កំពង់ឆ្នាំង៖ នៅថ្ងៃទី ២៤ ខែ មេសា ឆ្នាំ ២០២១ នេះ រដ្ឋបាលខេត្តកំពង់ឆ្នាំងបានសម្រេចបិទជាបណ្ដោះអាសន្នផ្សារសាលាលេខ ៥ ស្ថិតនៅក្នុងភូមិសាស្ត្រឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង ដោយមូលហេតុរកឃើញអ្នកមានវិជ្ជមានកូវីដ ១៩ ចំនួន ៤ នាក់។ នេះបើយោងតាមសេចក្ដីប្រកាសព័ត៌មានរបស់រដ្ឋបាលខេត្តកំពង់ឆ្នាំង ដែល ភ្នំពេញ ប៉ុស្តិ៍ ទទួលបាននៅមុននេះ។
នៅក្នុងសេចក្ដីប្រកាសព័ត៌មាននោះ លោក ឈួរ ច័ន្ទឌឿន អភិបាលខេត្តកំពង់ឆ្នាំង បានគូសបញ្ជាក់ថា៖ «ការបិទជាបណ្តោះអាសន្នទីតាំងផ្សារខាងលើនេះ ដើម្បីទប់ស្កាត់ការរាលដាលជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ បន្ទាប់ពីរដ្ឋបាលខេត្តបានទទួលលទ្ធផលពីវិទ្យាស្ថានសុខភាពសាធារណៈរកឃើញអ្នកវិជ្ជមានជំងឺកូវីថ ១៩ ចំនួន ៤ នាក់ នៅថ្ងៃទី ២៣ ខែ មេសា ឆ្នាំ ២០២១»។
ជាមួយគ្នានេះ លោកក៏បានចេញបទបញ្ជាឲ្យអាជ្ញាធរ និងកងកម្លាំងមានសមត្ថកិច្ច រដ្ឋបាលស្រុកកំពង់ត្រឡាចមានភារកិច្ចរៀបចំបិទបណ្តោះអាសន្នផ្សារសាលាលេខ ៥ ស្របតាមលក្ខណៈបច្ចេកទេស និងនីតិវិធី ព្រមទាំងមានភាពហ្មត់ចត់ចាប់ពីថ្ងៃទី ២៤ ខែមេសា នេះតទៅ រហូតដល់មានបញ្ជាថ្មី។
លោកក៏បានអំពាវនាវឲ្យប្រជាពលរដ្ឋដែលមានរោគសញ្ញាសង្ស័យ និងអ្នកពាក់ព័ន្ធផ្ទាល់ ឬប្រយោលជាមួយអ្នកឆ្លងជំងឺកូវីដ ១៩ ទាំង ៤ នាក់នោះ សូមអញ្ជើញមកជួបក្រុមការងារ ដើម្បីយកសំណាកទៅធ្វើតេស្តជាបន្ទាន់ នៅមន្ទីរពេទ្យបង្អែកកំពង់ត្រឡាចចាប់ពីថ្ងៃទី ២៤ ខែ មេសា ឆ្នាំ ២០២១ នេះតទៅ រៀងរាល់ពេលម៉ោងធ្វើការ និងត្រូវធ្វើចត្តាឡីស័កស្របតាមការណែនាំរបស់ក្រសួងសុខាភិបាល៕