ភ្នំពេញៈ បុរសជនជាតិខ្មែរ ២ នាក់អាយុពី ២២-២៩ ឆ្នាំ រស់នៅខេត្តកំពង់ចាម ត្រូវបានធ្វើតេស្ដឃើញវិជ្ជមានជំងឺកូវីដ ១៩ កាលពីថ្ងៃទី ១៣ មិថុនា បន្ទាប់ពីពួកគេរួមទាំងអ្នកដំណើរ ៤៤ នាក់ទៀត ទើបធ្វើដំណើរមកពីឥណ្ឌូនេស៊ីដល់កម្ពុជាបាន ១ ថ្ងៃ។ ករណីនេះមន្ត្រី WHO សរសើរកម្ពុជាថាបានបន្តឆ្លើយតបយ៉ាងល្អចំពោះការនាំចូលជំងឺទាំង ២ ករណីថ្មីនេះ។
ពីម្សិលមិញ ក្រសួងសុខាភិបាលប្រកាសថា អ្នកជំងឺថ្មីចំនួន ២ នាក់ ដែលត្រូវបានបញ្ជូនទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតនៅរាជធានីភ្នំពេញ គឺបានធ្វើឱ្យការរកឃើញអ្នកឆ្លងជំងឺកូវីដ ១៩ នៅកម្ពុជាកើនដល់ ១២៨ នាក់ ក្នុងនោះជាសះស្បើយវិញចំនួន ១២៥ នាក់ និងគ្មានអ្នកស្លាប់។
ក្រសួងសុខាភិបាលបញ្ជាក់ថា បុរសជនជាតិខ្មែរទាំង ២ នាក់ បានធ្វើដំណើរតាមជើងហោះហើរដែលបានដឹកអ្នកដំណើរចំនួន ៤៦ នាក់។ ក្នុងនោះមានជនជាតិខ្មែរ ៤២ នាក់ និងជនជាតិឥណ្ឌូនេស៊ី ៤ នាក់ ដែលបានធ្វើដំណើរត្រង់មកពីប្រទេសឥណ្ឌូនេស៊ី។
សេចក្ដីប្រកាសព័ត៌មានរបស់ក្រសួងលើកឡើងថា៖ «អ្នកដំណើរចំនួន ៤៤ នាក់ ដែលមានលទ្ធផលតេស្ដអវិជ្ជមានវីរុសកូវីដ១៩ ត្រូវបានដាក់ឱ្យធ្វើចត្តាឡីស័ក ១៤ ថ្ងៃ នៅមណ្ឌលចត្តាឡីស័កជម្ពូវន្ត មណ្ឌលចត្តាឡីស័កនៅតាមខេត្តដែលបុគ្គលរស់នៅ និងសណ្ឋាគារមួយក្នុងភ្នំពេញ ដើម្បីតាមដានសុខភាពបន្តទៀត»។
ពីម្សិលមិញភ្នំពេញប៉ុស្ដិ៍មិនអាចទាក់ទងសុំការបញ្ជាក់ពីលោកស្រី ឱ វណ្ណឌីន និងលោកស្រី យក់ សម្បត្តិ ជាក្រុមមន្ត្រីនាំពាក្យក្រសួងសុខាភិបាលបានទេ ដោយទូរស័ព្ទមិនអាចទាក់ទងបាន ហើយពួកគាត់ក៏ពុំទាន់បានឆ្លើយតបសំណួរតាមប្រព័ន្ធតេឡេក្រាម។
លោកស្រី Li Ailan ប្រធានអង្គការសុខភាពពិភពលោកប្រចាំកម្ពុជាសរសេរក្នុងប្រព័ន្ធ Twitter ខ្លីថា៖ «កម្ពុជានៅតែបន្តរកឃើញ និងឆ្លើយតបចំពោះករណីកូវីដ១៩ ដែលបាននាំចូលបន្ថែមទៀត។ វិធានការនានានៅតាមព្រំដែន មានសារៈសំខាន់សម្រាប់ដំណាក់កាលបច្ចុប្បន្ននេះ។ ករណីថ្មីចំនួន ២ បានរាយការណ៍ទៅអង្គការសុខភាពពិភពលោកកាលពីចុងសប្តាហ៍។ សូមកោតសរសើរយ៉ាងខ្លាំងចំពោះសកម្មភាពឆ្លើយតបបានល្អដែលកំពុងត្រូវបានធ្វើឡើងនៅក្នុងប្រទេសកម្ពុជា»។
រដ្ឋាភិបាលប្រកាសអនុវត្តតាំងពីថ្ងៃទី ២០ ឧសភា តម្រូវឱ្យអ្នកដំណើរជនបរទេសទាំងអស់លើកលែងអ្នកកាន់លិខិតឆ្លងដែនកម្ពុជាត្រូវមានលិខិតបញ្ជាក់សុខភាពថា គ្មានជំងឺកូវីដ ១៩ ពីប្រទេសសាមី និងត្រូវមានទឹកប្រាក់ធានារ៉ាប់រងសុខភាពយ៉ាងតិច ៥ ម៉ឺនដុល្លារ ទើបអាចអនុញ្ញាតឱ្យចូលកម្ពុជា។
កាលពីសប្ដាហ៍មុន រដ្ឋាភិបាលប្រកាសគិតថ្លៃសម្រាប់ជនបរទេសដែលធ្វើដំណើរមកកម្ពុជានឹងត្រូវចេញថ្លៃព្យាបាលដោយខ្លួនឯងក្នុងករណីមានផ្ទុកជំងឺកូវីដ១៩ ការចំណាយសម្រាប់ការធ្វើចត្តាឡីស័ក និងតម្លៃធ្វើតេស្ដជាដើម។
ស្របពេលកម្ពុជានៅប្រឈមការនាំចូលជំងឺពីក្រៅប្រទេសក្រសួងសុខាភិបាលបានអំពាវនាវឱ្យពលរដ្ឋប្រុងប្រយ័ត្នឱ្យបានខ្ពស់ដោយបន្តអនុវត្តវិធានការការពារខ្លួនដូចជាលាងសម្អាតដៃញឹកញាប់ ពាក់ម៉ាស់នៅពេលកណ្ដាស់ ឬក្អក និងរក្សាគម្លាតសុវត្ថិភាពបុគ្គល និងសង្គម៕