.jpg)
លោក វ៉ី សំណាង អភិបាលខេត្តកំពង់ស្ពឺ អញ្ជើញចុះពិនិត្យមើលការរៀបចំផ្សារបណ្ដោះអាសន្នមួយកន្លែង ដើម្បីចូលរួមទប់ស្កាត់ការឆ្លងរីករាលដាលជំងឺកូវីដ ១៩។ រូបថត រដ្ឋបាលខេត្តកំពង់ស្ពឺ
កំពង់ស្ពឺ៖ រដ្ឋបាលខេត្តកំពង់ស្ពឺ កាលពីថ្ងៃទី ៣ ខែឧសភា បានណែនាំទៅដល់សមត្ថកិច្ចពាក់ព័ន្ធទាំងអស់រៀបចំផ្សារសុវត្ថិភាពជាបណ្ដោះអាសន្ន ដើម្បីធានាឱ្យបាននូវមុខរបរ និងបង្ការការឆ្លងជំងឺកូវីដ ១៩ ដែលកំពុងរាតត្បាតខ្លាំង។
យោងតាមសេចក្តីណែនាំរបស់រដ្ឋបាលខេត្តកំពង់ស្ពឺបានឲ្យដឹងថា៖ «ផ្សារសុវត្ថិភាពនេះរៀបចំដើម្បីធានារក្សាបាននូវសណ្តាប់ធ្នាប់សាធារណៈ សុវត្ថិភាពសង្គម ជាពិសេសសុខុមាលភាពសាធារណៈ»។
រដ្ឋបាលខេត្តកំពង់ស្ពឺបានឱ្យដឹងថា ផ្សារមួយចំនួនតូចក៏បានរៀបចំហើយ និងកំពុងបន្តរៀបចំបន្ថែមទៀត រួមទាំងផ្សារមិនរៀបរយផងដែរ។ គោលការណ៍ និងវិធាននៃការរៀបចំនេះធ្វើឡើង គ្រប់ផ្សារនៅក្នុងភូមិសាស្ត្រខេត្តកំពង់ស្ពឺទាំងអស់ ត្រូវរៀបចំឲ្យមានច្រកចូល និងច្រកចេញ ត្រូវរៀបចំឲ្យមានប្រព័ន្ធស្កេន QR Code ម៉ាស៊ីនវាស់កម្ដៅ សម្ភារសម្រាប់ដាក់បាញ់អាល់កុល កំណត់គម្លាតសុវត្ថិភាព កំណត់ចំនួនអ្នកចូលមិនឱ្យលើស ៥០ ភាគរយនៃចំនួនផ្ទុកសរុបក្នុងផ្សារក្នុងមួយពេល កត់ត្រាឈ្មោះ និងលេខទូរស័ព្ទអ្នកចូលផ្សារ និងបុគ្គលគ្រប់រូបត្រូវពាក់ម៉ាស់ជាប្រចាំ លើកលែងពេលបរិភោគអាហារ។
សេចក្តីណែនាំបានបញ្ជាក់ទៀតថា រដ្ឋបាលខេត្តក៏បានណែនាំឲ្យរៀបចំឲ្យមានទឹកក្ដៅនៅលើតុអាហារដ្ឋាននៅក្នុងផ្សារសម្រាប់សម្លាប់មេរោគលើចាន ស្លាបព្រា និងកែវ ដែលគ្រប់អាជីវករ ឬម្ចាស់អាជីវកម្មត្រូវពង្រឹងគុណភាពសេវាកម្ម អនាម័យ បរិស្ថាន និងរក្សាតម្លៃឲ្យបានសមរម្យ។
