កំពតៈ រដ្ឋបាលខេត្តកំពតបានចេញលិខិតបង្គាប់ឱ្យក្រុមហ៊ុន សូ ងួន ផ្អាកសកម្មភាពឈូសឆាយ និង កាយព្រំដីក្នុងតំបន់ដែលមានជម្លោះជាមួយក្រុមគ្រួសារអតីតមន្ត្រីយោធានៃបញ្ជាការដ្ឋានការពារកោះឆ្នេរជាបណ្ដោះអាសន្ន ដើម្បីរង់ចាំដំណោះស្រាយដោយសន្តិវិធីពីអាជ្ញាធរខេត្ត។ នេះបើយោងតាមប្រសាសន៍លោក ជាវ តាយ អភិបាលខេត្តកំពតកាលពីថ្ងៃអង្គារ។
លោកថា កាលពីថ្ងៃទី ១៥ ខែ មីនា ឆ្នាំ ២០២១ តំណាងបញ្ជាការដ្ឋានយោធាការពារកោះឆ្នេរបានស្នើសុំកិច្ចអន្តរាគមន៍មកកាន់រដ្ឋបាលខេត្តកំពតឱ្យជួយទប់ស្កាត់សកម្មភាពរបស់ក្រុមហ៊ុនលោកឧកញ៉ា សូ ងួន កុំឱ្យបន្តឈូសឆាយ និងកាយព្រំដីក្នុងតំបន់ដែលមានជម្លោះជាបណ្ដោះអាសន្ន ដើម្បីរង់ចាំដំណោះស្រាយដោយសន្តិវិធីពីអាជ្ញាធរខេត្ត។
លោកថា តាមសេចក្ដីរាយការណ៍ពីតំណាងបញ្ជាការដ្ឋានការពារកោះឆ្នេរ កាលពីថ្ងៃទី ១៤ ខែ មីនា ឆ្នាំ ២០២១ វេលាម៉ោង ៨:៣៥ នាទីព្រឹក ក្រុមហ៊ុនរបស់លោកឧកញ៉ាសូងួនបានយកគ្រឿងចក្រចំនួន ២ គ្រឿង និងកម្លាំងប្រមាណ ១០០ នាក់ទៅធ្វើសកម្មភាពកាយព្រំដីទំនាស់ ទំហំ ២៣៨ ហិកតា ដែលមានទីតាំងស្ថិតនៅភូមិ ដុំផ្តៅ ឃុំត្រពាំងភ្លាំង ស្រុកឈូក ខេត្តកំពតដែលកំពុងកាន់កាប់ និងគ្រប់គ្រងដោយអតីតកងកម្លាំងសមាហរណកម្មការពារកោះឆ្នេរ។
លោក ជាវ តាយ បានបញ្ជាក់ថា៖ «ដើម្បីរក្សាការពារកុំឱ្យមានវិវាទកាន់តែធ្ងន់ធ្ងរដែលធ្វើឱ្យប៉ះពាល់ដល់ប្រយោជន៍នៃភាគីទាំងសងខាង ខ្ញុំបានសម្រេចចេញលិខិតបន្ទាន់មួយជម្រាបជូនទៅភាគីក្រុមហ៊ុនលោកឧកញ៉ា សូ ងួន ឱ្យបញ្ឈប់សកម្មភាពទាំងនោះជាបណ្ដោះអាសន្នដើម្បីរង់ចាំដំណោះស្រាយសមស្របពីអាជ្ញាធរខេត្ត»។
ទន្ទឹមជាមួយគ្នានេះលោក សុទ្ធ សារឿន មេបញ្ជាការរងនៃបញ្ជាការដ្ឋានការពារកោះឆ្នេរបានគូសបញ្ជាក់ថា សកម្មភាពក្រុមហ៊ុនរបស់លោកឧកញ៉ា សូ ងួន កាលពីថ្ងៃទី ១៤ ខែមីនា ឆ្នាំ ២០២១ បានរំលោភលើស្មារតីនៃកិច្ចប្រជុំនាថ្ងៃទី ៤ ខែ កុម្ភៈ ឆ្នាំ ២០២១ របស់គណៈកម្មការចម្រុះខេត្តដែលបានស្នើសុំឱ្យមានការផ្អាកជាបណ្ដោះអាសន្ននូវសកម្មភាពឈូសឆាយ កាយព្រំក៏ដូចជាការសាងសង់សំណង់ផ្សេងៗនៅលើផ្ទៃដី ២៣៨ ហិកតា ក្នុងតំបន់ជម្លោះនេះ បន្ទាប់ពីគណៈកម្មការចម្រុះបានរកឃើញថា មានចំណុចជាច្រើនមានភាពត្រួតស៊ីគ្នា។
លោក សារឿន បានថ្លែងថា៖ «ភាគីក្រុមហ៊ុនបានធ្វើសកម្មភាពជីកកាយព្រំដី ក្នុងតំបន់ដែលកំពុងមានជម្លោះដែលសកម្មភាពនេះកំពុងធ្វើឱ្យមានផលប៉ះពាល់ដល់សិទ្ធិស្របច្បាប់របស់គ្រួសារកងទ័ព ដែលបានធ្វើសមាហរណកម្មជាច្រើនគ្រួសារក្នុងតំបន់នេះ។ ដើម្បីការពារផលប្រយោជន៍ស្របច្បាប់របស់គ្រួសារកងទ័ព យើងខ្ញុំសុំឱ្យភាគីក្រុមហ៊ុនផ្អាកសកម្មភាពរបស់ខ្លួនជាបន្ទាន់ និងសូមរង់ចាំដំណោះស្រាយដោយសនិ្តវិធីពីអាជ្ញាធរខេត្តជាមុនសិន»។
លោក សូ ងួន ប្រធានក្រុមហ៊ុន សូ ងួន គ្រុបបានប្រាប់ ភ្នំពេញ ប៉ុស្តិ៍ថា ក្រុមហ៊ុនរបស់លោកមិនបានឈូសឆាយដីក្នុងតំបន់ដែលកំពុងមានវិវាទនោះទេ តែបានប្រើគ្រឿងចក្រអេស្កាវ៉ាទ័រ ២ គ្រឿង ជីកកាយព្រំដីតាមខ្សែបន្ទាត់នៃបង្គោលកំណត់ព្រំប្រទល់ពណ៌ក្រហម ដែលបោះដោយគណៈកម្មការចម្រុះកាលពីមុនតែប៉ុណ្ណោះ មិនបានរំលោភបំពានលើទីតាំងដីទំនាស់ដូចដែលខាងតំណាងបញ្ជាការដ្ឋានការពារកោះឆ្នេរលើកឡើងឡើយ។
លោកថា៖ «យើងខ្ញុំគោរពតាមសេចក្ដីណែនាំរបស់អាជ្ញាធរខេត្ត ក៏ដូចជាសេចក្ដីណែនាំរបស់គណៈកម្មការជំនាញទាំងអស់។ ជាក់ស្ដែងនៅពេលនេះ យើងបានសម្រេចផ្អាកសកម្មភាពកាយព្រំដីនោះជាបណ្ដោះអាសន្នតាមសំណើរបស់អាជ្ញាធរខេត្ត។ ខ្ញុំសុំឱ្យអាជ្ញាធរខេត្តមេត្តាពន្លឿនដំណោះស្រាយឱ្យបានឆាប់»៕
វីដេអូ៖