ព្រះសីហនុៈ សាកសពជនរងគ្រោះម្នាក់ក្នុងចំណោម ២ នាក់ ដែលបានបាត់ខ្លួនដោយសារលិចទូកកាលពីថ្ងៃទី ២២ កុម្ភៈ នៅក្បែរកោះរ៉ុងសន្លឹមក្នុងភូមិ-សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុត្រូវបានក្រុមការងាររបស់លោកឧកញ៉ា ទៀ វិចិត្រ រកឃើញកាលពីម្សិលមិញនៅខាងក្រៅពយភ្លើងសញ្ញា ក្រោយកោះរ៉ុងសន្លឹម ។
លោកឧកញ៉ា ទៀ វិចិត្រ បានប្រាប់កាលពីម្សិលមិញថា សាកសពបុរសម្នាក់នោះឈ្មោះ អ៊ុន ម៉ៅ មានស្រុកកំណើតនៅភូមិពង្រ ឃុំរាមអណ្តើក ស្រុក គិរីវង់ ខេត្តតាកែវ ។ ជនរងគ្រោះត្រូវបានរកឃើញនៅក្រៅពយភ្លើងសញ្ញាស្ថិតនៅចំណុច LAT10.32 LONG 103.16 នៅមិនឆ្ងាយប៉ុន្មានពីខាងក្រោយកោះរ៉ុងសន្លឹមទេ។ សាកសពជនរងគ្រោះត្រូវបានរកឃើញនៅម៉ោង ១២ និង ៣៤ នាទីរសៀលថ្ងៃទី ២៤ កុម្ភៈ ឆ្នាំ ២០២០ ។
លោកបានបញ្ជាក់ថា៖ «ក្រុមការងារខ្ញុំរកឃើញសព ហើយខ្ញុំសូមចូលរួមរំលែកទុក្ខក្នុងឧបទ្ទវហេតុនេះ»។
ពាក់ព័ន្ធបញ្ហានេះដែរលោក ជួន ណារិន្ទ ស្នងការនគរបាលខេត្តព្រះសីហនុ បានបញ្ជាក់កាលពីថ្ងៃទី ២៣ កុម្ភៈ ថា ទូក ១ គ្រឿង ដែលលិចនោះជាប្រភេទទូកកន្ទុយវែង និងមានដឹកសម្ភារសំណង់ដូចជា ដែកប្រហែលមានទម្ងន់ពី ១ តោនទៅ ២ តោន រួមនឹងមនុស្សចំនួន ៧ នាក់ផង ប៉ុន្តែក្រោយលិចបានបាត់ខ្លួន ២ នាក់ ខណៈ ៥ នាក់ ត្រូវបានសង្គ្រោះ។ រីឯមូលហេតុគឺដោយសារដឹកធ្ងន់ហើយមានរលកធំៗ និងមានខ្យល់ខ្លាំងផង។
លោកប្រាប់ថា៖ «កន្លែងនោះចំខ្សែទឹកហូរខ្លាំងនៅម្តុំកោះថាសរវាងកោះរ៉ុងសន្លឹម និងផុតពីកោះដែកគោលបន្តិច។ អ៊ីចឹងវាស្ថិតនៅលម្ហដែលមានទឹកហូរខ្លាំង»។
បើតាមលោក ណារិន្ទ ហេតុការណ៍គ្រោះថ្នាក់លិចទូកនេះបានកើតឡើងកាលពីវេលាម៉ោង ៧ ព្រឹកថ្ងៃទី ២២ ខែកុម្ភៈ ឆ្នាំ ២០២០។ ចំណែកជនរងគ្រោះដែលសង្គ្រោះបានរួមមានទី១- ឈ្មោះ ទន ភក្តី ភេទប្រុស អាយុ ២៧ ឆ្នាំ មានស្រុកកំណើតនៅភូមិជ្រោយឫស្សី ស្រុកស្អាង ខេត្តកណ្តាល ទី២- ឈ្មោះ ថា ភារិត ភេទប្រុស អាយុ ២៣ ឆ្នាំ មានស្រុកកំណើតនៅភូមិជ្រោយឫស្សី ស្រុកស្អាង ខេត្តកណ្តាល ទី៣- ឈ្មោះ សឹង រដ្ឋា ភេទប្រុស អាយុ ២៧ ឆ្នាំមានស្រុកកំណើតនៅខេត្តកណ្តាល ទី៤- ឈ្មោះ រ៉ា រ៉ាន់ ភេទប្រុស អាយុ ១៨ ឆ្នាំ មានស្រុកកំណើតនៅខេត្តកណ្តាល។ អ្នកទាំង ៤ នាក់នោះ ជាងផ្សារដែក និងទី៥- ឈ្មោះ ខឹម ហូវ ភេទប្រុស អាយុ ៣៦ ឆ្នាំ (ជាម្ចាស់ទូកឈើដែលលិច) រស់នៅក្រុមទី ៣ ភូមិ-សង្កាត់លេខ ៣ ក្រុង-ខេត្តព្រះសីហនុ។
ដោយឡែកជនរងគ្រោះដែលបាត់ខ្លួន ទី១- ឈ្មោះ ស៊ន ដំ ភេទប្រុស អាយុ ១៦ ឆ្នាំ ជាជាងផ្សារដែកមានស្រុកកំណើតនៅខេត្តកណ្តាល និងទី២- ឈ្មោះ អ៊ុន ម៉ៅ ភេទប្រុស អាយុ ៣៨ ឆ្នាំ (ទើបរកឃើញ) មុខរបរ (ជាកូនដៃទូក) មានស្រុកកំណើតនៅក្នុងភូមិពង្រ ឃុំ រាមអណ្តើក ស្រុកគិរីវង់ ខេត្តតាកែវ ប៉ុន្តែមករស់នៅក្នុងក្រុម ៣ ភូមិ-សង្កាត់ ៣ ក្រុង-ខេត្តព្រះសីហនុ៕