ធម្មជាតិ និង​អត្ថប្រយោជន៍​សក្តានុពល​នៃ​ការចុះបញ្ជីបេតិកភណ្ឌ​ពិភពលោក»។

បើ​តាម​មន្ត្រី​គម្រោង​រូបនេះ​អង្គការ​យូណេស្កូ​ក៏នឹង​ផ្តល់​ការគាំទ្រ​ដល់​រាជរដ្ឋាភិបាល​កម្ពុជា​ក្នុង​ការរៀបចំ​ទីតាំង​បន្ថែម​ទៀត​នៅ​ក្នុង​ប្រទេស​កម្ពុជា​ជា​តំបន់​ឋបនីយ​ជីវមណ្ឌល​យូណេស្កូ ​ដែល​​ជា​ផ្នែក​មួយ​នៃ​កម្មវិធី​មនុស្ស​ជាតិ ​និង​ជីវឧស្ម័ន​របស់​យូណេស្កូ​ដែល​ជា​អង្គការ​ពិភពលោក។

លោក​ថ្លែងថា​៖ «បច្ចុប្បន្ន​នេះ​បឹង​ទន្លេសាប​ជា​តំបន់​ឋបនីយ​ជីវមណ្ឌល​យូណេស្កូ​តែ ១ ​គត់​នៅ​ក្នុង​ប្រទេស​កម្ពុជា ​ហើយ​រហូត​មកដល់​ពេល​នេះ​អង្គការ​យូណេស្កូ​បាន​សម្តែង​ការគាំទ្រ​ដល់​កិច្ចខិតខំ​ប្រឹងប្រែង​របស់​រដ្ឋាភិបាល​ក្នុង​ការពង្រីក ​និង​ដាក់​បញ្ចូល​តំបន់​ថ្មី​ជាសម្បត្តិ​បេតិកភណ្ឌ​ធម្មជាតិ ជីវមណ្ឌល ​និង ​Global Geoparks ​ពី​ប្រទេស​កម្ពុជា»​។

បើ​តាម​លោក Sriharsha Masabathula ​បេតិកភណ្ឌ​ធម្មជាតិ​របស់​អង្គការ​យូណេស្កូ​រួម​ជាមួយ​តំបន់​អភិរក្ស ជីវឧស្ម័ន និង​ Global Geoparks ​ផ្តល់​នូវ​អត្ថប្រយោជន៍​យ៉ាង​ច្រើន។ មិន​ត្រឹមតែ​ពី​ការពង្រឹង​ការអភិរក្ស ​ការការពារ និង​យន្តការ​គ្រប់គ្រង​សម្រាប់​តំបន់​នោះ​ប៉ុណ្ណោះ​ទេ​ ប៉ុន្តែ​ថែម​ទាំង​ផ្តល់​​នូវ​ឱកាស​សម្រាប់​ការអភិវឌ្ឍ​ជីវភាព​​រស់នៅ​​របស់​សហគមន៍​រួម​ទាំង​ទេសចរណ៍​​ធម្មជាតិ​ និង​ការធ្វើ​ពិពិធកម្ម​ជីវភាព​សម្រាប់​ការលើក​កម្ពស់​វិបុលភាព​សេដ្ឋកិច្ច​សង្គម​។ ក្រៅពី​នេះ​ដើរ​តួនាទី​យ៉ាង​សំខាន់​ក្នុង​ការបង្កើន​ប្រាក់​ចំណូល​ និង​ការងារ​នៅក្នុង​ឧស្សាហកម្ម​ទេសចរណ៍​ផង​ដែរ។

លោក​ លឿង កេសរោ ​ប្រធាន​នាយកដ្ឋាន​តំបន់​បេតិកភណ្ឌ​នៃ​ក្រសួង​បរិស្ថាន ឱ្យ​ដឹងថា​ ក្រសួង​បរិស្ថាន និង​ក្រសួង​វប្បធម៌ ​និង​វិចិត្រសិល្បៈ​មាន​ភារកិច្ច ​និង​​កាតព្វកិច្ច​ក្នុង​ការចងក្រង​រៀបចំ វាយតម្លៃ​ និង​កំណត់​តំបន់​ដែល​មាន​សក្តានុពល​ និង​លេចធ្លោ​នៃ​តំបន់​ធម្មជាតិ​ណា​មួយ​របស់​កម្ពុជា ​ដើម្បី​ដាក់​បញ្ចូល​ទៅ​ក្នុង​បញ្ជី​បេតិកភណ្ឌ​ពិភពលោកស្រប​តាមការ​វិនិច្ឆ័យ​របស់​អង្គការ​យូណេស្កូ។

