.jpg)
ដីកាសម្រេចបញ្ចប់មុខតំណែង លោក ឡាក់ ប៊ុនធីម លេខាធិការរដ្ឋបាល ថ្នាក់លេខ ៧ ពីនាយករងរដ្ឋបាលសាលាក្រុងច្បារមន មកជាមន្ត្រីនៃរដ្ឋបាលក្រុងច្បារមន ទាក់ទងនឹងរឿងទាត់កញ្ច្រែងលក់ព្រីងរបស់ប្រជាពលរដ្ឋ។ រូបថត រដ្ឋបាលខេត្តកំពង់ស្ពឺ
កំពង់ស្ពឺ៖ រដ្ឋបាលក្រុងច្បារមន ចេញដីកាសម្រេចបញ្ចប់មុខតំណែង លោក ឡាក់ ប៊ុនធីម លេខាធិការរដ្ឋបាល ថ្នាក់លេខ ៧ ពីនាយករងរដ្ឋបាលសាលាក្រុងច្បារមន មកជាមន្ត្រីនៃរដ្ឋបាលក្រុងច្បារមន ហើយកាលពីម្សិលមិញទាក់ទងនឹងរឿងទាត់កញ្ច្រែងលក់ព្រីងរបស់ប្រជាពលរដ្ឋ។
លោក ហុក ម៉ារ៉ាឌី អភិបាលក្រុងច្បារមន ប្រាប់ ភ្នំពេញ ប៉ុស្តិ៍ នៅព្រឹកនេះថា លោក ឡាក់ ប៊ុនធីម បានអាងអំណាចតួនាទី ទៅទាត់កញ្ច្រែងលក់ព្រីងរបស់ប្រជាពលរដ្ឋឱ្យកំពប់ទៅលើដី ដែលកំហុសនេះ រដ្ឋបាលក្រុងមិនអាចលើកលែងបានឡើយ។ លោកថ្លែងថា៖ «ក្រុមប្រឹក្សាវិន័យបានរកឃើញថា កំហុសដែលគាត់សាងឡើងនោះ គឺខុសវិជ្ជាជីវៈក្នុងតួនាទីមុខតំណែងដែលគាត់កំពុងធ្វើនោះ»។
លោក វ៉ី សំណាង អភិបាលខេត្តកំពង់ស្ពឺ បានសរសេរបង្ហោះលើបណ្តាញសង្គមហ្វេសប៊ុករបស់លោកកាលពីម្សិលមិញថា ក្នុងនាមថ្នាក់ដឹកនាំខេត្ត មិនគាំទ្រចំពោះទង្វើរបស់មន្ត្រី ដែលយកតួនាទីភារកិច្ចទៅអនុវត្តខុសវិជ្ជាជីវៈ ខុសក្រមសីលធម៌ រហូតធ្វើឲ្យប្រជាពលរដ្ឋស្លូតត្រង់ស្រក់ទឹកភ្នែកនោះឡើយ។
លោកបញ្ជាក់ថា៖ «ក្នុងន័យនេះខ្ញុំ ក៏សូមអំពាវនាវយ៉ាងទទូចដល់ពុកម៉ែមាមីងបងប្អូនទាំងអស់ដែលប្រកបរបររកទទួលទាន សូមមេត្តាស្ដាប់តាមការណែនាំរបស់អាជ្ញាធរ ដើម្បីធ្វើយ៉ាងណាយើងអាចរក្សាបាននូវសណ្ដាប់ធ្នាប់សាធារណៈ ដែលបង្កឡើងដោយភាពអនាធិបតេយ្យរបស់បងប្អូនយើងមួយចំនួនតូច»។
ក្រោយពីបានឃើញហ្វេសប៊ុករបស់ពលរដ្ឋបានបង្ហោះរឿងសន្តិសុខ ផ្សារកំពង់ស្ពឺ បានទាត់កញ្ច្រែងក្មេងស្រីលក់ព្រីង បណ្ដាលឱ្យកំពប់ទៅលើដី កាលពីថ្ងៃទី ២០ ខែឧសភា លោក វ៉ី សំណាង បានសម្តែងការរន្ធត់ និងសោកស្ដាយយ៉ាងខ្លាំង ចំពោះទង្វើអសីលធម៌បែបនេះ។
លោកអភិបាលខេត្តកំពង់ស្ពឺ កាលពីថ្ងៃទី ២០ ឧសភា បានទៅជួបផ្ទាល់ជាមួយក្មេងស្រីដែលត្រូវបានគេទាត់កញ្ច្រែងព្រីង និងផ្តល់នូវសម្ភារៈមួយចំនួន សម្រាប់រួមចំណែកសម្រួលដល់ការលំបាករបស់គាត់កន្លងមក។
លោកថ្លែងថា៖ «ក្នុងនាមក្រុមប្រឹក្សាខេត្ត គណៈអភិបាលខេត្ត និងខ្លួនខ្ញុំផ្ទាល់ ខ្ញុំសូមអភ័យទោសចំពោះទង្វើដែលមិនគប្បីរបស់សន្តិសុខផ្សារកំពង់ស្ពឺ ដែលបានប្រព្រឹត្តបែបនេះ»។
លោក វ៉ី សំណាង សំណូមពរយ៉ាងទទូចដល់បងប្អូនអាជីវករក៏ដូចជាប្រជាពលរដ្ឋទាំងអស់សូមមេត្តារក្សាឲ្យបាននូវសណ្ដាប់ធ្នាប់សាធារណៈដោយចៀសវាងគិតតែប្រយោជន៍ខ្លួន ភ្លេចអំពីផលប៉ះពាល់ដល់ប្រយោជន៍អ្នកដទៃ ដែលគាត់ត្រូវការប្រើប្រាស់ផ្លូវ៕
វីដេអូ៖
