ភ្នំពេញៈ មនុស្សចំនួន ៦៤ នាក់ថ្មីទៀត ត្រូវបានរកឃើញលទ្ធផលវិជ្ជមានវីរុសកូវីដ ១៩ ដែលជាអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ ដែលសរុបក្នុងព្រឹត្តិការណ៍នេះ អ្នកឆ្លងកើនឡើងរហូតដល់ ៦១៣ នាក់ ខណៈអ្នកព្យាបាលជាសះស្បើយមានចំនួន ១១ នាក់នៅថ្ងៃទី ៩ ខែ មីនា ឆ្នាំ ២០២១។
យោងតាមរបាយការណ៍របស់ក្រសួងសុខាភិបាលនៅព្រឹកថ្ងៃទី ១០ មីនា ឱ្យដឹងថា ក្នុងចំណោមអ្នកដែលឆ្លងទាំង ៦៤ នាក់ មានជនជាតិខ្មែរចំនួន ៣៩ នាក់ ជនជាតិចិនចំនួន ២៣ នាក់ និងជនជាតិវៀតណាមចំនួន ២ នាក់។ ករណីឆ្លងថ្មីនេះកើតឡើងក្នុងរាជធានីភ្នំពេញ ខេត្តព្រះសីហនុ ព្រៃវែង កណ្តាល និងខេត្តសៀមរាប។
ជាមួយគ្នានេះក៏មានអ្នកជំងឺចំនួន ១១ នាក់ ត្រូវបានព្យាបាលជាសះស្បើយពីជំងឺកូវីដ ១៩ រួមមានជនជាតិចិន ៨ នាក់ ជនជាតិវៀតណាម ២ នាក់ និងជនជាតិខ្មែរម្នាក់។ អ្នកទាំងនេះរស់នៅក្នុងរាជធានីភ្នំពេញ និងត្រូវបានអនុញ្ញាតឱ្យចេញពីមន្ទីរពេទ្យ បន្ទាប់ពីតេស្តលទ្ធផលអវិជ្ជមានកូវីដ ១៩ ចំនួន ២ ដង។
គិតត្រឹមថ្ងៃទី ១០ ខែមីនា កម្ពុជាមានអ្នកជំងឺកូវីដ ១៩ សរុបចំនួន ១ ១២៤ នាក់ ក្នុងនោះអ្នកដែលត្រូវបានព្យាបាលជាសះស្បើយមានចំនួន ៥៤៩ នាក់ និងអ្នកដែលកំពុងសម្រាកព្យាបាលនៅមន្ទីរពេទ្យមានចំនួន ៥៧៤ នាក់។
ដោយមើលឃើញនៅមានអ្នកល្មើសនឹងវិធានការចត្តាឡីស័កនៅតាមទីតាំងឯកជនដែលជាប់ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈលោក ឃួង ស្រេង អភិបាលរាជធានីភ្នំពេញបានចេញវិធានការរឹតបន្តឹងការអនុវត្តវិធានការធ្វើចត្តាឡីស័កទៅលើប្រជាពលរដ្ឋខ្មែរ និងជនបរទេស។
លោកបានបញ្ជាឱ្យប្រធានក្រុមសន្តិសុខការពារគោលដៅចត្តាឡីស័ក ក្រុមគ្រូពេទ្យប្រចាំការ អាជ្ញាធរមូលដ្ឋាន និងគ្រប់ភាគីពាក់ព័ន្ធត្រូវបង្កើនស្មារតីយកចិត្តទុកដាក់គ្រប់គ្រង ឃ្លាំមើល ណែនាំ និងមានចំណាត់ការឱ្យបានទាន់ពេលវេលា ដើម្បីធានាថា ក្រុមបុគ្គលទាំងឡាយដែលកំពុងធ្វើចត្តាឡីស័កស្ថិតក្រោមដែនសមត្ថកិច្ចរបស់ខ្លួន ពិតជាបានអនុវត្តយ៉ាងខ្ជាប់ខ្ជួនតាមវិធានចត្តាឡីស័ក និងការណែនាំរបស់ក្រសួងសុខាភិបាល។
