កំពង់ធំៈ រាជរដ្ឋាភិបាលកម្ពុជានឹងចំណាយថវិកាប្រមាណ ៤ លានដុល្លារអាមេរិក លើ «គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន ២ (LASED II) ដល់ពលរដ្ឋក្រីក្រជាង ៦០០ គ្រួសារ នៅឃុំដូង ស្រុកប្រាសាទបល្ល័ង្ក ខេត្ដកំពង់ធំ ខណៈមានពលរដ្ឋក្រីក្រជាង ៥០០ គ្រួសារហើយ ដែលបានមកធ្វើកិច្ចសន្យាទទួលយកដីនៅក្នុងឆ្នាំនេះ។
លោក សុខ លូ អភិបាលខេត្ដកំពង់ធំបានប្រាប់ភ្នំពេញប៉ុស្ដិ៍កាលពីម្សិលមិញថា គម្រោង LASED II (Land Allocation for Social and Economic Development Project Phase II) នេះ ជាគម្រោងថ្នាក់ជាតិដោយទទួលបានកម្ចីពីធនាគារពិភពលោក និងក្រុមការងារថ្នាក់ជាតិរបស់រាជរដ្ឋាភិបាលបាននិងកំពុងអនុវត្ដគម្រោងនេះទៅតាមខេត្តគោលដៅដែលមានពលរដ្ឋក្រីក្រ ដូចជានៅឃុំដូង ស្រុកប្រាសាទបល្ល័ង្ក ខេត្ដកំពង់ធំនេះជាដើម។
លោកបានថ្លែងថា៖ «ក្នុងគម្រោងថ្នាក់ជាតិដែលមានថវិកា ៤ លានដុល្លារនេះ គឺយើងទទួលបានដើម្បីយកទៅចាត់ចែងអភិវឌ្ឍនៅក្នុងឃុំដូង ស្រុកប្រាសាទបល្ល័ង្កផ្ទាល់តែម្ដង។ ប៉ុន្ដែការចាត់ចែងអភិវឌ្ឍផ្សេងៗដូចជា ហេដ្ឋារចនាសម្ព័ន្ធផ្លូវថ្នល់ សាលារៀន មន្ទីរពេទ្យជាដើមគឺក្រុមការងារថ្នាក់ជាតិជាអ្នកធ្វើដោយផ្ទាល់»។
លោកអភិបាលបានឲ្យដឹងថា បច្ចុប្បន្នខេត្ដកំពង់ធំទើបតែទទួលបានគម្រោង LASED II មួយនេះប៉ុណ្ណោះដែលស្ថិតក្នុងស្រុកប្រាសាទបល្ល័ង្ក។ ក្នុងនោះមានពលរដ្ឋក្រីក្រជាង ៥០០ គ្រួសារ ធ្វើកិច្ចសន្យាទទួលដីសម្បទានពីគម្រោងនេះរួចហើយនៅក្នុងឆ្នាំនេះ។ បច្ចុប្បន្នពលរដ្ឋបានចូលទៅរស់នៅ និងធ្វើស្រែចម្ការ និងដំណាំខ្លះៗលើដីដែលរដ្ឋបានផ្តល់ជូននោះ។
លោក សុខ លូ បានបន្តថាតាមរយៈគម្រោងនេះ រាជរដ្ឋាភិបាលបានផ្ដល់ដីលំនៅឋាន ដីកសិកម្ម ផ្ដល់ពូជដំណាំ និងសម្ភារកសិកម្ម និងកសាងប្រព័ន្ធហេដ្ឋារចនាសម្ព័ន្ធផ្សេងៗនៅតំបន់នោះដើម្បីធ្វើឲ្យជីវភាពពលរដ្ឋមានភាពប្រសើរឡើង។
លោកបន្ថែមថា៖ «ជារួមពលរដ្ឋទាំងអស់ទទួលបានដីលំនៅឋានក្នុងទំហំ ៣០ គុណនឹង ៤០ ម៉ែត្រ រួមនឹងដីកសិកម្មចំនួន ២ ហិកតា ក្នុង ១ គ្រួសារ។ ពលរដ្ឋដែលទទួលបានសម្បទាននេះគឺជាពលរដ្ឋរស់នៅក្នុងទីតាំងគម្រោងនេះដែលក្រីក្រ និងអ្នកគ្មានដីប្រកបរបរចិញ្ចឹមជីវិត»។
