ភ្នំពេញៈ ខណៈដែលជំងឺគ្រុនឈាមកំពុងបង្កការរាតត្បាតយ៉ាងខ្លាំងនៅកម្ពុជានោះ នៅក្នុងមន្ទីរពេទ្យគន្ធបុប្ផាទាំង ៥ ទីតាំងនៅកម្ពុជា ត្រូវបានរកឃើញមានកុមារកើតជំងឺគ្រុនឈាមជិត ៦០០ នាក់ បានចូលសម្រាកព្យាបាលកាលពីថ្ងៃទី ១៧ ខែ មិថុនា។នេះបើតាមទិន្នន័យរបស់មូលនិធិគន្ធបុប្ផាដែលបានផ្សព្វផ្សាយលើ Facebook ផ្លូវការពីម្សិលមិញ។
ដោយសារមន្ទីរពេទ្យគន្ធបុប្ផាព្យាបាលកុមារមិនគិតថ្លៃ ពលរដ្ឋកម្ពុជាភាគច្រើនបាននាំកូនៗដែលមានជំងឺទៅព្យាបាលនៅមន្ទីរពេទ្យនេះទាំង ៥ ទីតាំងនៅកម្ពុជា។ មូលនិធិគន្ធបុប្ផា ក៏បានកត់សម្គាល់ក្នុងរបាយការណ៍ប្រចាំថ្ងៃផងដែរអំពីចំនួនកុមារដែលបានចូលទៅពិនិត្យ និងព្យាបាលទាំង ៥ ទីតាំង ជាពិសេសករណីផ្ទុះជំងឺគ្រុនឈាម។
មូលនិធិនេះបានគូសបញ្ជាក់ថា៖ «តួលេខរបស់មន្ទីរពេទ្យគន្ធបុប្ផាទាំង ៥ ទីតាំង ប្រចាំថ្ងៃចន្ទទី ១៧ ខែ មិថុនា ឆ្នាំ ២០១៩ បានបង្ហាញថា កុមារមានជំងឺចំនួន ៤ ៣០៥ នាក់ ត្រូវបានពិនិត្យនិងព្យាបាលនៅផ្នែកពិគ្រោះជំងឺក្រៅនិងកុមារមានជំងឺធ្ងន់ៗចំនួន ២ ៩៩០ នាក់កំពុងសម្រាកព្យាបាលក្នុងមន្ទីរពេទ្យគន្ធបុប្ផា ក្នុងនោះមាន ៥៧៧ នាក់ ត្រូវបានរកឃើញថា មានជំងឺគ្រុនឈាមធ្ងន់ធ្ងរកំពុងសម្រាកព្យាបាលនៅក្នុងមន្ទីរពេទ្យគន្ធបុប្ផា និង ៨៩ នាក់ ត្រូវបានវះកាត់»។
ជាមួយគ្នានេះ មូលនិធិគន្ធបុប្ផាក៏បានអំពាវនាវឲ្យអាណាព្យាបាលកុមារមេត្តាប្រុងប្រយ័ត្ន និងចូលរួមទប់ស្កាត់ជំងឺគ្រុនឈាម តាមរយៈការការពារកុមារកុំឲ្យមូសខ្លាខាំ។
ចំណែកលោក កែវ សុភ័ត្រា ប្រធានមន្ទីរសុខាភិបាលខេត្តបន្ទាយមានជ័យបានប្រាប់ភ្នំពេញប៉ុស្តិ៍ពីម្សិលមិញថា នៅក្នុងឆ្នាំនេះ ខេត្តបន្ទាយមានជ័យ ករណីជំងឺគ្រុនឈាមកើនឡើងជាង ៣ ដង បើធៀបនឹងឆ្នាំមុន។
លោកបានថ្លែងថា ក្នុងរយៈពេល ៥ ខែ ដើមឆ្នាំ ២០១៩ នេះ មានកុមារ ៧២៨ នាក់ បានកើតជំងឺគ្រុនឈាមក្នុងនោះ ៧០ ភាគរយ ត្រូវបានបញ្ជូនទៅព្យាបាលនៅមន្ទីរពេទ្យគន្ធបុប្ផា កុមារអង្គរខេត្តសៀមរាប។ ប៉ុន្តែគ្មានអ្នកស្លាប់នោះទេនៅក្នុងឆ្នាំនេះ ខណៈរយៈពេលដូចគ្នាកាលពីឆ្នាំមុន មានកុមារកើតជំងឺគ្រុនឈាមត្រឹមតែ ២១៤ ករណី ក្នុងនោះមានកុមារម្នាក់បានស្លាប់។
លោកបានបញ្ជាក់ថា៖ «ទោះជាបែបណាក្ដី ក្រុមមន្ត្រីសុខាភិបាលយើងកំពុងបន្តយុទ្ធនាការផ្សព្វផ្សាយអប់រំអនាម័យ សុខភាព ដល់ប្រជាពលរដ្ឋនៅតាមមូលដ្ឋាន តាមសាលារៀន និងទីសាធារណៈ អំពីវិធានការបង្ការ ទប់ស្កាត់ការឆ្លងរីករាលដាលនៃជំងឺគ្រុនឈាម»។
លោកបន្ថែមថា៖ «វិធានការសំខាន់នោះគឺធ្វើយ៉ាងណាកុំឲ្យមូសខ្លាញីខាំគឺត្រូវស្លៀកពាក់ខោអាវវែងៗ និងត្រូវដេកក្នុងមុងជាប្រចាំ ពិសេសគឺត្រូវសម្អាតបរិស្ថានជុំវិញផ្ទះ និងសហគមន៍របស់យើងឲ្យបានល្អ»។
យោងតាមរបាយការណ៍របស់ក្រសួងសុខាភិបាល ក្នុងរយៈពេល ៥ ខែ ដើមឆ្នាំ ២០១៩ នេះ មានអ្នកកើតជំងឺគ្រុនឈាមចំនួនជាង ១២ ០០០ នាក់ ក្នុងនោះអ្នកជំងឺចំនួន ២១ នាក់បានស្លាប់៕