ឧត្តរមានជ័យៈ យោធាកម្ពុជា-ថៃកាលពីថ្ងៃទី ៥ ខែឧសភា បានព្រមព្រៀងគ្នាបញ្ឈប់ការសាងសង់ផ្ទះ និងរបងលួសនៅក្នុងទឹកដីរៀងៗខ្លួនដែលនៅជិតតំបន់សនៅចំណុចក្បែរមាត់ច្រកទ្វារអន្តរជាតិជាំតាមបណ្ដោយព្រំដែននៃប្រទេសទាំង ២ ដែលស្ថិតនៅក្នុងភូមិជាំ ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ។
លោក តូច រ៉ា នាយសេនាធិការរងយោធភូមិភាគទី ៤ និងជាប្រធានការិយាល័យទំនាក់ទំនងកិច្ចការព្រំដែនប្រចាំច្រកព្រំដែនអន្តរជាតិជាំបានថ្លែងប្រាប់ភ្នំពេញប៉ុស្ដិ៍កាលពីថ្ងៃព្រហស្បតិ៍ថា ក្រោយពីមានការផ្ទុះទំនាស់នៅចំណុចគោលដៅចាស់ដែលជាចំណុចប្រទាញប្រទង់តាមព្រំដែនកម្ពុជា-ថៃ មេបញ្ជាការយោធភូមិភាគទី ៤ បានចេញបញ្ជាឲ្យមានកិច្ចប្រជុំពិភាក្សាបន្ទាន់ភ្លាមៗ ដើម្បីស្វែងរកដំណោះស្រាយរវាងភាគីទាំង ២។
បញ្ហាដែលបានកើតឡើង ព្រោះភាគីថៃឃើញពលរដ្ឋកម្ពុជា ១ គ្រួសារបានសាងសង់ផ្ទះជាប្រភេទសំណង់រឹងនៅលើដីកម្ពុជាចម្ងាយប្រហែលជាង ១៥០ ម៉ែត្រពីចំណុចស ហើយភាគីថៃរារាំងឲ្យបញ្ឈប់ការសាងសង់ដោយភាគីថៃបានដាក់កម្លាំងយោធាមកធ្វើរបងលួសនៅលើទឹកដីគេដែលនៅជិតតំបន់សនោះដែរ។
លោក រ៉ា ថ្លែងថាភាគីថៃបានលើកឡើងសុំឲ្យខាងកម្ពុជាផ្អាកការសាងសង់ ខាងបងប្អូនពលរដ្ឋកម្ពុជាក៏បានផ្អាករួចហើយ ព្រោះខាងភាគីយោធាកម្ពុជាសុំឲ្យមានការយោគយល់ពលរដ្ឋក្នុងការផ្អាកការសាងសង់ហើយ។
លោក រ៉ា ថ្លែងថា៖ «ក្រោយពីបានប្រជុំពិភាក្សាជាមួយភាគីថៃរួចមកខាងភាគីថៃក៏គេដកចេញតាមការឯកភាពគ្នា។ គេស្នើយើងកុំឲ្យសាងសង់សំណង់នៅក្បែរបន្ទាត់ព្រំដែនទៀត ហើយគេក៏បានត្រឡប់ទៅវិញដោយរើរបងបន្លាលួសអីទៅវិញអស់ហើយតាំងពីយប់ថ្ងៃដែលកើតហេតុនោះតែម្ដង ក្រោយបញ្ចប់ការពិភាក្សា»។
លោកបានបញ្ជាក់ថា ពេលនិយាយមិនត្រូវគ្នាទើបភាគីថៃបានប្រើកម្លាំងគេ ២ ក្រុម បម្រុងគាបសង្កត់មកភាគីកម្ពុជានៅមាត់ច្រកក្បែរមាត់ច្រកទ្វារអន្តរជាតិជាំ។ តាមលេណដ្ឋានក្បែរខ្សែក្រវាត់ព្រំដែនគេនោះ ថៃក៏បំពាក់បន្លាលួសដោយប្រើកម្លាំង ហើយដាក់កម្លាំងនៅត្រង់សេតាមលេណដ្ឋានរបស់គេតែម្ដង។
លោកបន្ដថា៖ «គេប្រាប់ខ្ញុំថា គេប្រើកម្លាំង ២ ក្រុមមកប្រហែល ៤០ ទៅ ៣០ នាក់។ ខ្ញុំក៏មិននិយាយអ្វីច្រើនដែរ។ យើងប្រើវិធីសន្តិវិធីនិយាយគ្នា»។
លោក ជា ពិសិដ្ឋ អ្នកនាំពាក្យរដ្ឋបាលសាលាខេត្តឧត្តរមានជ័យបានបញ្ជាក់បន្ថែមថា បញ្ហាទំនាស់ការសងសង់សំណង់នៅតាមព្រំដែននោះ កងកម្លាំងយោធភូមិភាគទី ៤ បានដោះស្រាយបញ្ចប់ជាមួយភាគីថៃហើយមិនមានបញ្ហាធ្ងន់ធ្ងរនោះទេ។
លោកថ្លែងថា៖ «រឿងនេះខាងកងកម្លាំងយោធាភូមិភាគទី ៤ គាត់បានប្រជុំពិភាក្សាគ្នាជាមួយភាគីថៃ បានព្រមព្រៀង ឯកភាពរើរបងបន្លាលួសចេញវិញអស់ហើយ។ ករណីនេះមិនមានជាបញ្ហាប្រឈមមុខដាក់គ្នាអ្វីទេ។ បញ្ហានេះ ក្រោយពីយើងឃើញមានការរាយរបងបន្លាលួសថ្មី កងកម្លាំងយោធភូមិភាគទី ៤ ក៏បានប្រជុំដោះស្រាយបញ្ចប់ហើយ»។
លោក ពិសិដ្ឋ បានឲ្យដឹងថាទាក់ទងនឹងបច្ចុប្បន្នភាពស្ថានភាពចរាចរណ៍ចេញចូលតាមច្រកអន្តរជាតិជាំ និងច្រកអូរស្មាច់ក្នុងខេត្ដឧត្ដរមានជ័យគឺមានសកម្មភាពដឹកទំនិញជាធម្មតារវាងប្រទេសទាំង ២។ ឯបងប្អូនពលករខ្មែរនៅតែមានការធ្វើដំណើរចេញពីថៃមកកម្ពុជាជារៀងរាល់ថ្ងៃដដែលដោយក្នុង ១ ថ្ងៃមានពលករខ្មែរចេញពីប្រទេសថៃប្រហែលពី ៥០ ទៅ ១០០ នាក់៕