.jpg)
ប្រជាពលរដ្ឋសែងត្រីធ្វើប្រហុក នៅខណ្ឌឫស្សីកែវ រាជធានីភ្នំពេញ កាលពីខែមុន។ ហេង ជីវ័ន
ភ្នំពេញ៖ ការនេសាទត្រីសម្រាប់ធ្វើប្រហុកផ្អក នឹងចាប់ផ្តើមជាថ្មីម្តងទៀតនៅដើមខែមករា ឆ្នាំ ២០២០ ប្រសិនបើផ្ទៃមេឃស្រឡះល្អគ្មានភ្លៀងកក់ខែ ឬទទួលរងនូវឥទ្ធិពលព្យុះ ប៉ុន្តែស្ថាប័នជំនាញស្នើឲ្យដោះលែងត្រីគល់រាំងដែលជិតផុតពូជវិញបើនេសាទបានកំពុងនៅរស់។ នេះបើតាមសេចក្ដីជូនដំណឹងរបស់រដ្ឋបាល ជលផល កាលពីថ្ងៃចន្ទ។
សេចក្ដីជូនដំណឹងនោះបានគូសបញ្ជាក់ថា៖ «ដោយផ្អែកទៅលើស្ថានភាពនៃរបបទឹកបឹងទន្លេសាបនាពេលបច្ចុប្បន្ន គន្លងដាយត្រីនៅតាមដងទន្លេសាបក្នុងភូមិសាស្ត្ររាជធានីភ្នំពេញ និងខេត្តកណ្តាល អាចនេសាទត្រីបានច្រើនបន្តទៀត ចាប់ពីថ្ងៃទី ១ ដល់ថ្ងៃទី ៦ ខែ មករា ឆ្នាំ ២០២០ នេះ ប្រសិនបើផ្ទៃមេឃស្រឡះល្អគ្មានភ្លៀងកក់ខែ ឬទទួលរងនូវឥទ្ធិពលព្យុះ»។
ជាមួយគ្នានេះ រដ្ឋបាលជលផលក៏បានអំពាវនាវដល់ប្រជាពលរដ្ឋដែលនិយមធ្វើប្រហុក ផ្អក ទុកជាស្បៀងបម្រុងសម្រាប់បរិភោគប្រចាំឆ្នាំជាលក្ខណៈគ្រួសារ ប្រញាប់រួសរាន់ទៅធ្វើប្រហុកផ្អកនៅក្នុងចន្លោះថ្ងៃដែលបានប្រកាសខាងលើនេះ និងបានស្នើដល់អាជ្ញាធរមូលដ្ឋានសមត្ថកិច្ចគ្រប់ជាន់ថ្នាក់ មេត្តាបង្កលក្ខណៈងាយស្រួល ជូនដល់ប្រជាពលរដ្ឋបានធ្វើដំណើរទៅមកស្នាក់នៅ និងដឹកជញ្ជូនផលិតផលត្រីកុំឱ្យរាំងស្ទះ។
ទន្ទឹមនឹងនេះដែរ រដ្ឋបាលជលផលក៏បានអំពាវនាវដល់ប្រជានេសាទ និងក្រុមអាជីវករដាយត្រីធ្វើការដោះលែងត្រីគល់រាំងដែលជាមច្ឆានិមិត្តរូបនៃព្រះរាជាណាចក្រកម្ពុជា និងជាប្រភេទត្រីរងគ្រោះជិតផុតពូជធ្ងន់ធ្ងរចូលទៅក្នុងទន្លេវិញ ប្រសិនបើត្រីនោះជាប់មង សំណាញ់ ឬអួនហើយនៅរស់នោះ។