ក្រសួង​បរិស្ថាន​បាន​បើក​កិច្ចប្រជុំ​មួយ​ជាមួយ​ភាគី​ពាក់ព័ន្ធ ដែល​មាន​ខាង​អង្គការ​យូណេស្កូ និង​អ្នក​ជំនាញការអន្តរជាតិ​មកពី​ ICC Angkor បាន​ឯកភាព​ចំពោះ​តំបន់​ ៣​ របស់​កម្ពុជា​សម្រាប់​ដាក់​ចូល​ទៅក្នុង​បញ្ជី​បេតិកភណ្ឌ​ពិភពលោក​ ដែល​រួមមាន​តំបន់​ធម្មជាតិ​ភ្នំត្បែង តំបន់​ភ្នំក្រវាញ​ និង​តំបន់​ធម្មជាតិ​នៃ​បឹង​ទន្លេសាប។ នេះ​ជា​ការបញ្ជាក់​របស់​លោក​ កេសរោ។

លោក​រំពឹងថា​ នៅក្នុង​ខែធ្នូ ​ឬ​ខែមករា ​ឆ្នាំ ២០២១ ខាងមុខ​នេះ​ អង្គការ​យូណេស្កូ​នឹង​អញ្ជើញ​មន្ត្រី​ជំនាញ​អន្តរជាតិ​ដែល​មាន​បទពិសោធ ​ដើម្បី​បណ្តុះបណ្តាល​មន្ត្រី ​នៃ​ក្រសួង​បរិស្ថាន​ក្នុង​ការរៀបចំ​ឯកសារ និង​បំពេញ​ព័ត៌មាន​នានា​នៃ​តំបន់​នីមួយៗ​ឱ្យ​មាន​លក្ខណៈ​គ្រប់​ជ្រុង​ជ្រោយ ​និង​ប្រកប​ដោយ​វិទ្យាសាស្ត្រ។ ព័ត៌មាន​ទាំងអស់​ត្រូវ​ឆ្លងកាត់​ថ្នាក់ដឹកនាំ​ក្រសួង​ដើម្បី​ឆ្លើយតប​ទៅនឹង​គោល​នយោបាយ យុទ្ធសាស្ត្រ សេដ្ឋកិច្ច​ និង​បរិស្ថាន។

លោក​ថ្លែងថា​៖ «យើង​កំពុង​រៀបចំ ​មិន​ទាន់​បានដាក់​ស្នើសុំ​នោះ​ទេ ​ហើយ​សង្ឃឹម​ថា ​នៅក្នុង​ខែធ្នូ ​ឬ​ខែ​មករា ​និង ​កុម្ភៈ ខាង​មុខនេះ​យើង​នឹង​រៀបចំ​រួចរាល់​ និង​បានល្អ​ប្រសើរ»។

លោក​ថា​នៅពេល​ដាក់​តំបន់​នេះ​ជា​តំបន់​ ធម្មជាតិ​ចូលក្នុង​បេតិកភណ្ឌ​ពិភពលោក​នៃ​តំបន់​ណា​មួយ​នោះ កម្ពុជា​នឹង​ទទួល​បាន​ផលចំណេញ​ច្រើន ​ទាំង​នយោបាយ​ ធនធាន​ពី​ដៃគូ​អភវិឌ្ឍន៍ ​វិស័យ​ឯកជន ​និង​ភាគី​ពាក់​ព័ន្ធ​ទៅលើ​ការការពារ​ និង​អភិរក្ស​ទៅលើ​តំបន់​ទាំង​នោះ។ ទន្ទឹម​គ្នា​នេះ​ក៏​បាន​លើក​ស្ទួយ​ជីវភាព​ក្នុង​ប្រទេស​ និង​ប្រជាសហគមន៍​នៅក្នុង​មូលដ្ឋាន​ឱ្យ​កាន់តែ​ល្អ​ប្រសើរ ​និង​បាន​ការពារ ធនធាន​ធម្មជាតិ ​និង​ជីវចម្រុះ​ទាំង​នោះ​ទុកដល់​ក្មេងៗ​ជំនាន់​ក្រោយ​ផង​ដែរ៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