.jpg)
លោក ងួន រតនៈ អភិបាលខេត្តបាត់ដំបង។ រដ្ឋបាលខេត្តបាត់ដំបង
បាត់ដំបងៈ រដ្ឋបាលខេត្តបាត់ដំបង បានសម្រេចបិទជាបណ្តោះអាសន្នទីតាំងចំនួន ៣ កន្លែង ស្ថិតនៅក្នុងភូមិសាស្រ្ត ស្រុកសំពៅលូន ដើម្បីទប់ស្កាត់ការឆ្លងរាលដាលជំងឺកូវីដ១៩ ចាប់ពីថ្ងៃទី២០ ខែឧសភា រហូតដល់មានការសម្រេចជាថ្មី។
តាមលិខិតរបស់ លោក ងួន រតនៈ អភិបាលខេត្តបាត់ដំបង ចេញថ្ងៃទី២០ ខែឧសភា បានឲ្យដឹងថា ទីតាំងទាំង ៣ កន្លែងនោះទី១ នៅផ្ទះលក់បាយ និងបបរ ស្ថិតនៅភូមិអូរស្ងាត់ ឃុំសន្តិភាព ស្រុកសំពៅលូន ខេត្តបាត់ដំបង។
ទី២ ផ្ទះសំណាក់បាយ័នថ្មី ស្ថិតនៅភូមិអូរស្ងាត់ ឃុំសន្តិភាព ស្រុកសំពៅលូន ខេត្តបាត់ដំបង និងទី ៣ គឺហាងបោកអ៊ុតយក្សា ស្ថិតនៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង។
ក្នងលិខិតលោក ងួន រតនៈ បញ្ជាក់ថា ៖ «ការបិទជាបណ្តោះអាសន្ននេះ ក្នុងគោលបំណងដើម្បីទប់ស្កាត់ការរាលដាលជំងឺកូវីដ១៩ ក្រោយពីបានរកឃើញមានអ្នកជំងឺកូវីដ១៩ មកពីភ្នំពេញបានទៅពាក់ព័ន្ធទីតាំងទាំង ៣ កន្លែងនេះ»។
អំឡុងពេលបិទទីតាំងជាបណ្តោះអាសន្ននេះ រដ្ឋបាលស្រុក សំពៅលូន ត្រូវហ៊ុមព័ទ្ធទីតាំងទាំង ៣ កន្លែងនេះ ដោយផ្អាកការចេញចូលទីតាំងនេះ ស្រាវជ្រាវរកអ្នកពាក់ព័ន្ធផ្ទាល់ ឬប្រយោល ដើម្បីធ្វើចត្តាឡីស័ក និងយកសំណាក។
ចំពោះប្រជាពលរដ្ឋ ដែលមានការពាក់ព័ន្ធផ្ទាល់ ឬប្រយោលជាមួយទីតាំងខាងលើ សូមអញ្ជើញមកជួប ឬជូនដំណឹងដល់ក្រុមការងារមន្ត្រីសុខាភិបាលមន្ទីរសុខាភិបាល នៃរដ្ឋបាលខេត្ត ដើម្បីយកសំណាកទៅធ្វើតេស្តជាបន្ទាន់ ចាប់ពីថ្ងៃទី ២០ ខែឧសភា នេះតទៅ។
អភិបាលខេត្តបាត់ដំបង បានប្រាប់ទៅនាយករដ្ឋបាលសាលាខេត្ត ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត បញ្ជាការដ្ឋានតំបន់ប្រតិបត្តិការសឹករងខេត្ត អភិបាលនៃគណៈអភិបាលស្រុកសំពៅលូន ប្រធានមន្ទីរសុខាភិបាល ប្រធានមន្ទីរអង្គភាពជុំវិញខេត្តត្រូវទទួលបន្ទុកអនុវត្តសេចក្តីសម្រេចនេះ ឲ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ។
លោកបញ្ជាក់ថា ៖«ត្រូវអនុវត្តការផាកពិន័យអន្តរការណ៍ចំពោះបុគ្គលណា ដែលមិនគោរពដោយចេតនានូវវិធានការរដ្ឋបាល និងសុខាភិបាល ដែលរាជរដ្ឋាភិបាល និងរដ្ឋបាលខេត្តបាត់ដំបង បានដាក់ចេញក្នុងការទប់ស្កាត់ការឆ្លងរាលដាល នៃជំងឺកូវីដ១៩ ដោយមិនគិតដល់បទល្មើសព្រហ្មទណ្ឌ ដទៃទៀតឡើយ»។
លោក សឿម ប៊ុនរិទ្ធី អភិបាលរង និងជាអ្នកនាំពាក្យរដ្ឋបាលខេត្តបាត់ដំបង ប្រាប់ភ្នំពេញប៉ុស្តិ៍នៅព្រឹកនេះថា អ្នកពាក់ព័ន្ធផ្ទាល់នៅទីតាំងទាំង ៣ មានចំនួន ២០ នាក់ បានយកសំណាកធ្វើតេស្ត លើកទី១ រួចហើយ ដោយទទួលបានលទ្ធផលអវិជ្ជមានទាំងអស់។
លោកថ្លែងថា ៖«ប៉ុន្តែយើងនៅបន្តធ្វើការយកសំណាកទៀត ក្នុងរយៈពេល ៤៨ ម៉ោង ហើយពេលនេះ មន្ត្រីសុខាភិបាល កំពុងស្វែងរកអ្នកពាក់ព័ន្ធផ្សេងទៀត ដើម្បីយកសំណាកពិនិត្យ និងអនុវត្តវិធានការរដ្ឋបាល» ៕
