.jpg)
រដ្ឋបាលខេត្តកំពង់ស្ពឺបង្កើតផ្សារបណ្តោះអាសន្ន ដើម្បីឱ្យពលរដ្ឋលក់ដូរ អំឡុងវិបត្តិកូវីដ។ រូបថត រដ្ឋបាលខេត្តកំពង់ស្ពឺ
កំពង់ស្ពឺ៖ រដ្ឋបាលខេត្តកំពង់ស្ពឺ បានបង្កើតផ្សារបណ្ដោះអាសន្នមួយ មានទីតាំងនៅទល់មុខផ្សារកំពង់ស្ពឺ ដើម្បីឲ្យប្រជាពលរដ្ឋចូលទៅលក់ដូរដោយមិនគិតថ្លៃ ដែលអាចចាប់ផ្តើមលក់ដូរបានចាប់ពីថ្ងៃទី ២៩ ខែមេសាតទៅ ដោយផ្សារនេះ ទាំងអ្នកលក់ និងអ្នកទិញ ត្រូវរក្សាគម្លាត តាមវិធាន របស់ក្រសួងសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ ១៩។
អភិបាលខេត្តកំពង់ស្ពឺ លោក វី សំណាង បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២៨ ខែមេសានេះថា ផ្សារនោះ ជាទីតាំងផ្សារមួយថ្មីដែលរដ្ឋបាលខេត្តកំពង់ស្ពឺបានបង្កើតក្នុងពេលកន្លងមកមានប្រមាណជាង ២០០ តូប ប៉ុន្តែប្រជាពលរដ្ឋមិនទាន់បានចូលទៅលក់ទេ។
ស្របពេលមានជំងឺកូវីដ ១៩ អាជ្ញាធរយល់ឃើញថា ដើម្បីទប់ស្កាត់ការឆ្លងរីករាលដាលជំងឺកូវីដ ១៩ ក៏រកទីតាំងឲ្យប្រជាពលរដ្ឋជាអ្នកដែលលក់ដូរដោយកញ្ច្រែងធ្លាប់បានដើរលក់នៅជុំវិញទីតាំងផ្សារកំពង់ស្ពឺ ទើបរៀបចំឲ្យពួកគាត់ជាប្រជាពលរដ្ឋទៅលក់ដូរនៅទីនោះ។
លោកថ្លែងថា៖ «បើមិនមានទាស់ខុសអីទេ ស្អែកនេះយើងបើកដំណើរការបានហើយ បើកដំណើរការបានលឿនដោយសារតែទីតាំងនេះពីមុន យើងប្រុងបង្កើតផ្សារម្តងហើយ ប៉ុន្តែបងប្អូនប្រជាពលរដ្ឋគាត់ចេះតែតវ៉ាចេះចុះចេះចុះ គាត់អត់ព្រមទៅលក់នៅទីតាំងហ្នឹង ចឹងឥឡូវស្របពេលដែលមានជំងឺកូវីដ យើងចង់រក្សាគម្លាត យើងឲ្យគាត់ទៅតំបន់ហ្នឹង យើងរៀបចំឲ្យមានសន្តិសុខ រៀបចំឲ្យមានការរក្សាគម្លាត រក្សាសុវត្ថិភាពតាមរយៈ ការបាញ់អាល់កុលវាស់កម្តៅចឹងទៅគាត់ចូលរួម»។
បើតាមលោក វី សំណាង កន្លែងទីតាំងផ្សារថ្មីនោះមានទីវាលស្អាត មានបន្ទប់ទឹក មានអនាម័យ មានកន្លែងចតយានយន្ត ដែលមានភាពងាយស្រួលសម្រាប់អ្នកលក់ និងអ្នកទិញ។
លោកបន្តថា ការអនុញ្ញាតឲ្យប្រជាពលរដ្ឋទៅលក់ដូរដោយមិនគិតថ្លៃនេះ គឺផ្តល់ជូនរហូតដល់កូវីដ ១៩ ត្រូវបានបញ្ជប់ ហើយការរៀបចំកន្លែងដាក់លក់នោះទៀតសោធ គឺត្រូវរក្សាគម្លាតអនុវត្តតាមវិធានសុខាភិបាល។
លោកថ្លែងថា៖ «យើងគូសកន្លែងឲ្យគាត់ដាក់លក់ ហើយមានសន្តិសុខចាំបាញ់អាល់កុល ចាំវាស់កម្តៅ និងធ្វើយ៉ាងណារក្សាគម្លាតពួកគាត់ឲ្យបាន ចៀសវាងការឆ្លងរីករាលដាលជំងឺកូវីដ ១៩»។
នៅព្រឹកថ្ងៃទី ១៨ មេសានេះ លោក វ៉ី សំណាង បានចុះទៅមើល និងគូសគម្លាតសុវត្ថិភាពសង្គម ឲ្យអាជីវករលក់នៅឆ្ងាយៗពីគ្នានៅទីតាំងផ្សារថ្មីនេះ។
លោកថ្លែងថា អ្នកចូលទៅទិញត្រូវនៅឆ្ងាយពីគ្នា ២ ម៉ែត្រ ហើយអ្នកលក់ និងអ្នកលក់ក៏ត្រូវរក្សាគម្លាតដែរ គឺអាជ្ញាធរបានគូសដាក់កំណត់ឲ្យពួកគាត់តែម្តង អ៊ីចឹងពួកគាត់អាចរក្សាគម្លាតសុវត្ថិភាពសង្គមបានទាំងអស់ទាំងអ្នកទិញ និងអ្នកលក់៕
