.jpg)
លោក អ៊ុន ចាន់ដា (មុខគេកណ្តាល) ពេលចុះពិនិត្យស្ថានភាពនៅភូមិសំបូរ ឃុំសំបូរ ស្រុកបាធាយ នៅព្រឹកថ្ងៃទី ២៣ មេសា។ រូបថត រដ្ឋបាលខេត្តកំពង់ចាម
រដ្ឋបាលខេត្តកំពង់ចាម បានសម្រេចបិទខ្ទប់ជាបណ្តោះអាសន្ននូវភូមិមួយចំនួន នៅព្រឹកថ្ងៃសុក្រនេះ ដោយគ្មានការកំណត់ បន្ទាប់ពីរកឃើញមានប្រជាពលរដ្ឋក្នុងភូមិទាំងនោះមានឆ្លងជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ។
សេចក្តីសម្រេចរបស់រដ្ឋបាលខេត្តកំពង់ចាមនៅថ្ងៃទី ២៣ មេសានេះបានឱ្យដឹងថា ភូមិសំបូរ ដែលស្ថិតក្នុងស្រុកបាធាយត្រូវបិទខ្ទប់ទាំងស្រុងចាប់ពីថ្ងៃទី ២៣ ខែមេសា ឆ្នាំ ២០២១ រហូតដល់មានការជូនដំណឹងឡើងវិញ។
ចំណែកភូមិទ្រា ស្ថិតក្នុងឃុំស្វាយពោធិ៍ ស្រុកស្រីសន្ធរ និងភូមិកំផ្លាក់ ស្ថិតក្នុងឃុំបារាយណ៍ ស្រុកស្រីសន្ធរ ខេត្តកំពង់ចាម ក៏ត្រូវបានប្រកាសបិទខ្ទប់បណ្តោះអាសន្នចាប់ពីថ្ងៃទី ២៣ មេសានេះតទៅ ដោយមិនកំណត់រយៈពេលបើកវិញផងដែរ។ នេះបើតាមសេចក្តីសម្រេចរបស់រដ្ឋបាលខេត្ត ចុះហត្ថលេខាដោយ លោក អ៊ុន ចាន់ដា អភិបាលខេត្តកំពង់ចាម។
រដ្ឋបាលខេត្តកំពង់ចាមបានឱ្យដឹងនៅព្រឹកនេះពីការរកឃើញវិជ្ជមានកូវីដ១៩ ចំនួន ០៣ នាក់លើបុរសជនជាតិខ្មែរអាយុ ២៥ ឆ្នាំរស់នៅភូមិកំផ្លាក់ ឃុំបារាយណ៍ ស្រុកស្រីសន្ធរ និងក្រុមគ្រួសារអ្នកជំងឺកូវីដ១៩ ឈ្មោះ ហួរ ហ៊ា ចំនួន ០២ នាក់រស់នៅភូមិទ្រា ឃុំស្វាយពោធិ៍ ស្រុកស្រីសន្ធរ៕
