.jpg)
រដ្ឋបាលខេត្តបន្ទាយមានជ័យសម្រេចបន្ដអនុវត្ដវិធានការរដ្ឋបាលជាបណ្ដោះអាសន្ន ដើម្បីទប់ស្កាត់ការរីករាលដាលជំងឺកូវីដ ១៩ នៅក្នុងភូមិសាស្ត្រក្រុងប៉ោយប៉ែតរយៈពេល ១ សប្តាហ៍ ។ រូបភាព រដ្ឋបាលខេត្តបន្ទាយមានជ័យ
ភ្នំពេញៈ រដ្ឋបាលខេត្តបន្ទាយមានជ័យសម្រេចបន្ដអនុវត្ដវិធានការរដ្ឋបាលជាបណ្ដោះអាសន្ន ដើម្បីទប់ស្កាត់ការរីករាលដាលជំងឺកូវីដ ១៩ នៅក្នុងភូមិសាស្ត្រក្រុងប៉ោយប៉ែតរយៈពេល ១ សប្តាហ៍ គិតចាប់ពីថ្ងៃទី ៣០ ខែឧសភារហូតដល់ថ្ងៃទី ៥ ខែមិថុនា ឆ្នាំ ២០២១។
យោងតាមសេចក្ដីសម្រេចស្ដីពីការបន្តអនុវត្ដវិធានការរដ្ឋបាលរបស់រដ្ឋបាលខេត្ដបានបញ្ជាក់ថា ត្រូវបន្តផ្អាកជាបណ្ដោះអាសន្ននូវសកម្មភាពការធ្វើចរាចរណ៍ឆ្លងកាត់ផ្លូវក្នុងភូមិសាស្ត្រក្រុងប៉ោយប៉ែតចាប់ពីម៉ោង ២០ យប់ ដល់ ម៉ោង ៥ ព្រឹកជាកំហិត។
លើកលែងតែចំពោះ ការដឹកជញ្ជូនទំនិញធុនធ្ងន់ពីព្រំដែនថៃមកព្រំដែនកម្ពុជា និងពីព្រំដែនកម្ពុជាទៅព្រំដែនថៃ។ ការធ្វើដំណើរដោយមូលហេតុសុខភាពបន្ទាន់ និងមូលហេតុចាំបាច់ក្នុងគ្រួសារ ដែលមានលិខិតបញ្ជាក់ ឬការអនុញ្ញាតពីអាជ្ញាធរមានសមត្ថកិច្ចដែលនៅជិតបំផុត។
លើកលែងតែចំពោះ ការធ្វើដំណើររបស់បុគ្គលិកក្រុមគ្រូពេទ្យទាំងផ្នែករដ្ឋ និងឯកជន មន្ត្រីរាជការ ក្រុមពន្លត់អគ្គិភ័យ កងកម្លាំងប្រដាប់អាវុធគ្រប់ប្រភេទ ដើម្បីបំពេញបេសកកម្មជូនស្ថាប័ន-អង្គភាព។ ការធ្វើចរាចររបស់រថយន្តកុងតឺន័រ រថយន្តសម្រាប់បម្រើឲ្យការដឹកជញ្ជូនទំនិញ ផ្គត់ផ្គង់ការដ្ឋានសំណង់។ រថយន្តបាញ់បេតុង រថយន្តដឹកជញ្ជូនសំរាម សំណល់រឹង និងសំណល់វេជ្ជសាស្ត្រ។ ការធ្វើដំណើរចាំបាច់ផ្សេងៗទៀត ដែលមានការអនុញ្ញាតពីអាជ្ញាធរមានសមត្ថកិច្ច។
រដ្ឋបាលខេត្ដបញ្ជាក់ថាបុគ្គល ឬនីតិបុគ្គលទាំងឡាយណា ដែលមិនអនុវត្តតាមខ្លឹមសារនៃប្រការ ២ ខាងលើ នឹងត្រូវទទួលទោសដូចមានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធជាធរមាន។
លោក លី សារី អភិបាលរងខេត្ដបន្ទាយមានជ័យ ថ្លែងឱ្យដឹងនៅថ្ងៃនេះថា គិតត្រឹមថ្ងៃទី ២៨ ខែឧសភានេះ ខេត្ដបន្ទាយមានជ័យរកឃើញវិជ្ជមានជំងឺកូវីដ ១៩ ចំនួន ២ ៦០៨ នាក់ ក្នុងនោះស្ដ្រី ១ ២៣២ នាក់។
លោកអភិបាលរងបានឱ្យដឹងថា ក្នុងចំណោមអ្នកវិជ្ជមានកូវីដ ១៩ ចំនួន ២ ៦០៨ នាក់ ក្នុងនោះមានអ្នកព្យាបាលជាសះស្បើយចំនួន ១ ២៧៩ នាក់ ស្ដ្រី ៥៥២ នាក់។ អ្នកវិជ្ជមាន ១៣២៩ នាក់ ស្រី ៦៦៨ នាក់ កំពុងសម្រាកព្យាបាលនៅមណ្ឌលសុខភាព។ ក្នុងខេត្ដបន្ទាយមានជ័យក៏មានអ្នកស្លាប់ចំនួន ៩ នាក់ ស្រី ៦ នាក់ (២ នាក់ស្លាប់ខាងក្រៅមុនចូលសម្រាកពេទ្យ) ដោយសារជំងឺកូវីដ ១៩ ដែរ។
រដ្ឋបាលខេត្តបន្ទាយមានជ័យជម្រាបជូនបងប្អូនប្រជាពលរដ្ឋ និងសាធារណជន ដែលបានប៉ះពាល់ដោយផ្ទាល់ជាមួយអ្នកវិជ្ជមានកូវីដ ១៩ ឱ្យរួសរាន់ទៅជួបក្រុមគ្រូពេទ្យ និងធ្វើចត្តាឡីស័ក ដើម្បីយកសំណាកទៅពិនិត្យ។ ចំណែកអ្នកប៉ះពាល់ដោយប្រយោលជាមួយអ្នកវិជ្ជមានជំងឺកូវីដ ១៩ ត្រូវរួសរាន់ធ្វើចត្តាឡីស័កតាមផ្ទះ ក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។
ក្នុងករណីមានការប្រែប្រួលសុខភាពខុសប្រក្រតីដូចជា ឡើងកម្ដៅលើសពី ៣៧ អង្សាសេ ក្អក កណ្ដាស់ ហៀរសំបោរ ឈឺបំពង់ក មានកំហាក ថប់ដង្ហើមជាដើម ត្រូវប្រញាប់ទំនាក់ទំនងទៅក្រុម ឆ្លើយតបបន្ទាន់នៃមន្ទីរសុខាភិបាលនៃរដ្ឋបាលខេត្ត ឬមន្ទីរពេទ្យខេត្ត ក្រុង ស្រុក ឬមណ្ឌលសុខភាពឃុំ សង្កាត់ និងអាជ្ញាធរ មូលដ្ឋាន តាមរយៈទូរស័ព្ទលេខ ០១២ ៧២៤ ០៤២ / ០១២ ៩៤៨ ៧៧៩៕
