សីហនុៈ រដ្ឋបាលក្រុងព្រះសីហនុនឹងចាត់វិធានការក្ដៅចំពោះអ្នកលក់ដូរអនាធិបតេយ្យជិត ១០០ តូប និងរទេះចាប់ពីថ្ងៃទី ១៧ ខែមិថុនា តទៅ បន្ទាប់ពីអ្នកលក់ដូរទាំងនេះបាននាំគ្នាសាងសង់តូប និងដាក់រទេះលក់ដូរបង្កផលប៉ះពាល់ដល់បរិស្ថានសណ្ដាប់ធ្នាប់តាមចិញ្ចើមផ្លូវ និងទីសាធារណៈក្នុងក្រុងជាប់មាត់សមុទ្រមួយនេះបើទោះបីជាអ្នកលក់ដូរទាំងនេះបានធ្វើការតវ៉ាពីម្សិលមិញក៏ដោយ។
លោក លឹម ភត្រី មន្ដ្រីរដ្ឋបាលក្រុងព្រះសីហនុទទួលបន្ទុករដ្ឋបាលសាធារណៈបានថ្លែងប្រាប់ភ្នំពេញប៉ុស្ដិ៍ពីម្សិលមិញថា លោក និងមន្ដ្រីសាលាក្រុងបានចុះអប់រំផ្សព្វផ្សាយដល់អ្នកលក់ដូរទាំងជិត ១០០ តូប និងរទេះនេះមិនឱ្យមានការលក់ដូរចល័តគ្រប់ប្រភេទលើចំណីផ្លូវ និងលើផ្លូវបន្តទៀតឡើយ។
លោកថា៖ «តាមបទបញ្ជារបស់រដ្ឋបាលខេត្ដ និងក្រុងព្រះសីហនុ ដាច់ខាតត្រូវតែចាត់វិធានការក្តៅចាប់ពីថ្ងៃទី ១៧ ខែមិថុនា ឆ្នាំ ២០២០ នេះតទៅ មិនឱ្យមានការលក់ដូរបែបអនាធិបតេយ្យបែបនេះទៀតឡើយ។ ករណីមិនអនុវត្តតាមនឹងចាប់យករទេះលក់ដូរ និងសម្ភារមករក្សាទុកនៅសាលាក្រុងព្រះសីហនុបណ្ដោះអាសន្ន»។
លោក ភត្រី ឲ្យដឹងថា ការលក់ដូរបែបអនាធិបតេយ្យនៅលើចំណីផ្លូវ និងទីសាធារណៈបែបនេះ គឺបានបង្កផលប៉ះពាល់ជាច្រើនទៅដល់សាធារណជន និងអ្នកទេសចរក្នុងនោះអ្នកលក់ដូរទាំងនេះបានចោលសំរាម និងបង្កភាពខ្វះអនាម័យនៅទីតាំងដែលលក់ដូរនោះផងដែរ។
លោកបន្ថែមថា ក្រោយពេលអាជ្ញាធរក្រុងព្រះសីហនុបានចុះផ្សព្វផ្សាយ និងណែនាំដល់អ្នកលក់ដូរខាងលើរួចមកនៅព្រឹកម្សិលមិញអ្នកលក់ដូរប្រមាណ ៤០ នាក់ បាននាំគ្នាមកតវ៉ានៅសាលាក្រុងព្រះសីហនុ ចំពោះចំណាត់ការក្ដៅនេះដែរ ប៉ុន្ដែរដ្ឋបាលក្រុងមិនបានបោះបង់ជំហរនៃចំណាត់ការក្ដៅនេះឡើយ។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុថ្លែងថា៖ «ចំពោះវិធានការរបស់រដ្ឋបាលក្រុងព្រះសីហនុលើការរៀបចំសណ្ដាប់ធ្នាប់ អនាម័យផ្សេងៗក្នុងក្រុងនេះគឺរដ្ឋបាលក្រុងបានធ្វើជាប្រចាំ មិនមែនធ្វើតែលើករណីអាជីវករលក់ដូរលើចំណីផ្លូវនេះទេ»។
លោកស្រី ជៀប សុធារី មន្ដ្រីសម្របសម្រួលសមាគមសិទ្ធិមនុស្សអាដហុកប្រចាំខេត្ដព្រះសីហនុបានឱ្យដឹងថា ការទៅតវ៉ានៅមុខសាលាក្រុងរបស់អ្នកលក់ដូរទាំងនោះមិនទទួលបានការបកស្រាយណាមួយពីរដ្ឋបាលក្រុងឡើយ។
លោកស្រីបានថ្លែងថា៖ «ខ្ញុំគិតថា អាជ្ញាធរគួរតែពិចារណាដែរក្នុងការរកទីកន្លែងសមរម្យណាមួយ ដើម្បីឱ្យពួកគាត់បន្តមុខរបរលក់ដូរចិញ្ចឹមជីវិតបាន ព្រោះពួកគាត់សុទ្ធតែជាប្រជាពលរដ្ឋក្រីក្រ ចិញ្ចឹមជីវិតដោយពឹងផ្អែកលើមុខរបរលក់ដូរបែបនេះ»។
លោកស្រីឱ្យដឹងថា ព្រោះតែបញ្ហាការរីករាលដាលជំងឺកូវីដ១៩ ធ្វើឱ្យពលរដ្ឋបាត់បង់មុខរបរ និងការងារធ្វើជាច្រើន ដូច្នេះទើបមានពលរដ្ឋមកពីបណ្ដាខេត្ដផ្សេងមកកាន់ខេត្តព្រះសីហនុ ដើម្បីប្រកបរបរលក់ដូរនៅតាមទីសាធារណៈបែបនេះ។
លោកស្រីបានលើកឡើងថា ពលរដ្ឋទាំងនេះមិនមានសមត្ថភាពដើម្បីទៅជួលទីតាំង ឬតូបលក់ដូរនៅក្នុងខេត្ត ក្រុងព្រះសីហនុបានទេ ពួកគាត់អាចត្រឹមប្រកបរបរចល័តបែបនេះប៉ុណ្ណោះ។ ដូច្នេះរដ្ឋបាលខេត្ដ ក្រុង គួរមានវិធានការណាមួយក្នុងការជួយសម្រួលដល់ការប្រកបរបរចិញ្ចឹមជីវិតរបស់ពួកគាត់៕