យ៉ាងណាក្ដី រដូវប្រមូលផលត្រីសម្រាប់ធ្វើប្រហុក ផ្អក នៅក្នុងឆ្នាំនេះ ត្រូវបានគេកត់សម្គាល់ថា មិនសម្បូរដូចឆ្នាំមុនៗទេ រីឯតម្លៃត្រីក៏ថ្លៃជាងឆ្នាំមុនៗទ្វេដងផងដែរ។ ជាក់ស្ដែងនៅក្នុងវគ្គដំបូងនៃការប្រមូលផលត្រីសម្រាប់ធ្វើប្រហុក ផ្អក ឆ្នាំនេះដែលបានប្រព្រឹត្តទៅកាលពីដើមខែធ្នូកន្លងទៅ ត្រីសម្រាប់ធ្វើប្រហុកត្រូវបានគេលក់ក្នុងតម្លៃចន្លោះ ២ ០០០ រៀល ទៅ ៣ ៥០០ រៀល ក្នុង ១ គីឡូក្រាម ខណៈត្រីសម្រាប់ធ្វើផ្អកត្រូវបានគេលក់ក្នុងតម្លៃពី ៨ ០០០ រៀល ទៅ ១២ ០០០ រៀល ក្នុង ១ គីឡូក្រាម។
ការធ្វើត្រីប្រហុកនៅខណ្ឌឫស្សីកែវកាលពីខែមុន។ហេង ជីវ័ន
អ្នកស្រី អ៊ុក ចន្ធី អាយុ ៤៥ ឆ្នាំ មកពីខេត្តកំពង់ស្ពឺបានប្រាប់ភ្នំពេញប៉ុស្តិ៍ថា កាលពីវគ្គដំបូងគាត់ និងប្ដីរបស់គាត់បាននាំគ្នាមកកាន់តំបន់គន្លងដាយត្រីនៅសង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញម្ដងរួចមកហើយ ដើម្បីទិញត្រីធ្វើប្រហុកទុកសម្រាប់ដោះស្រាយជីវភាពគ្រួសារ។ ប៉ុន្តែដោយសារតម្លៃត្រីប្រហុកនាដើមរដូវកាលនៅឆ្នាំនេះ ថ្លៃខ្ពស់ពេក គឺក្នុង ១ គីឡូក្រាម ថ្លៃពី ៣ ០០០ រៀល ទៅ ៣ ៥០០ រៀល ពួកគាត់ក៏បានសម្រេចចិត្តត្រឡប់ទៅផ្ទះវិញ ដើម្បីរង់ចាំវគ្គបន្ទាប់នៃរដូវត្រីត្រូវ ដែលនឹងមកដល់នាដើមខែមករា ឆ្នាំ ២០២០ នេះ។
អ្នកស្រី ចន្ធី បានសម្ដែងនូវក្ដីរំពឹងថា នៅវគ្គទី ២ នៃរដូវប្រមូលផលត្រីសម្រាប់ធ្វើប្រហុក ផ្អក និងត្រីឆ្អើរឆ្នាំនេះ តម្លៃត្រីអាចនឹងចុះថ្លៃជាងកាលពីវគ្គដំបូង ហើយតាមគន្លងដាយត្រីនីមួយៗ អាចនឹងចាប់ត្រីបានច្រើនជាងវគ្គដំបូងផងដែរ។
អ្នកស្រីបានបញ្ជាក់ថា៖ «នៅក្នុងវគ្គទី ២ នេះ ខ្ញុំនឹងទិញត្រីធ្វើប្រហុកឲ្យបាន ៣០ គីឡូក្រាម និងធ្វើត្រីឆ្អើរឲ្យបាន ៣០០ ចង្កាក់ បើទោះជាតម្លៃត្រីមិនធ្លាក់ចុះក្នុងតម្លៃប្រហាក់ប្រហែលទៅនឹងឆ្នាំមុនៗ ដែលមានតម្លៃពី ១ ២០០ រៀល ទៅ ១ ៥០០ រៀល ក្នុង ១ គីឡូក្រាមក្ដី»។
បើតាមអ្នកស្រី ត្រីសម្បូរ ឬខ្សត់នោះ គឺនៅក្នុងវគ្គទី ២ នេះហើយ ព្រោះជាពេលវេលាមួយដែលត្រីប្រហុកសម្រុកចេញពីបឹងទន្លេសាប ឬប្រព័ន្ធដៃបឹងទន្លេសាប ចុះមកខ្សែទឹកខាងក្រោម។ ប៉ុន្តែរដូវប្រមូលផលត្រីអាចអូសបន្លាយរហូតដល់ដំណាច់ខែមករា ឬដើមខែកុម្ភៈឆ្នាំ ២០២០ នេះ៕
