ភ្នំពេញៈ ទារក ទារិកាកម្ពុជាជិត ១ ០០០ នាក់ ក្នុងចំណោមជាង ៣៧ ម៉ឺននាក់ នៅទូទាំងពិភពលោកដែលបានចាប់កំណើតក្នុងថ្ងៃចូលឆ្នាំសកលថ្មី ថ្ងៃទី ១ មករា ត្រូវបានអង្គការយូនីសេហ្វព្យាករថានឹងមានអាយុកាលរំពឹងទុកច្រើនជាងមនុស្សជំនាន់មុនៗ ដែលមានរហូតដល់លើសពី ៨១ ឆ្នាំ។
អង្គការ យូនីសេហ្វ បានឲ្យដឹងនៅក្នុងសេចក្តីប្រកាសព័ត៌មានរបស់ខ្លួនកាលពីថ្មីៗនេះថា ទារក ទារិកា កម្ពុជាប្រមាណ ១ ០០០ នាក់ ដែលបានចាប់កំណើតនៅកម្ពុជាក្នុងថ្ងៃចូលឆ្នាំសកលថ្មី គឺជាការចាប់ផ្ដើមជីវិតថ្មីពោរពេញដោយក្ដីសង្ឃឹម ស្របពេលអង្គការយូនីសេហ្វចាត់ទុកឆ្នាំ ២០២១ ដែលជាខួបទី ៧៥ ឆ្នាំរបស់ខ្លួន ដើម្បីគិតគូរសាជាថ្មីអំពីពិភពលោកកាន់តែប្រសើរសម្រាប់កុមារ។
អង្គការនេះបញ្ជាក់ថា៖ «នៅថ្ងៃចូលឆ្នាំថ្មីឆ្នាំ ២០២១ នេះមានទារក ទារិកាចំនួន ៩៧១ នាក់ កើតនៅក្នុងប្រទេសកម្ពុជា នេះបើតាមការប៉ាន់ប្រមាណរបស់យូនីសេហ្វ។ ពួកគេទាំងនេះស្ថិតក្នុងក្រុម ទារក ទារិកាចំនួន ៣៧១ ៥០៤ នាក់ ដែលកើតនៅថ្ងៃទី ១ ខែមករា ឆ្នាំ ២០២១ នៅទូទាំងពិភពលោក។ មានការព្យាករថា ទារក ទារិកាកម្ពុជាទាំងនេះនឹងមានអាយុកាលរំពឹងទុកច្រើនជាងមនុស្សជំនាន់មុនៗជាមួយនឹងអាយុកាលរំពឹងទុក ៨១,២ ឆ្នាំ»។
អង្គការនេះបានឲ្យដឹងដែរថា នៅទូទាំងសកលលោកមានការព្យាករថា ទារក ទារិកា ពាក់កណ្ដាលក្នុងចំណោមចំនួន ៣៧១ ៥០៤ នាក់ ដែលកើតនៅថ្ងៃចូលឆ្នាំថ្មីដោយរាប់តែក្នុងប្រទេស ១០ ប៉ុណ្ណោះដូចជា ឥណ្ឌា (៥៩ ៩៩៥ នាក់) ចិន (៣៥ ៦១៥ នាក់) នីហ្សេរីយ៉ា (២១ ៤៣៩ នាក់) ប៉ាគីស្ថាន (១៤ ១៦១ នាក់) ឥណ្ឌូនេស៊ី (១២ ៣៣៦ នាក់) អេត្យូពី (១២ ០០៦ នាក់) សហរដ្ឋអាមេរិក (១០ ៣១២ នាក់) អេហ្ស៊ីប (៩ ៤៥៥ នាក់) បង់ក្លាដែស (៩ ២៣៦ នាក់) សាធារណរដ្ឋប្រជាធិបតេយ្យកុងហ្គោ (៨ ៦៤០ នាក់)។
លោក មាស ប៊ុនលី មន្ត្រីជំនាញផ្នែកទំនាក់ទំនងយូនីសេហ្វកម្ពុជាបានប្រាប់ ភ្នំពេញ ប៉ុស្តិ៍ ពីម្សិលមិញថា ការប៉ាន់ប្រមាណលម្អិតអំពីកំណើតទារក ទារិកា នៅក្នុងប្រទេស និងដែនដីចំនួន ២៣៦ ត្រូវបានប្រើប្រាស់ទិន្នន័យដែលបានពីការចុះអត្រានុកូលដ្ឋាន និងទិន្នន័យដែលបានមកពីការអង្កេតតាមខ្នងផ្ទះ ដែលតំណាងឲ្យប្រទេសទាំងមូល ដើម្បីប៉ាន់ប្រមាណពីភាគរយនៃការសម្រាលកូនប្រចាំខែ និងប្រចាំថ្ងៃ។
