ភ្នំពេញ៖ អាជ្ញាធរខេត្តកណ្តាលបានត្រៀមរៀបចំកន្លែងសម្រាប់ធ្វើជាទីផ្សារបោះដុំបន្លែបណ្តោះអាសន្ន ជំនួសឱ្យផ្សារដើមគរ ដែលត្រូវបានផ្អាកជាបណ្តោះអាសន្នរយៈពេល ១៤ ថ្ងៃ បន្ទាប់ពីរកឃើញមានអាជីវករផ្សារដើមគរប្រមាណ ១០០ នាក់ ឆ្លងវីរុសកូវីដ ១៩។
រដ្ឋបាលខេត្តកណ្តាលបានឱ្យដឹងនៅថ្ងៃអាទិត្យនេះថា ក្រុមការងារនៃអាជ្ញាធរខេត្តកណ្តាលបានត្រៀមទីតាំងសម្រាប់ធ្វើជាទីផ្សារបោះដុំបន្លែបណ្តោះអាសន្ន ជំនួសឱ្យផ្សារដើមគ ស្របតាមការស្នើសុំរបស់សាលារាជធានីភ្នំពេញ។
លោក គង់ សោភ័ណ្ឌ អភិបាលខេត្តកណ្តាល បានសរសេរលើបណ្តាញសង្គមហ្វេសប៊ុករបស់លោកកាលពីយប់ថ្ងៃសៅរ៍ ទី១៧ ខែមេសាថា ស្របតាមការស្នើសុំរបស់សាលារាជធានីភ្នំពេញ នាវេលាយប់ថ្ងៃសៅរ៍ ថ្ងៃទី ១៧ ខែមេសា លោករួមនឹងគណៈអភិបាលរងខេត្ត និងមន្រ្តីជំនាញពាក់ព័ន្ធ បានចុះត្រួតពិនិត្យទីតាំងត្រៀមសម្រាប់ធ្វើជាផ្សារបោះដុំបន្លែបណ្តោះអាសន្ន ជំនួសឱ្យផ្សារដើមគរ។
គួរបញ្ជាក់ថា អាជ្ញាធររាជធានីភ្នំពេញបានចេញសេចក្តីសម្រេចផ្អាកការលក់ដូរបណ្តោះអាសន្ននៅទីតាំងផ្សារដើមគ និងផ្សារបន្លែ ដែលស្ថិតនៅជុំវិញតំបន់ប្រជុំជនផ្សារដើមគ ក្នុងខណ្ឌទួលគោក និងខណ្ឌបឹងកេងកង រយៈពេល ១៤ ថ្ងៃ គឺចាប់ពីថ្ងៃទី ១៨ ដល់ថ្ងៃទី ១ ខែឧសភា។
ការផ្អាកនេះ បន្ទាប់ពីប៉ុន្មានថ្ងៃចុងក្រោយនេះ ក្រសួងសុខាភិបាលបានរកឃើញករណីវិជ្ជមានវីរុសកូវីដ ១៩ លើអាជីវករ និងអ្នកពាក់ព័ន្ធផ្សេងទៀតនៅផ្សារដើមគរប្រមាណ ១០០ នាក់ ក្នុងព្រឹត្តិការណ៍សហគមន៍ ២០ កុម្ភៈ ដែលប៉ុន្មានថ្ងៃនេះ បានឆ្លងរាលដាលយ៉ាងឆាប់រហ័សគួរឱ្យព្រួយបារម្ភ ហើយដែលស្ថានភាពនេះ ត្រូវចាត់វិធានការសុខាភិបាល ដើម្បីទប់ស្កាត់ចំពោះមុខជាបន្ទាន់៕