សៀមរាបៈ តាមគម្រោងអាជ្ញាធរជាតិអប្សរានឹងបន្តជួសជុលរចនាសម្ព័ន្ធស្រះទឹកខាងជើងនៃប្រាសាទអង្គរវត្តឱ្យរួចរាល់ក្នុងរយៈពេល ២ ឆ្នាំខាងមុខ បន្ទាប់ពីក្រុមអ្នកជំនាញបានបញ្ចប់កិច្ចការស្រាវជ្រាវបុរាណវិទ្យា និងបានជួសជុលច្រាំងខ្លះនៃស្រះទឹកនេះ។
បើតាមទំព័រហ្វេសប៊ុករបស់អាជ្ញាធរជាតិអប្សរាក្នុងអំឡុងពេលនៃការស្រាវជ្រាវបុរាណវិទ្យា ក្រុមអ្នកជំនាញបានជួសជុលច្រាំងស្រះខាងជើងនៃប្រាសាទអង្គរវត្តនេះបានចំនួន ៥៦ ម៉ែត្ររួចមកហើយ និងបានបូមបញ្ចូលទឹកក្នុងស្រះចំនួន ៦០ ០០០ ម៉ែត្រគុប ដើម្បីឱ្យស្រះនេះមានសោភណភាព។
បើទោះជាផ្នែកខ្លះនៃស្រះត្រូវបានជួសជុលរួច ក៏ជុំវិញបរិវេណស្រះនេះនៅតែបន្តបិទស្បៃខ្មៅមិនទាន់អនុញ្ញាតឱ្យភ្ញៀវទេសចរចូលទៅថតរូបដូចមុនឡើយព្រោះគម្រោងជួសជុល និងលើកតម្លៃរចនាសម្ព័ន្ធស្រះនៅតែបន្តហើយអាចនឹងរួចរាល់នៅ ២ ឆ្នាំក្រោយ។
អាជ្ញាធរអប្សរាបញ្ជាក់ថា៖ «នាឆ្នាំ ២០២១ នេះអាជ្ញាធរជាតិអប្សរានៅសល់កាំជណ្តើរស្រះ ៣ ជ្រុងទៀត ដែលត្រូវពង្រឹង និងកំពុងតែធ្វើកំណាយមើលស្ថានភាពខូចខាតជាក់ស្តែង ដើម្បីលើកគម្រោងជួសជុលបន្ថែមចំនួន ៦៥ ម៉ែត្រឱ្យរួចរាល់ក្នុងពេល ២ ឆ្នាំទៀត»។
លោក ស្រ៊ុន តិច បុរាណវិទូ នៃនាយកដ្ឋានអភិរក្សប្រាសាទក្នុងឧទ្យានអង្គរ និងជាប្រធានគម្រោងជួសជុលរចនាសម្ព័ន្ធស្រះខាងជើងថ្លែងថា ការងារទាំងនេះបានចាប់ផ្តើមកិច្ចការស្រាវជ្រាវតាំងពីឆ្នាំ ២០១៨ និងអនុវត្តការជួសជុលនៅឆ្នាំ ២០២០ ហើយបច្ចុប្បន្នមិនអនុញ្ញាតឱ្យភ្ញៀវចូលថតរូបទីនេះទ។ លោកបន្តថា៖ «ស្របពេលនេះការរាតត្បាតនៃជំងឺកូវីដ១៩មិនមានភ្ញៀវមកទស្សនាទេ។ ម្យ៉ាងវិញទៀត ក៏ទុកឱកាសឱ្យអ្នកជំនាញស្រាវជ្រាវ និងអ្នកជួសជុលងាយស្រួលបំពេញការងារបានល្អផង»។
លោក ស្រ៊ុន តិច បានពន្យល់ជាលក្ខណៈបច្ចេកទេសថា ការអភិរក្សសំណង់បុរាណ គឺក្រុមការងារបច្ចេកទេសមិនអាចកំណត់បានដូចសំណង់សម័យទំនើបនោះទេ ដោយត្រូវការពេលវេលាយូរ ដើម្បីកុំឱ្យបាត់បង់នូវទម្រង់ដើមរបស់ស្រះ ឬសំណង់បុរាណ។
ម្យ៉ាងទៀតលោកថា ក្រុមការងារក៏មិនអាចធ្វើការជួសជុលលឿនពេក ដោយមិនគិតគូរអំពីកិច្ចការស្រាវជ្រាវបច្ចេកទេសបុរាណវិស្វកម្មបុរាណ ឬការប្រើប្រាស់វត្ថុធាតុដើមនោះដែរ។ លោកថា៖ «ដូច្នេះមុននឹងយើងធ្វើពីកន្លែង ១ ទៅកន្លែង ១ យើងត្រូវកំណាយបើកដីមើលឱ្យអស់ពីស្ថានភាពដើមរបស់វា រួចសម្រង់ប្លង់គ្រប់ជ្រុងជ្រោយ រួចសិក្សាប្លង់ តើត្រូវរៀបចំយ៉ាងម៉េចឱ្យដូចទម្រង់ដើម ដែលសំខាន់សម្រាប់កិច្ចការអភិរក្សមិនអាចកែប្រែវាបានទេ»។
បើតាមអាជ្ញាធរជាតិអប្សរា បច្ចុប្បន្នរចនាសម្ព័ន្ធស្រះទឹកខាងជើងនៃប្រាសាទអង្គរវត្តបានខូចខាតទ្រុឌទ្រោមដោយសារថ្មភក់មានប្រតិកម្មខ្លាំងនឹងកម្តៅថ្ងៃជាមួយនឹងទឹកធ្វើឱ្យក្តៅសើមៗ បណ្តាលឱ្យថ្មភក់ងាយសឹករេចរឹល ងាយនឹងបាក់បែក ហើយកន្លែងខ្លះបាត់ថ្ម ដែលធ្វើឱ្យមានចន្លោះប្រហោងបណ្តាលឱ្យទឹកហូរនាំដីច្រោះចូលទៅក្នុងស្រះទឹកនេះ។
ដូច្នេះទើបក្រុមការងារអាជ្ញាធរអប្សរាត្រូវការសិក្សាស្រាវជ្រាវពីវិធីសាស្ត្រពង្រឹង ការបិទចន្លោះប្រហោងយ៉ាងម៉េចដើម្បីកុំឱ្យវាច្រោះបន្តទៀត។ កាលពីឆ្នាំ ២០១៩ អាជ្ញាធរជាតិអប្សរាបានសម្រេចបង្ខះទឹកនៅកសិណខាងជើងប្រាសាទអង្គរវត្តដើម្បីធ្វើកំណាយស្រាវជ្រាវបុរាណវិទ្យា ក៏ដូចជាស្ដារទឹកស្រះនេះផងដែរ៕