.jpg)
មន្ត្រីសុខាភិបាលធ្វើតេស្តលើមន្ត្រីអាវុធហត្ថរកមេរោគកូវីដ ១៩ ពីសប្តាហ៍មុន។ រូប អាវុធហត្ថ
ភ្នំពេញៈ មន្ត្រីកងរាជអាវុធហត្ថលើផ្ទៃប្រទេសចំនួន ៣ រូបត្រូវបានរកឃើញវិជ្ជមានជំងឺកូវីដ ១៩ ក្នុងចំណោមការធ្វើតេស្តថ្នាក់ដឹកនាំ និងកម្លាំងកងរាជអាវុធហត្ថប្រមាណជិត ៥០០ នាក់ ខណៈការធ្វើតេស្តមន្ត្រីអាវុធហត្ថ ដើម្បីរកមេរោគជំងឺនេះនៅបន្តធ្វើជារៀងរាល់ថ្ងៃ។
ចាប់តាំងពីថ្ងៃទី ១០ ឧសភា មន្ត្រីកងរាជអាវុធហត្ថលើផ្ទៃប្រទេសទាំងអស់តម្រូវឱ្យធ្វើសំណាក រហ័សរកមេរោគកូវីដ ១៩ នៅបញ្ជាការដ្ឋានកងរាជអាវុធហត្ថលើផ្ទៃប្រទេស បន្ទាប់ពីកងកម្លាំងទាំងនោះបានចូលរួមយ៉ាងសកម្មក្នុងសកម្មភាពបិទខ្ទប់ ដើម្បីបង្ការ ការរាលដាលនៃជំងឺកូវីដ ១៩ នៅទូទាំងប្រទេសជាពិសេសក្នុងរាជធានីភ្នំពេញ។
លោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសប្រាប់ភ្នំពេញប៉ុស្តិ៍ឱ្យដឹងថារយៈពេល ៧ ថ្ងៃកន្លងមកនេះ កម្លាំងកងរាជអាវុធហត្ថលើផ្ទៃប្រទេសប្រមាណជិត ៥០០ នាក់ ត្រូវបានធ្វើតេស្តរួចរាល់ដើម្បីបញ្ជាក់ថា ពួកគេគ្មានផ្ទុកជំងឺកូវីដ ១៩។
ក្នុងចំណោមអ្នកធ្វើតេស្តទាំងនោះ បានរកឃើញមន្ត្រីអាវុធហត្ថចំនួន ៣ រូប មានផ្ទុកជំងឺកូវីដ ១៩។ ពួកគេត្រូវបានបញ្ជូនទៅព្យាបាលនៅមន្ទីរពេទ្យ។ ទោះយ៉ាងណាមន្ត្រីទាំង ៣ រូប ស្ថិតក្នុងស្ថានភាពដែលអាចគ្រប់គ្រងបាន។
លោកបញ្ជាក់ថា៖ «ការធ្វើតេស្ត ដោយឧបករណ៍តេស្តរហ័សកន្លងមកនេះ ភាគច្រើន ពួកគាត់មិនមានឆ្លងកូវីដ ១៩ ទេ។ ប៉ុន្តែយើងក៏បានរកឃើញក្នុងចំណោម សមាជិករបស់យើង គឺយើងបានរកឃើញ ៣ នាក់ អ្នកដែលមានផ្ទុក ជំងឺកូវីដ ១៩ តាមរយៈឧបករណ៍ដែលយើងធ្វើតេស្តរហ័សនេះ»។
លោកបន្តថា៖ «អ្នកដែលយើងរកឃើញនេះ គឺមិនជាប់ពាក់ព័ន្ធនឹងការចុះបេសកកម្មកន្លងទៅនោះទេ គឺពួកគាត់ឆ្លងពីក្រុមគ្រួសារ ព្រោះពួកគាត់មានផ្ទះស្ថិតក្នុងតំបន់ក្រហម។ ប៉ុន្តែយើងមិនដឹងច្បាស់ថា ពួកគាត់ឆ្លងយ៉ាងម៉េចទេ។ យើងមើលមិនឃើញទេ គ្រាន់តែនៅពេលពួកគាត់មកធ្វើតេស្ត គឺឃើញវិជ្ជមាន»។
ក្រៅពីអ្នកធ្វើតេស្តរួច លោក សៅ សុខា ក៏បានឱ្យដឹងដែរថា ការធ្វើតេស្តចំពោះកងកម្លាំងកងរាជអាវុធហត្ថ គឺនៅតែបន្តធ្វើជារៀងរាល់ថ្ងៃ ខណៈកងកម្លាំងប្រមាណ ១ ម៉ឺននាក់ទៀត នឹងបន្តធ្វើតេស្តជាបន្តបន្ទាប់ ដើម្បីឱ្យប្រាកដថា ពួកគេមានសុវត្ថិភាពពីជំងឺកូវីដ ១៩។
លោកថ្លែងថា៖ «យើងនៅមានចំនួនកងកម្លាំងយើងច្រើនទៀត ដែលត្រូវធ្វើតេស្ត។ ដូច្នេះ ខ្ញុំគ្មានអ្វីណែនាំទៅកងកម្លាំងយើង ក្រៅតែពីអនុវត្តតាមការណែនាំរបស់ប្រមុខរដ្ឋាភិបាល និងក្រសួងសុខាភិបាល ៣កុំ និង៣ការពារនិងចាក់វ៉ាក់សាំងនោះទេ។ បន្ថែមពីនេះ យើងទាំងអស់គ្នាជាកងកម្លាំង ត្រូវតែមានវិន័យ និងគោរពវិន័យឱ្យបានទាំងអស់គ្នា»។
កាលពីថ្ងៃ ១០ ឧសភា មន្ត្រីនាំពាក្យអគ្គស្នងការដ្ឋាននគរបាលជាតិ បានឱ្យដឹងថា កងកម្លាំងនគរបាលអន្តរាគមន៍ជាង ៨០ នាក់ ជាក្រុមប្រចាំការនៅតំបន់ក្រហមដែលជាទីតាំងមានប្រជាពលរដ្ឋឆ្លងជំងឺកូវីដ ១៩ ច្រើននោះបានរកឃើញចំនួនមន្ត្រីនគរបាល ដែលប្រចាំការខាងលើនោះ មានផ្ទុកជំងឺកូវីដ ១៩៕