លោកថា៖ «នៅមានក្រុមមនុស្សពាក់ព័ន្ធមួយចំនួនតូចបានល្មើសនឹងវិធាននេះ ដោយអនុវត្តមិនបានពេញលេញដូចជាគេចវេះមិនព្រមសហការជាមួយអាជ្ញាធរមូលដ្ឋាន។ មិនស្តាប់តាមការណែនាំរបស់មន្ត្រីសុខាភិបាល ធ្វេសប្រហែស និងមានបុគ្គលខ្លះបានលួចចេញមកខាងក្រៅក្នុងអំឡុងពេលធ្វើចត្តាឡីស័កដែលអាចបង្កហានិភ័យយ៉ាងធ្ងន់ធ្ងរដល់សហគមន៍ និងសុខភាពសាធារណៈទាំងមូល»។
លោកអភិបាលបញ្ជាក់ថា បុគ្គលដែលគេចវេះពីការធ្វើចត្តាឡីស័ក ឬបុគ្គល ដែលគេចចេញពីទីកន្លែងធ្វើចត្តាឡីស័កនឹងត្រូវទទួលពិន័យអន្តរការណ៍ជាប្រាក់ពី ១ លានដល់ ៥ លានរៀល ព្រមទាំងត្រូវផ្តន្ទាទោសតាមច្បាប់ព្រហ្មទណ្ឌជាធរមាន។
ជាក់ស្តែងសមត្ថកិច្ចក្រុងភ្នំពេញបានឃាត់ខ្លួនមនុស្ស ២ នាក់ យកមកធ្វើចត្តាឡីស័កឡើងវិញកាលពីថ្ងៃទី ៩ ខែមីនា បន្ទាប់ពីពួកគេបានល្មើសនឹងការធ្វើចត្តាឡីស័កនៅផ្ទះ ដោយធ្វើដំណើរទៅផ្សារបឹងកេងកង។
ជាមួយគ្នានេះដែរ អធិការស្រុកល្វាឯម លោក កន សុខកាយ បានសម្រេចបិទភូមិវាលធំ ឃុំពាមឧកញ៉ាអុង ជាបណ្តោះអាសន្ននៅព្រឹកថ្ងៃទី ១០ ខែមីនា ដែលមានខ្នងផ្ទះចំនួន ៣០០ គ្រួសារ ដោយក្នុងភូមិនោះមានផ្ទុះជំងឺកូវីដ១៩។
លោកថា កម្លាំងសមត្ថកិច្ចបានធ្វើការហ៊ុមព័ទ្ធភូមិ និងមិនអនុញ្ញាតឱ្យអ្នកណាចេញក្រៅឡើយដោយខាងគ្រូពេទ្យនឹងយកសំណាកពួកគេទាំងអស់ដើម្បីធ្វើតេស្តរកវីរុសកូវីដ១៩។
ចំណែករដ្ឋបាលស្រុកបាធាយនៃខេត្តកំពង់ចាមបានជូនដំណឹងពីការរកឃើញស្ត្រីជនជាតិខ្មែរម្នាក់មានវិជ្ជមានកូវីដ ១៩ មកលក់ខោអាវនៅក្នុងផ្សារផ្អាវក្នុងឃុំផ្អាវ ស្រុកបាធាយ កាលពីថ្ងៃទី ៥ ខែមីនា និងបានធ្វើតេស្តដឹងលទ្ធផលកាលពីថ្ងៃទី ៨ ក្នុងនោះអ្នកដែលបានប៉ះពាល់ផ្ទាល់ជាមួយនឹងស្ត្រីរូបនេះចំនួន ៣ នាក់ត្រូវបានដាក់ឱ្យធ្វើចត្តាឡីស័ក និងយកសំណាកពិនិត្យផងដែរ។ រដ្ឋបាលខេត្តនេះក៏បានអំពាវនាវឱ្យអ្នកដែលមានការសង្ស័យប៉ះពាល់នឹងស្ត្រីរូបនេះត្រូវធ្វើចត្តាឡីស័ក និងអនុវត្តឱ្យបានត្រឹមត្រូវតាមវិធានសុខាភិបាល។
រដ្ឋបាលខេត្តកំពង់ស្ពឺឯណោះវិញបានជូនដំណឹងពីករណីរកឃើញស្ត្រីម្នាក់មានវីរុសកូវីដ ១៩ ដែលបានមកលក់សម្លៀកបំពាក់នៅក្នុងផ្សារបាត់ដឹងស្រុកឧដុង្គកាលពីថ្ងៃទី ៦ មីនា។
ករណីនេះ រដ្ឋបាលខេត្តបានបិទតូបលក់ដូរសម្លៀកបំពាក់ក្នុងផ្សារនេះចំនួន ១២ តូបជាបណ្តោះអាសន្ន ហើយក្រុមការងារឆ្លើយតបបន្ទាន់ទៅមន្ទីរសុខាភិបាលខេត្តកំពង់ស្ពឺបានចុះយកសំណាកអាជីវករចំនួន ២៥ នាក់ (១៧ នាក់រស់នៅក្នុងស្រុកឧដុង្គ ខេត្តកំពង់ស្ពឺ និង ៨ នាក់ រស់នៅក្នុងខេត្តកណ្តាល)៕