.jpg)
រដ្ឋបាលខេត្ដព្រះសីហនុ កំពុងសិក្សាពង្រីកការស្ថាបនាស្ថានីយប្រព្រឹត្តិកម្មទឹកកខ្វក់បន្ថែម ខណៈស្ថានីយចំនួន ២ ក្នុងនោះស្ថានីយទី១ ស្ថាបនារួច ១០០ ភាគរយ និងស្ថានីយទី២ សម្រេចបាន ៨៤% ភាគរយ។ រូបថត រដ្ឋបាលខេត្តព្រះសីហនុ
ព្រះសីហនុ៖ រដ្ឋបាលខេត្ដព្រះសីហនុ ក្រោយពីស្ថាបនាផ្លូវចំនួន ៣៤ ខ្សែ ប្រវែងសរុប ៨៤ គីឡូម៉ែត្រ សម្រេចបាន ១០០ ភាគរយហើយ បច្ចុប្បន្នកំពុងសិក្សាពង្រីកស្ថានីយប្រព្រឹត្តិកម្មទឹកកខ្វក់ទី៣ បន្ថែម ខណៈស្ថានីយចំនួន ២ ក្នុងនោះស្ថានីយទី១ ស្ថាបនារួច ១០០ ភាគរយ និងស្ថានីយទី២ សម្រេចបាន ៨៤% ភាគរយ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ២៨ ខែឧសភានេះ បានដឹកនាំក្រុមការងាររួមមានលោក លោក ថោង ខុន រដ្ឋមន្ត្រីក្រសួងទេសចរណ៍ លោក សាយ សំអាល់ រដ្ឋមន្ត្រីក្រសួងបរិស្ថាន និងលោក គួច ចំរើន អភិបាលខេត្តព្រះសីហនុ បានចុះពិនិត្យវឌ្ឍនភាពនៃការស្ថាបនាហេដ្ឋារចនាសម្ព័ន្ធនានា ស្ថិតនៅក្នុងខេត្តព្រះសីហនុ។
លោកបានថ្លែងក្នុងពេលចុះពិនិត្យវឌ្ឍនភាពនៃការស្ថាបនាហេដ្ឋារចនាសម្ព័ន្ធនានានេះថា ខ្សែផ្លូវ និងរចនាសម្ព័ន្ធឧបសម្ព័ន្ធសម្រេចស្ទើរតែទាំងស្រុង។ ស្ថានីយប្រព្រឹត្តិកម្មទឹកកខ្វក់ទី២ ដែលប្រើបច្ចេកវិទ្យាចុងក្រោយបំផុត និងមានសមត្ថភាពប្រព្រឹត្តិកម្មទឹកកខ្វក់ ៧ ២០០ ម៉ែត្រគុប ក្នុង ១ ថ្ងៃ សម្រេចបាន ១០០ ភាគរយ។ ស្ថានីយប្រព្រឹត្តិកម្មទឹកកខ្វក់ទី១ ដែលមានសមត្ថភាពប្រព្រឹត្តិកម្មទឹកកខ្វក់ ៥ ២០០ មែត្រគុប ក្នុង ១ ថ្ងៃ សម្រេចបាន ៨៤ ភាគរយ។
លោកបានបន្តថា៖ «គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា (គ.អ.ឆ.ក.) ក៏កំពុងពិនិត្យលទ្ធភាពស្ថាបនាស្ថានីយប្រព្រឹត្តិកម្មទឹកកខ្វក់ទី៣ មួយទីតាំងទៀត ដើម្បីដោះស្រាយការបង្ហូរទឹកកខ្វក់ទៅក្នុងសមុទ្រ»។