លោកបន្តថា យូនីសេហ្វបានប្រើប្រាស់តួលេខនៃការសម្រាលកូនប្រចាំឆ្នាំ ដែលត្រូវបានផ្សាយបន្តផ្ទាល់ និងអាយុកាលរំពឹងទុកចេញពីគេហទំព័រប្រជាជនពិភពលោករបស់អង្គការសហប្រជាជាតិ។ លោកបានពន្យល់ថា អាយុព្យាករនេះគឺអាចទៅរួច ដោយស្របតាមលក្ខខណ្ឌ ដរាបណាកុមារត្រូវបានគេផ្តល់ឱកាសយុត្តិធម៌ និងស្មើៗភាពគ្នាដើម្បីរស់រានមានជីវិត និងរីកចម្រើនរួមទាំងសិទ្ធិទទួលបាននូវបរិស្ថានជុំវិញ (រួមទាំងបរិស្ថានធម្មជាតិ) ល្អ គ្មានការបំពុល និងបំផ្លាញ។
លោកបញ្ជាក់ថា៖ «រាប់ចាប់តាំងពីចាប់កំណើតក្នុងផ្ទៃភ្លាម ការផ្តល់សេវាសុខភាពគ្រប់គ្រាន់ អាហារូបត្ថម្ភគ្រប់គ្រាន់ ថ្នាំបង្ការ ការអប់រំ (ចាប់តាំងពីថ្នាក់មត្តេយ្យ) ទទួលទឹកស្អាត និងអនាម័យ ទទួលកិច្ចការពារពីការរំលោភបំពាន ការការពារពីច្បាប់ពេលកុមារប្រឈមមុខច្បាប់ជាដើម។ សេវាទាំងនេះមានលក្ខណៈប្រសើរជាបន្តបន្ទាប់ ហើយប្រសិនបើពួកគាត់ (ដែលចាប់កំណើតក្នុងឆ្នាំថ្មីនេះ) ទទួលបានសិទ្ធិ និងសេវាកាន់តែប្រសើរ អាយុរំពឹងទុករបស់ពួកគាត់អាចដល់អាយុដែលយូនីសេហ្វព្យាករទុក»។
លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វ ប្រចាំកម្ពុជាបានស្វាគមន៍ទារក ទារិកា ដ៏ស្រស់ស្អាតប្រមាណ ១ ០០០ នាក់ ដែលកើតនៅថ្ងៃចូលឆ្នាំថ្មីនេះ។ លោកស្រីបន្តថា ឆ្នាំ ២០២០ គឺជាឆ្នាំដ៏សែនលំបាក ជាពិសេសសម្រាប់កុមារ។ ទោះជាយ៉ាងណាប្រទេសកម្ពុជាបានទទួលជោគជ័យក្នុងការទប់ស្កាត់ការឆ្លងរាលដាលនៃជំងឺរាតត្បាតសកល និងរក្សាចំនួនករណីជំងឺកូវីដ១៩ ឲ្យទាបជាងប្រទេសភាគច្រើន ហើយលោកស្រីសង្ឃឹមថា និន្នាការនេះអាចនឹងនៅតែបន្តទៀត។
លោកស្រីបញ្ជាក់ថា៖ «តាមរយៈកិច្ចសហការយ៉ាងជិតស្និទ្ធជាមួយរាជរដ្ឋាភិបាល ដៃគូអភិវឌ្ឍន៍ព្រមទាំងប្រជាជនកម្ពុជា យូនីសេហ្វនឹងបន្តគិតគូរសាជាថ្មីអំពីពិភពលោកកាន់តែប្រសើរសម្រាប់កុមារកម្ពុជាក្នុងការចម្រើនវ័យ។ កុមារម្នាក់ៗសមនឹងទទួលបានឱកាសសម្រេចសក្ដានុពលក្នុងជីវិតរបស់ខ្លួន ហើយយើងសន្យាថា នឹងខិតខំធ្វើការ ដោយមិនខ្លាចនឿយហត់ដើម្បីឈានទៅសម្រេចគោលដៅនេះនៅក្នុងឆ្នាំខួបទី ៧៥ របស់យើងក៏ដូចជាក្នុងឆ្នាំបន្តបន្ទាប់»។
ស្របពេលដែលមានការធ្លាក់ចុះផ្នែកសេដ្ឋកិច្ច ការកើនឡើងនូវភាពក្រីក្រ និងវិសមភាព ដោយសារការឆ្លងរាលដាលនៃជំងឺកូវីដ ១៩ ដែលសកលលោកនៅបន្តជួបប្រទះ លោកស្រី ហ្វ័រូហ្គ ហ្វយូហ្សិថ បានលើកឡើងថា បញ្ហាទាំងអស់នេះទាមទារនូវសកម្មភាពរួមគ្នាពីគ្រប់ភាគីពាក់ព័ន្ធទាំងអស់ ដើម្បីចូលរួមធ្វើការជាមួយកុមារក្នុងការផ្តល់ និងការពារសិទ្ធិរបស់ពួកគេ។ ការចូលរួមដូច្នេះទើបទារក ទារិកា ដែលបានចាប់កំណើតក្នុងឆ្នាំ ២០២១ នេះ និងឆ្នាំក្រោយៗទៀតទទួលបាននូវឱកាសយុត្តិធម៌ និងស្មើៗភាពគ្នា ដើម្បីរស់រានមានជីវិត និងរីកចម្រើន៕