ព្រះសីហនុ ៖ រហូតមកដល់ម៉ោង ៨ កន្លះ ព្រឹកថ្ងៃអាទិត្យនេះ ក្រុមអ្នកជួយសង្គ្រោះជនរងគ្រោះ ដោយសារការរលំបាក់អគារសំណង់ ៧ ជាន់ នៅខេត្តព្រះសីហនុ បានរកឃើញសាកសពជនរងគ្រោះចំនួន ១៧ នាក់ និងរងរបួស ២៤ នាក់ ខណៈដែលលោកនាយករដ្ឋមន្ត្រី ហ៊ុន សែន បានប្រកាសផ្តល់ថវិកាជូនជនរងគ្រោះដែលស្លាប់ក្នុងម្នាក់ ៤០ លានរៀល។
លោក យន្ត មីន អភិបាលខេត្តព្រះសីហនុ បានមានប្រសាសន៍យ៉ាងខ្លីប្រាប់ ភ្នំពេញប៉ុស្តិ៍នៅព្រឹកនេះថា៖«រហូតមកដល់ថ្មើរនេះ (ម៉ោង ៨ កន្លះ) តួលេខ គឺ ២៤ និង ១៧ ។ ស្លាប់ ១៧ នាក់ ហើយរបួសធ្ងន់ស្រាល ២៤ នាក់ខ្ញុំរវល់»។
អគារដែលកំពុងសាងសង់កម្ពស់ ៧ ជាន់ បានរលំបាក់នៅម៉ោងប្រមាណជា ៤ ជិតភ្លឺថ្ងៃទី ២២ ខែ មិថុនា ហើយគិតរហូតមកដល់ព្រឹកថ្ងៃអាទិត្យនេះ ក្រុមកម្លាំងជួយសង្គ្រោះ បានបន្តធ្វើការរុករកជនរងគ្រោះ ដែលស្ថិតក្នុងឧបទ្ទវហេតុនៃការរលំបាក់អគារនេះខណៈដែលក្រុមគ្រួសារមួយចំនួន បានបំពេញបែបបទយកសពទៅធ្វើបុណ្យជាបន្តបន្ទាប់។
លោកនាយករដ្ឋមន្ត្រី ហ៊ុន សែន កាលពីយប់មិញ បានសរសេរបង្ហោះនៅលើហ្វេសប៊ុករបស់លោកថា៖ «ជនរួមជាតិជាទីគោរពស្រឡាញ់។ សោដនាដកម្មបាក់អគារនៅខេត្តព្រះសីហនុ គឺជារឿងឈឺចាប់របស់ជាតិយើង ពិសេសក្រុមគ្រួសារ នៃអ្នកដែលបានបាត់បង់ជិវិតដែលជាភរិយា ឬស្វាមី ឬកូន ឬឪពុកម្តាយ។ល។»។
លោក ហ៊ុន សែន បានសរសេរបន្តទៀតថា៖«ដើម្បីចូលរួមមរណៈទុក្ខ និងជួយដល់ជីវភាពក្រុមគ្រួសារក្នុងនាមរាជរដ្ឋាភិបាល ខ្ញុំសម្រេចបញ្ចេញថវិកាជាតិ ជួយដល់ក្រុមគ្រួសារអ្នកស្លាប់ ក្នុងមួយនាក់ ៤០ លាន
រៀល (សែសិបលានរៀល) ១ ម៉ឺនដុល្លារ (១០ ០០០ ដុល្លារ)។ សម្រាប់អ្នកត្រូវរបួសទាំងអស់ត្រូវទទួលបានការព្យាបាលដោយឥតគិតថ្លៃ នៅតាមមន្ទីរពេទ្យរដ្ឋ និងទទួលបានជំនួយក្នុងមួយនាក់ចំនួន ៥ លានរៀល (ប្រាំលានរៀល)។ ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្រ្តីទីស្តីការគណៈរដ្ឋមន្ត្រីទទួលចាត់ចែងថវិកានេះជូនបងប្អូន។ យប់នេះ ខ្ញុំនៅបន្តតាមដានការងាររុករកនិងសង្គ្រោះជាមួយបងប្អូនតទៅទៀត»។
លោកស្រី ជៀប សុធារី អ្នកសម្របសម្រួលអង្គការសិទ្ធិមនុស្សអាដហុក ប្រចាំខេត្តព្រះសីហនុ ប្រាប់ភ្នំប៉ុស្តិ៍ពីកន្លែងកើតហេតុនៅព្រឹកថ្ងៃអាទិត្យនេះថា កំលាំងជំនាញរាប់រយនាក់ បានផ្លាស់វេនគ្នាជួយស្វែងរកជនរងគ្រោះ ពីគំនរអគារបាក់បែកជាបន្តបន្ទាប់រហូតមកដល់ព្រឹកនេះ។
លោកស្រីបន្តថា ការកកាយសំណង់អគារបាក់បែកនេះ ទើបតែធ្វើឡើង បានប្រហែលជា ៣០ ទៅ ៥០ % ប៉ុណ្ណោះ ព្រោះតែគំនរនៃការបាក់បែក មានទំហំធំ ហើយបានបាក់សង្កត់គរលើគ្នា ដូច្នេះ សមត្ថកិច្ចជំនាញ បានប្រើប្រាស់កម្លាំង និងគ្រឿងចក្រជាច្រើនគ្រឿង។
លោកស្រីបញ្ជាក់ថា៖ «កម្លាំងគ្រឿងចក្រ ដែលដឹកកម្ទេកកម្ទីហ្នឹង មានដល់ទៅ ៤-៥ គ្រឿង ហើយអេសស្កាវ៉ាទ័រ មាន ៣ មានអាស្ទូចមួយគ្រឿងទៀត។ អ៊ីចឹងពួកគាត់ខំប្រឹងធ្វើ (ស្វែងរកជនរងគ្រោះ) ព្រោះអីបើការគាស់កកាយហ្នឹង យឺតយ៉ាវ អាចធ្វើឲ្យជនរងគ្រោះ ដែលមានរបួសនៅមានជីវិតហ្នឹង អាចស្ទះដង្ហើម ដោយសារថប់ដង្ហើមនៅក្នុងហ្នឹង»៕