ទោះជាយ៉ាងណាលោក សុខ លូ ចង់ឲ្យមានការផ្ដល់គម្រោងបែបនេះដល់ពលរដ្ឋក្រីក្របន្តទៀត បន្ទាប់ពីគម្រោង LASED II ដំបូងនេះ ពីព្រោះនេះគឺជាការជួយពលរដ្ឋក្រីក្រឲ្យមានជីវភាពប្រសើរឡើងវិញហើយក៏ជួយកាត់បន្ថយភាពក្រីក្រនៅកម្ពុជាផងដែរ។
អ្នកស្រី នួន គំនិត នាយផ្នែកសេនាធិការស្រុកប្រាសាទបល្ល័ង្កបានលើកឡើងថា ក្រោយទទួលបានដីសម្បទានពីគម្រោង LASEDII នេះពលរដ្ឋមានការសប្បាយរីករាយ និងនាំគ្នាប្រឹងប្រែងបង្កបង្កើនផលលើដីនោះហើយនេះក៏ជាការជួយកាត់បន្ថយការធ្វើចំណាកស្រុកទៅធ្វើការបរទេសផងដែរ។
អ្នកស្រីបានបញ្ជាក់ថា៖ «កាលពីដើមឡើយពលរដ្ឋក្នុងស្រុកភូមិនេះមានជីវភាពខ្វះខាតខ្លាំងណាស់ ពួកគាត់មិនមានដីសម្រាប់ធ្វើផ្ទះ និងធ្វើស្រែ។ ប៉ុន្ដែឥឡូវក្រោយទទួលបានដីសម្បទាននេះពលរដ្ឋសប្បាយចិត្ដ និងកំពុងនាំគ្នាចាប់ផ្ដើមដាំដុះដំណាំបណ្ដើរៗហើយ»។
លោក ជុន ចេន មេឃុំដូង ដែលស្ថិតក្នុងស្រុកប្រាសាទបល្ល័ង្កបានឲ្យដឹងដែរថា ពលរដ្ឋក្រីក្រសរុបជាង ៦០០ គ្រួសារ ត្រូវទទួលបានដីសម្បទានពីគម្រោង LASED II នេះ ខណៈបច្ចុប្បន្នមានប្រមាណ ៥៥១ គ្រួសារ បានមកធ្វើកិច្ចសន្យាទទួលយកដី។ ចំណែកអ្នកមិនទាន់ទទួលបានដោយសារតែការធ្វើចំណាកស្រុកទៅធ្វើការនៅប្រទេស ថៃ ជាដើម។ ប៉ុន្ដែពេលត្រឡប់មកវិញ អាជ្ញាធរនៅតែផ្ដល់សម្បទានដល់ពួកគាត់ដដែល។
លោកថ្លែងថា៖ «ពលរដ្ឋនៅទីនេះប្រកបរបរធ្វើស្រែចម្ការ ប៉ុន្ដែភាគច្រើនខ្វះខាតដីធ្វើស្រែ និងមានខ្លះទៀតគឺគ្មានដីតែម្ដង។ ដូច្នេះគម្រោងនេះបានជួយដល់ជីវភាពពួកគាត់ច្រើនណាស់ពេលនេះពលរដ្ឋសប្បាយចិត្ដកំពុងនាំគ្នាដាំដំណាំផ្សេងៗលើដីរបស់ពួកគាត់»។
លោក ដោក ដូម៉ា អគ្គនាយករងនៃអគ្គនាយកដ្ឋានលំនៅឋាននៃក្រសួងរៀបចំដែនដី នគរូបនីយកម្ម និងសំណង់ និងជានាយកគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហានទី ២ នេះធ្លាប់បានប្រាប់ភ្នំពេញប៉ុស្ដិ៍កាលពីខែកក្កដាកន្លងទៅនេះថា រាជរដ្ឋាភិបាលគ្រោងនឹងពង្រីកគម្រោងនេះនៅជំហាន ៣ (LASEDIII) ទៀតនៅឆ្នាំ ២០២០-២០២៥ ខាងមុខក្នុងទំហំទឹកប្រាក់ពី ៦០ ទៅ ៩០ លានដុល្លារអាមេរិក នៅក្នុងខេត្ដគោលដៅចំនួន ៥ រួមមានខេត្តកំពង់ធំ មណ្ឌលគិរី រតនគិរី ស្ទឹងត្រែង និងខេត្តព្រះវិហារ ដែលមានពលរដ្ឋប្រមាណ ១៨ ០០០ គ្រួសារ៕