បរិវេណបន្ទប់ទឹកត្រូវមានអនាម័យ និងសម្អាតជាប្រចាំ ចំពោះទីតាំងនានាដែលអតិថិជនធ្លាប់បានប៉ះពាល់ និងត្រូវរៀបចំឱ្យមានសាប៊ូ និងអាល់កុលលាងដៃនៅច្រកចូល ឬច្រកចេញបន្ទប់ទឹក និងទីតាំងចាំបាច់ផ្សេងទៀត។ មិនអនុញ្ញាតឲ្យលក់គ្រឿងស្រវឹង។
សេចក្ដីណែនាំនេះឱ្យដឹងថា៖ «(សមត្ថកិច្ចពាក់ព័ន្ធនៅតាមផ្សារ) ត្រូវជូនដំណឹងមកអាជ្ញាធរមូលដ្ឋានបន្ទាន់នូវរាល់ករណីសង្ស័យដែលជាប់ពាក់ព័ន្ធនឹងជំងឺកូវីដ ១៩ បន្ទាប់ពីស្កេន QR Code»។
រដ្ឋបាលខេត្តក៏បានព្រមានផងដែរថា ក្នុងករណីមិនបានអនុវត្តត្រឹមត្រូវតាមការណែនាំ អាជីវករ ម្ចាស់អាជីវកម្មអាចប្រឈមទៅនឹងការបិទអាជីវកម្ម និងវិធានការច្បាប់ជាធរមាន។
លោក វ៉ី សំណាង អភិបាលខេត្តកំពង់ស្ពឺបានប្រាប់ ភ្នំពេញ ប៉ុស្តិ៍ នៅថ្ងៃទី ៤ ខែឧសភាថា ការរៀបចំផ្សារសុវត្ថិភាពក្នុងភូមិសាស្ត្រខេត្តកំពង់ស្ពឺ គឺតម្រូវឱ្យបុគ្គលគ្រប់រូបត្រូវគោរពតាមវិធានសុខាភិបាល ជាពិសេសវិធាន «៣ កុំ ៣ ការពារ»។
លោកបញ្ជាក់ថា៖ «ទាំងអ្នកទិញ និងអ្នកលក់ សំណូមពរច្រើនឲ្យយើងរៀបចំ ព្រោះពួកគាត់បារម្ភពីសុវត្ថិភាព។ យើងបានស្វែងរកដីទំនេរ ដែលនៅជិតផ្សារទាំងនោះ ដើម្បីរៀបចំជាផ្សារសុវត្ថិភាព ស្របពេលម្ចាស់ទីតាំងដី ក៏បានចូលរួមដល់វិធានការនេះ ដោយបានផ្តល់ទីតាំងដី ដោយមិនគិតថ្លៃផងដែរ»។
លោកថា៖ «ការរៀបចំស្តង់ដាផ្សារសុវត្ថិភាព ក៏ធានាដល់មុខរបរប្រចាំថ្ងៃ ដើម្បីចៀសវាងមានករណីឆ្លងរីករាលដាល ដែលធ្វើឲ្យផ្សារទាំងនោះត្រូវបានផ្អាក ហើយប៉ះពាល់ដល់មុខរបររបស់ប្រជាពលរដ្ឋ»។
លោក វ៉ី សំណាង បានឲ្យដឹងថា មកដល់ពេលនេះ ផ្សារដែលត្រូវបានរៀបចំតាមស្តង់ដាសុវត្ថិភាពរួចរាល់ ១០០ ភាគរយ គឺមានផ្សារកំពង់ស្ពឺ និងមានផ្សារជាច្រើន កំពុងត្រូវបានកែប្រែជាបណ្តើរៗ។ គិតត្រឹមថ្ងៃទី ៤ ខែឧសភានេះ មានផ្សារត្រែងត្រយឹង និងផ្សារកញ្រ្ចែង ត្រូវបានបិទជាបណ្តោះអាសន្ន បន្ទាប់ពីរកឃើញអ្នកមានវិជ្ជមានកូវីដ ១៩ នៅទីនោះ ផ្សារទាំងពីរនេះក៏ត្រូវរៀបចំដូចគ្នាដែរ៕
