The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋបាលខេត្ត​កំពង់ឆ្នាំង​ប្រាប់​ពលរដ្ឋ​ឱ្យ​ប្រយ័ត្ន​ក្នុង​ការទិញ​ដី ខណៈ​មាន​ជនខិលខូច​បន្លំ​លក់​ដី​រដ្ឋ

រដ្ឋបាលខេត្ត​កំពង់ឆ្នាំង​ប្រាប់​ពលរដ្ឋ​ឱ្យ​ប្រយ័ត្ន​ក្នុង​ការទិញ​ដី ខណៈ​មាន​ជនខិលខូច​បន្លំ​លក់​ដី​រដ្ឋ

Content image - Phnom Penh Post
សាលាខេត្ត​កំពង់ឆ្នាំង​ដែល​ប្រាប់​ពលរដ្ឋ​ឱ្យ​ប្រយ័ត្ន​ក្នុង​ការទិញ​ដី​។ រូបថត រដ្ឋបាលខេត្ត​កំពង់ឆ្នាំង

រដ្ឋបាលខេត្ត​កំពង់ឆ្នាំង​ប្រាប់​ពលរដ្ឋ​ឱ្យ​ប្រយ័ត្ន​ក្នុង​ការទិញ​ដី ខណៈ​មាន​ជនខិលខូច​បន្លំ​លក់​ដី​រដ្ឋ

កំពង់ឆ្នាំងៈ រដ្ឋបាលខេត្ត​កំពង់ឆ្នាំង​បាន​ប្រាប់​ពលរដ្ឋ​ឱ្យ​ប្រុងប្រយ័ត្ន​ក្នុង​ការទិញ​ដី ដើម្បី​កុំឱ្យ​ចាញ់បោក​ជនខិលខូច ដែល​បន្លំ​លក់​ដី​រដ្ឋ ហើយ​បើ​ជ្រុលខ្លួន​ទិញ​ដី​រដ្ឋ​រួចហើយ​ត្រូវយក​ឯកសារ​ទៅ​បង្ហាញ​ដល់​អង្គភាព​គ្រប់គ្រង​ទ្រព្យសម្បត្តិ​រដ្ឋ ដើម្បី​ដោះស្រាយ បើ​មិន​ដូច្នោះ​ទេ​នឹង​ត្រូវ​ចាត់ទុក​ជា​អ្នក​ឃុបឃិត​ចូលរួម​ប្រព្រឹត្ត​បទល្មើស​លួច​លក់​ដី​រដ្ឋ​។

សេចក្តី​ជូនដំណឹង​របស់​រដ្ឋបាលខេត្ត​កំពង់ឆ្នាំង​ចេញ​កាលពី​ថ្ងៃទី ​៥ ខែមីនា បានឱ្យ​ដឹងថា កន្លងមក​មាន​បុគ្គល​ម្នាក់​បាន​យក​ឯកសារ​ខុសច្បាប់​ទៅប្រើ​ប្រាស់ ដើម្បី​រំលោភ​យក​ដី​រដ្ឋ ដែល​គ្រប់គ្រង​ដោយ​សាលាខេត្ត​មាន​ទីតាំង​ស្ថិតនៅ​ភូមិ​ម៉ុង​បារាំង សង្កាត់​ប្អេរ ក្រុង​កំពង់ឆ្នាំង ដើម្បី​ពុះច្រៀក​ដី​ជា​ឡូត៍​លក់​ក្នុង​គោលបំណង​បោកប្រាស់​។ លិខិត​បញ្ជាក់ថា​៖ «​តាម​ឯកសារ​ដែល​ប្រមូលបាន បុគ្គល​ល្មើស​បាន​ប្រើប្រាស់​កលល្បិច​ឱ្យ​ពលរដ្ឋ​ចូល​ភាគហ៊ុន​ជា​ថ្នូរ​ទទួល​បាន​ដី​នេះ​»​។