រដ្ឋបាលខេត្ដព្រះសីហនុបញ្ជាក់ថា ការចុះពិនិត្យវឌ្ឍនភាពនៃការស្ថាបនាហេដ្ឋារចនាសម្ព័ន្ធនានា ស្ថិតនៅក្នុងខេត្តព្រះសីហនុ មានដូចជាស្ថានីយអាងប្រព្រឹត្តិកម្មចម្រោះទឹកកខ្វក់ និងបន្ទប់ទឹកសាធារណៈតាមបណ្តោយឆ្នេរសមុទ្រជាដើម ដើម្បីត្រៀមរៀបចំទទួលភ្ញៀវទេសចរជាតិ អន្តរជាតិ និងអ្នកវិនិយោគិនក្រោយពេលបិទបញ្ចប់ការរាតត្បាតនៃជំងឺកូវីដ ១៩ នាពេលខាងមុខ។
រដ្ឋបាលខេត្ដបញ្ជាក់ថា គិតមកដល់ថ្ងៃទី ២៨ ខែឧសភា ការងារចាក់បេតុងផ្លូវទាំង ៣៤ ក្នុងខេត្ដព្រះសីហនុ សម្រេចបាន ១០០% ការងារអ៊ុតកៅស៊ូបេទីម កម្រាស់ ៧០ មិល្លីម៉ែត្រ សម្រេចបាន ១០០%។ ការងារគំនូសចរាចរណ៍សម្រេចបាន ១០០% ការងារដំឡើងស្លាកសញ្ញាចរាចរណ៍សម្រេចបាន ១០០% ការងារដំឡើងបង្គោលភ្លើងបំភ្លឺផ្លូវសម្រេចបាន ១០០% ការងារដាំដើមឈើសម្រេចបាន ១០០% ការងារបន្ទប់ទឹកសាធារណៈសម្រេចបាន ៩៣% ការងារបំពាក់កាមេរ៉ាសុវត្ថិភាពសម្រេចបាន ៦០% ការងារធ្វើផ្លូវប្របឆ្នេរអូរឈើទាលកាត់តាមពយតាមូង សម្រេចបាន ៩៥%។
ខេត្ដព្រះសីហនុជាខេត្តមួយនៃភាគនិរតី ដែលរាជរដ្ឋាភិបាលកម្ពុជា ចាត់ទុកជាប៉ូលសេដ្ឋកិច្ចមួយក្នុងចំណោមប៉ូលសេដ្ឋកិច្ច ២ ទៀត គឺរាជធានីភ្នំពេញ ខេត្តសៀមរាប ដែលរាជធានី-ខេត្ដទាំងនេះ ជាតំបន់សេដ្ឋកិច្ចពិសេសគំរូពហុបំណងតែមួយសម្រាប់កម្ពុជា ក្នុងការស្រូបយកនូវកំណើនសេដ្ឋកិច្ច វិនិយោគ និងទេសចរណ៍នាពេលខាងមុខ។
ផ្លូវចំនួន ៣៤ ខ្សែ ដែលបានស្ថាបនារួចរាល់ក្នុងខេត្តព្រះសីហនុមានប្រវែងសរុប ៨៤ គីឡូម៉ែត្រនេះ រាជរដ្ឋាភិបាលបានប្រើប្រាស់កញ្ចប់ថវិកាសរុប ២៩៤ លានដុល្លារសហរដ្ឋអាមេរិក ក្នុងការស្ថាបនាជាផ្លូវគំរូទី១ នៅកម្ពុជា។
ផ្លូវទាំង ៣៤ ខ្សែនេះ បានចាប់ផ្ដើមបើកការដ្ឋានសាងសង់កាលពីថ្ងៃទី ១៦ ខែ វិច្ឆិកា ឆ្នាំ ២០១៩ ដោយមានប្រតិបត្តិករមកពីក្រុមហ៊ុនចំនួន ៦ និង ២ អង្គភាពកងវិស្វកម្មសម្តេចតេជោ ហ៊ុន សែន សៀមរាប និងអង្គភាពកងវិស្វកម្មលេខ ៧៨ ស្ពានថ្នល់នៃក្រសួងការពារជាតិ៕
