កោះកុងៈ រដ្ឋបាលខេត្ដកោះកុងសម្រេចដោះស្រាយគោលនយោបាយដល់ប្រជាពលរដ្ឋចំនួន ១៣១ គ្រួសារ ដែលរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុនស៊ីណូម៉ិចស៊ីមស្ថិតនៅភូមិជីត្រេះ ឃុំអណ្តូងទឹក ស្រុកបទុមសាគរ តាមរយៈការផ្ដល់ដីលំនៅឋាន និងដីចម្ការដល់ពួកគាត់។
លោក សុខ សុទ្ធី អភិបាលរង និងជាអ្នកនាំពាក្យរដ្ឋបាលខេត្ដកោះកុងកាលពីថ្ងៃទី ២៥ ឧសភា បានដឹកនាំកិច្ចប្រជុំជាមួយអាជ្ញាធរឃុំ ស្រុក ប្រធានមន្ទីរបរិស្ថាន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី នាយកទីចាត់ការអន្តរវិស័យ ការិយាល័យរៀបចំដែនដីនគរូបនីយកម្ម សំណង់ និងភូមិបាលស្រុកពាក់ព័ន្ធនឹងបញ្ហាដីធ្លីរវាងពលរដ្ឋចំនួន ១៣១ គ្រួសារ ដែលរងផលប៉ះពាល់ពីគម្រោងវិនិយោគអភិវឌ្ឍន៍របស់ក្រុមហ៊ុនស៊ីណូម៉ិចស៊ីមស្ថិតនៅភូមិជីត្រេះឃុំអណ្តូងទឹក ស្រុកបទុមសាគរ។
លោក សុទ្ធី ប្រាប់ ភ្នំពេញ ប៉ុស្ដិ៍ ពីម្សិលមិញថា៖ «បញ្ហាដីធ្លីពលរដ្ឋចំនួន ១៣១ គ្រួសារ នៅស្រុកបទុមសាគរនេះ ក្រោយពីយើងបានសិក្សាលម្អិតឃើញថា មានការណែនាំពីក្រសួងដែនដី ក្រសួងបរិស្ថាន នាពេលកន្លងមកហើយ គឺយើងទទួលស្គាល់ពួកគាត់ជាពលរដ្ឋរស់នៅជាក់ស្ដែងនៅភូមិជីត្រេះនេះ និងផ្ដល់គោលនយោបាយផ្ដល់ដីលំនៅឋាន និងដីចម្ការដល់ពួកគាត់»។
បើតាមលោក សុទ្ធី ជាគោលការណ៍របស់រដ្ឋបាលខេត្ដ គឺនឹងផ្ដល់ដីលំនៅឋាន និងដីចម្ការដល់ពលរដ្ឋទាំង ១៣១ គ្រួសារនេះ ដោយក្នុងនោះពលរដ្ឋក្នុង ១ គ្រួសារនឹងទទួលបានដីលំនៅឋាន ទំហំទទឹង ២០ ម៉ែត្រ និងបណ្ដាយ ៧០ ម៉ែត្រសម្រាប់ប្រជាពលរដ្ឋរស់លើផ្លូវទី ១ និងទទឹង ២០ ម៉ែត្រ បូកនឹងបណ្ដោយ ១០០ ម៉ែត្រ សម្រាប់ពលរដ្ឋរស់ផ្លូវទី ២ នៃភូមិជីត្រេះ។ រីឯដីចម្ការពលរដ្ឋក្នុង ១ គ្រួសារៗនឹងទទួលបានចំនួន ១,៥ ហិកតាដូចគ្នា។
ដីដែលផ្ដល់ឱ្យប្រជាពលរដ្ឋនេះ គឺជាដីកាត់ចេញពីតំបន់ឧទ្យានជាតិបទុមសាគរ ហើយបច្ចុប្បន្នស្ថិតនៅក្រោមការគ្រប់គ្រងរបស់រដ្ឋបាលខេត្ដ។ តាមរយៈគោលនយោបាយដែលរដ្ឋបាលខេត្ដដាក់ចេញនេះ ប្រជាពលរដ្ឋមានការសាទរ ព្រោះទទួលបានទាំងដីលំនៅឋាន និងដីចម្ការ។
លោកថា៖ «ពលរដ្ឋពួកគាត់សាទរចំពោះគោលនយោបាយនេះ បើសិនជាមិនមានអ្នកនាំភ្លើង (អ្នកញុះញង់) នៅពីក្រោយនាំឱ្យពលរដ្ឋមិនសុខចិត្ដ។ ពលរដ្ឋ គឺពួកគាត់ទទួលយកគោលនយោបាយនេះដោយរីករាយ»។
បើតាមលោក សុខ សុទ្ធី ទាក់ទិននឹងការអនុវត្ដគោលនយោបាយបែងចែកដីធ្លីដល់ប្រជាពលរដ្ឋនាពេលកន្លងមក នៅក្នុងមូលដ្ឋានខេត្ដកោះកុងគឺមានក្រុមបុគ្គលទី ៣ ជាអ្នកញុះញង់ប្រជាពលរដ្ឋមិនឱ្យទទួលយកតាមការគោលនយោបាយរបស់រដ្ឋបាលខេត្ដ។
លោកបញ្ជាក់ថា៖ «បុគ្គលទី៣ ជាអ្នកញុះញង់ព្រោះអ្នកទាំងនោះ មានការទិញ-លក់ និងចូលទៅទន្ទ្រានដីនៅក្នុងតំបន់នោះកាលពីពេលកន្លងមក ហើយរដ្ឋបាលខេត្ដយើងមិនមានការទទួលស្គាល់ដីបុគ្គលទាំងនោះទេ»។
លោក ថោង ច័ន្ទតារា មន្ដ្រីសម្របសម្រួលសមាគមសិទ្ធិមនុស្សអាដហុក ប្រចាំខេត្ដកោះកុងបានឯកភាព ចំពោះគោលនយោបាយរបស់រដ្ឋបាលខេត្ដ ក្នុងការផ្ដល់ដីលំនៅឋាន និងដីចម្ការដល់ពលរដ្ឋទាំង ១៣១ គ្រួសារ ដែលរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុនស៊ីណូម៉ិចស៊ីមនេះ។
លោកថ្លែងថា៖ «យើងសប្បាយចិត្ដតាមរយៈគោលនយោបាយផ្ដល់ដីដល់ពលរដ្ឋបែបនេះ ប៉ុន្ដែអ្វីដែលយើងព្រួយបារម្ភនោះគឺការបែងចែកដីមិនស្មើភាព ដល់ពលរដ្ឋដែលរស់នៅជាក់ស្ដែង»។
ភ្នំពេញ ប៉ុស្ដិ៍ មិនមានប្រភពទំនាក់ទំនងដើម្បីសុំអត្ថាធិប្បាយទៅតំណាងពលរដ្ឋដែលនឹងទទួលបានដីគោលនយោបាយនេះនៅឡើយទេ៕