ករណីនេះ​ក៏មាន​ពលរដ្ឋ​មួយចំនួន​តូច​បាន​ភាន់ច្រឡំ​ហើយ​បាន​ចូលរួម​ជាមួយ​បុគ្គល​នោះ​ផងដែរ​។ ដោយសារ​តែ​ហេតុ​ដូច្នេះហើយ ទើប​គណៈកម្មាធិការ​គ្រប់គ្រង​ដី​រដ្ឋ​ថ្នាក់​ខេត្ត សូមឱ្យ​ពលរដ្ឋ​កុំ​ភាន់ច្រឡំ ហើយ​ធ្វើតាម​កលល្បិច​ភូតកុហក​របស់​ជន​នោះ និង​សូមកុំ​ទិញ​ដី​នេះ​ពីព្រោះ​វា​ជាការ​លក់​ដី​រដ្ឋ​ខុសច្បាប់ ដែល​អាច​ធ្វើឱ្យ​មាន​ការខាតបង់​ប្រាក់កាស​។

លោក​ ម៉ុន វុត្ថា នាយក​ទីចាត់ការ​ហិរញ្ញវត្ថុ និង​ជា​អ្នកគ្រប់គ្រង​ទ្រព្យសម្បត្តិ​រដ្ឋ ខេត្តកំពង់ឆ្នាំង ថ្លែងថា កន្លងមក​រដ្ឋបាលខេត្ត បាន​ស្នើសុំ​រាជរដ្ឋាភិបាល ដោះដូរ​ពន្ធនាគារ​ខេត្ត​ពី​កណ្តាល​ក្រុង​យក​ទៅ​ដាក់​នៅ​ជាយក្រុង​ចម្ងាយ​ប្រមាណ​ ១២ ឬ​ ១៣ ​គីឡូម៉ែត្រ​ដោយ​ទទួលបាន​ការឯកភាព​ពី​រដ្ឋាភិបាល​នៅ​ឆ្នាំ​ ២០១៨​។

ប៉ុន្តែ​ជនខិលខូច​បាន​លួច​លក់​ដី​ទីតាំង​បម្រុង​ទុក​នេះ​តាំងពី​ឆ្នាំ​ ២០១៥ ដោយ​មិនមាន​អ្នកណា​ដឹង​។

លោក​បញ្ជាក់ថា​៖ «​ក្រោយមក​ទើប​ដឹង គឺ​ដឹង​នៅពេល​យើង​ធ្វើ​បណ្ណ​កម្មសិទ្ធិ ព្រោះ​បើ​យោងតាម​សារាចរ​ណែនាំ​របស់​រាជរដ្ឋាភិបាល ទោះបី​ស្ថាប័នរដ្ឋ​ក៏ដោយ ត្រូវតែ​ធ្វើ​បណ្ណ​កម្មសិទ្ធិ​ដែរ តែ​ដល់ពេល​ធ្វើទៅ​ក៏មាន​ការប្តឹង​ជំទាស់​។ ដី​រដ្ឋ​សោះ​មាន​អ្នកប្តឹង​ជំទាស់​ក៏ស្រាវជ្រាវ​មើល​ឯកសារ​ទៅបាន​ឃើញ​សកម្មភាព​មិនប្រក្រតី​កើតចេញពី​មន្ត្រី​របស់​យើង​ម្នាក់​ជាមួយនឹង​ឈ្មួញ​»​។

លោក វុត្ថា បន្តថា ក្រោយពី​ទទួល​បាន​ការអនុញ្ញាត​ពី​រាជរដ្ឋាភិបាល​ឆ្នាំ​ ២០១៨ ទើប​មានការ​បង្កើត​គណៈកម្មការ​អន្តរក្រសួង ដើម្បី​វាយតម្លៃ​ដី​ទៅតាម​នីតិវិធី​នៃ​ច្បាប់ ហើយ​បាន​អនុវត្ត​ជា​បន្តបន្ទាប់​រហូតមក​ដល់​ឆ្នាំ​ ២០២០ ទើប​មាន​ការចុះ​កុងត្រា​មួយ ដើម្បី​ដោះដូរ​ដី រវាង​ភាគី​ឯកជន និង​រដ្ឋបាលខេត្ត លើ​គម្រោង​ចំនួន​ ៤២​។

