.jpg)
សមត្ថកិច្ចនគរបាលខេត្តកំពង់ស្ពឺបានរកឃើញអ្នកបើកបររថយន្តធុនធំ ៦ នាក់មានផ្ទុកសារធាតុញៀនបន្ទាប់ពីបើកប្រតិបត្តិការធ្វើតេស្តទឹកនោម។ រូបថត KAMPONG SPEU PROVINCIAL POLICE
កំពង់ស្ពឺៈ សមត្ថកិច្ចនគរបាលខេត្តកំពង់ស្ពឺបានរកឃើញអ្នកបើកបររថយន្តធុនធំ ៦ នាក់មានផ្ទុកសារធាតុញៀនបន្ទាប់ពីបើកប្រតិបត្តិការធ្វើតេស្តទឹកនោមលើអ្នកបើកបររថយន្តកុងតឺន័រនិងរថយន្តយីឌុប ២៨ នាក់ កាលពីថ្ងៃទី ១ ខែមេសា ហើយត្រូវបាននគរបាលយកទៅអប់រំនិងបញ្ឈប់មិនឲ្យបើកបរតទៅទៀត។
លោក សម សាមួន ស្នងការនគរបាលខេត្តកំពង់ស្ពឺបានប្រាប់ភ្នំពេញប៉ុស្ដិ៍ពីម្សិលមិញថា ក្រុមនគរបាលជំនាញរបស់លោកតែងចុះធ្វើតេស្ដទឹកនោមលើអ្នកបើកបររថយន្តជារឿយៗដែលសកម្មភាពបែបនេះត្រូវ
បានអនុវត្តឡើងតាំងពីឆ្នាំ ២០១៧ មកម្ល៉េះ។ ប៉ុន្តែលោកថា ការចុះធ្វើតេស្ដទឹកនោមកាលពីថ្ងៃ ១ ខែមេសាគឺជាប្រតិបត្តិលើកដំបូងនៅក្នុងឆ្នាំ ២០១៩ នេះ។
លោកបានបញ្ជាក់ថា៖ «យើងឆ្មក់ធ្វើ យើងមិនមែនធ្វើរាល់ថ្ងៃទេ យូរៗធ្វើម្ដង យូរៗយើងធ្វើម្ដង វាជាវិធានការរដ្ឋបាល។ យើងធ្វើដូចភ្លៀងរលឹម ហើយប្រហែលជាខែក្រោយយើងធ្វើទៀតហើយដើម្បីជួយកាត់បន្ថយគ្រោះថ្នាក់ចរាចរណ៍ ហើយជាគោលការណ៍ កាលណាយើងពិនិត្យឃើញ (អ្នកបើកបរផ្ទុកសារធាតុញៀន) យើងឈប់ឱ្យបើកហ្មង»។
តាមទំព័រហ្វេសប៊ុករបស់ស្នងការដ្ឋាននគរបាលខេត្តកំពង់ស្ពឺចុះផ្សាយកាលពីថ្ងៃ ១ មេសាថាក្នុងវិធានការពង្រឹងអនុវត្តច្បាប់ចរាចរណ៍ផ្លូវគោកនិងពិនិត្យធ្វើតេស្ដទឹកនោមលើអ្នកបើកបររថយន្តដឹកទំនិញគឺមានការចូលរួមពីនគរបាលផ្នែកចរាចរណ៍ផ្លូវគោក នគរបាលផ្នែកគ្រឿងញៀននិងនគរបាលផ្នែកអន្តរាគមន៍ដោយធ្វើតេស្ដទឹកនោមលើអ្នកបើកបររថយន្តនៅត្រង់ចំណុចផ្លូវជាតិលេខ ៤ ក្នុងភូមិរលាំងសង្កែ សង្កាត់សុព័រទេព ក្រុងច្បារមន ខេត្តកំពង់ស្ពឺ។
លោក សម សាមួន បន្ថែមថា អ្នកបើកបររថយន្តដែលរកឃើញផ្ទុកសារធាតុញៀនទាំង ៦ នាក់ត្រូវបានបញ្ជូនទៅកាន់ការិយាល័យជំនាញប្រឆាំងគ្រឿងញៀននៃស្នងការដ្ឋាននគរបាលខេត្តដើម្បីអប់រំនិងឱ្យពួកគេធ្វើកិច្ចសន្យាបញ្ឈប់ការបើកបរនិងបានឱ្យឪពុកម្ដាយមកធានាយកទៅអប់រំបន្ត។ ចំណែករថយន្តបានឱ្យភាគីក្រុមហ៊ុនមកទទួលនិងធ្វើកិច្ចសន្យាឈប់ឱ្យអ្នកផ្ទុកសារធាតុបើកបរតទៀត។
លោកថា៖ «មិនអាចឱ្យពួកគាត់បើកបរទៀតទេ ដោយសារផ្ទុកសារធាតុញៀន។លើកក្រោយបើយើងពិនិត្យឃើញថា ពួកគាត់នៅតែបើកបរទៀត យើងចាត់ទុកថាពួកគាត់មិនរាងចាល ហើយនឹងអនុវត្តតាមច្បាប់គឺចាប់ហើយបញ្ជូនទៅតុលាការ»។
កាលពីចុងខែមីនាលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានជំរុញឱ្យធ្វើតេស្ដទឹកនោមលើអ្នកបើកបររថយន្តធុនធំដោយលោកសន្និដ្ឋានថាយ៉ាងតិចមាន ១០ ភាគរយបានប្រើសារធាតុញៀនជាហេតុងាយបង្កគ្រោះថ្នាក់ចរាចរណ៍។
លោកថា៖ «អ្នកបើកឡានធំៗហ្នឹង យ៉ាងតិច ១០% ដែលប្រើប្រាស់គ្រឿងញៀនសាកមើលឥឡូវហ្នឹង ព្រោះកន្លងមកយើងធ្លាប់ធ្វើតេស្ដដែរតើ ឥឡូវគួរតែសហការជាមួយក្រុមហ៊ុន ពីព្រោះបើឱ្យគាត់បើក គាត់ទៅបុកគេរញ៉េរញ៉ៃ ពីព្រោះប្រើគ្រឿងញៀន»៕