លោក​បញ្ជាក់ថា នៅពេល​បំពេញ​លក្ខខណ្ឌ​នៅលើ​គម្រោង​ទាំង​ ៤២ ​នោះ​រួច​ទើប​រដ្ឋបាលខេត្ត​អាច​សម្រេច​ដោះដូរ​ដី​ ៣ ​កន្លែង​ដែល​មាន​ដី​បម្រុង​ទុក​ ១ ​កន្លែង ដី​ពន្ធនាគារ ១ ​កន្លែង និង​ការិយាល័យ​ពន្ធនាគារ ១ ​កន្លែង​ជាមួយ​គម្រោង​ចំនួន​ ៤២​ នោះបាន​។ ប៉ុន្តែ​មិនទាន់បាន​បំពេញ​នីតិវិធី​ចប់សព្វគ្រប់​ផង ភាគី​ទទួល​ការងារ​នោះ បែរ​ជា​ទៅយក​ដី​បម្រុង​ទុក​របស់​រដ្ឋ​ដែល​មាន​ទំហំ ៤ ៣៥១ ​ម៉ែត្រការ៉េ ច្រៀក​ពុះ​ជា​ឡូត៍​លក់​ទៅវិញ​។

លោក​បញ្ជាក់ថា​៖ «​អាហ្នឹង​វារឹតតែ​ខុស​ ១ ​ទៀត​កាល​ឆ្នាំ​ ២០១៥ ខុស​ម្តង​ហើយ ដែល​យើង​ទើប​ដឹង​ដល់​អាក្រោយ​នេះ យើង​មិនទាន់​អនុវត្ត​នីតិវិធី​ចប់សព្វគ្រប់​ទៅ​តាម​គោលការណ៍​ផ្លូវច្បាប់​ផង គាត់​បែរ​ទៅ​ពុះ​ច្រៀក​បំបែក​ដី​លក់ ក្រោមរូបភាព​វិនិយោគ​។ អ៊ីចឹង​វា​ខុស​ជាន់​លើ​ខុស អាហ្នឹង​បើ​យើង​និយាយ​តាមផ្លូវ​ច្បាប់​»​។

បើតាម​លោក ម៉ុន វុត្ថា ក្នុង​រឿងនេះ រដ្ឋបាលខេត្ត​បានដាក់​ពាក្យបណ្តឹង​ទៅកាន់​ស្ថាប័ន​តុលាការ ដើម្បី​អនុវត្ត​ច្បាប់​។ ក្រៅពីនោះ​ក៏​បាន​ជូនដំណឹង​ដល់​សាធារណជន សូមកុំ​ទិញ​ដី​ដែល​នៅ​ជា​កម្មសិទ្ធិ​របស់​រដ្ឋ​។ ក្នុងករណី​ជ្រុល​មាន​ការពាក់ព័ន្ធ​សូម​បង្ហាញ​ឯកសារ​ទាក់ទង​ទាំងអស់​ទៅ​ការិយាល័យ​គ្រប់គ្រង​ទ្រព្យសម្បត្តិ​រដ្ឋ​របស់​រដ្ឋបាល​ខេត្ត ដើម្បី​ដោះស្រាយ​តាម​នីតិវិធី​។

លោក​បាន​លើកឡើង​ថា​៖ «​បើសិន​ជា​គាត់​ (​អ្នកទិញ​ដី​រដ្ឋ​) ​មិន​បង្ហាញ​ឯកសារ ហើយ​លួចលាក់ ឬក៏​បិទបាំង​ផ្សំគំនិត នោះ​នឹងត្រូវ​ចាត់ទុក​ដូច​អ្នក​គិត​ផ្សំគំនិត​ (​លួច​លក់​ដី​រដ្ឋ​) ​ដែរ​។ តែ​បើសិនជា​គាត់​យក​ឯកសារ​ហ្នឹង​មក​រាយការណ៍​ដល់​អាជ្ញាធរ នោះ​ជា​ការចូលរួម​សហការ ការងារ​ជាមួយ​អាជ្ញាធរ​ក្នុងការ​ថែរក្សា​ដី​រដ្ឋ​»៕

អត្ថបទគួរចាប់អារម្មណ៍