ព្រះសីហនុៈ រដ្ឋបាលខេត្តព្រះសីហនុបានព្រមានចាត់វិធានការតាមច្បាប់ប្រសិនបើអ្នកគ្រប់គ្រងកំពង់ផែខេត្តព្រះសីហនុនៅតែបន្តសកម្មភាពវាយកម្ទេចអគារដែលមានជាង ២០ ល្វែង មានអាយុកាលជាង ៥០ ឆ្នាំ ដែលជាផ្ទះស្នាក់នៅរបស់បុគ្គលិកកំពង់ផែ ដោយគ្មានច្បាប់អនុញ្ញាតបន្តទៀត បន្ទាប់ពីត្រូវបានហាមឃាត់ជាលើកទី ២។
កាលពីថ្ងៃទី ៣១ ខែ មីនា ឆ្នាំ ២០២០ ក្រុមការងារចម្រុះរបស់រដ្ឋបាលខេត្តព្រះសីហនុមានមន្ទីររៀបចំដែនដី មន្ទីរវប្បធម៌ និងមន្ត្រីពាក់ព័ន្ធមួយចំនួនបានចុះទៅត្រួតពិនិត្យទីតាំងការដ្ឋានសំណង់មួយរបស់កំពង់ផែស្វយ័តខេត្តព្រះសីហនុស្ថិតនៅក្នុងក្រុម ៥ ភូមិ ២ សង្កាត់លេខ ៣ ដោយបានធ្វើការណែនាំឲ្យបញ្ឈប់ការវាយកម្ទេចដំបូល និងជញ្ជាំងជាលើកទី ២។
លោក ឃាង ភារម្យ អ្នកនាំពាក្យសាលាខេត្តព្រះសីហនុបានប្រាប់ភ្នំពេញប៉ុស្តិ៍នៅថ្ងៃទី ៣១ ខែមីនា ថា អាជ្ញាធរពិតជាបានចុះទៅហាមឃាត់ការវាយកម្ទេចសំណង់អគារនោះពិតប្រាកដមែន បន្ទាប់ពីអ្នកគ្រប់គ្រងកំពង់ផែបានធ្វើឡើង ដោយគ្មានច្បាប់អនុញ្ញាត។
លោកបន្តថាកាលពីថ្ងៃទី ២៦ ខែមីនា ក្រុមការងារពាក់ព័ន្ធបានចុះទៅហាមឃាត់ម្តងរួចមកហើយ ប៉ុន្តែមិនស្តាប់។ លោកបន្តថាការចុះទៅហាមឃាត់លើកនេះគឺជាលើកចុងក្រោយ ហើយប្រសិនបើនៅតែបំពាន អាជ្ញាធរនឹងអនុវត្តទៅតាមច្បាប់ បើទោះបីជាសំណង់នេះជារបស់រដ្ឋក៏ដោយ ព្រោះវាអាចបង្កគ្រោះថ្នាក់ ម្យ៉ាងអគារនេះជាសំណង់ដែលបន្សល់ទុកតាំងពីសម័យមុន។
លោកបញ្ជាក់ថា៖ «កិច្ចការងារនេះគឺកំពុងស្ថិតក្នុងការងាររបស់ជំនាញដែលត្រូវពិនិត្យលើឯកសារច្បាប់សិនថា សំណង់នេះមានច្បាប់ក្នុងការរុះរើវាយកម្ទេចដែរទេ? នេះករណីទី ១ ចំណែកទី ២ ក្នុងករណីដែលគាត់មានសិទ្ធិវាយកម្ទេចហើយ តើការរៀបចំជួសជុល និងសាងសង់ថ្មីហ្នឹង គោរពតាមច្បាប់យ៉ាងម៉េច?»។
លោក ប៊ុន វុត្ថា អនុប្រធានមន្ទីររៀបចំដែនដីខេត្តព្រះសីហនុដែលបានចុះត្រួតពិនិត្យសំណង់នេះផ្ទាល់បានប្រាប់ភ្នំពេញប៉ុស្តិ៍ពីថ្ងៃអង្គារថា សំណង់អគារនេះមានទំហំជាង ២០ ល្វែងជាផ្ទះស្នាក់នៅរបស់បុគ្គលិកកំពង់ផែស្វយ័តក្រុងព្រះសីហនុ ហើយជាទីតាំងស្ថិតក្រោមការគ្រប់គ្រងរបស់រដ្ឋ។ លោកបន្ថែមថាដោយសារតែសំណង់នេះមានអាយុកាលដល់ ៥០ ឆ្នាំ ដែលបានបន្សល់ទុកតាំងពីសម័យសង្គមរាស្ត្រនិយម ដូច្នេះមុននឹងធ្វើការជួសជុល និងរុះរើគឺត្រូវស្នើសុំលិខិតអនុញ្ញាតទៅមន្ទីរពាក់ព័ន្ធ ដើម្បីឲ្យក្រុមការងារចុះមកពិនិត្យឱ្យបានត្រឹមត្រូវទៅតាមលក្ខណៈបច្ចេកទេសសិន។
លោកបញ្ជាក់ថា៖ «យើងបានធ្វើការណែនាំ និងធ្វើកិច្ចសន្យាជាមួយក្រុមកម្មករ និងតំណាងកំពង់ផែស្វយ័តកុំឲ្យបន្តសកម្មភាពវាយកម្ទេច និងជួសជុលអគារនេះបន្តទៀតរហូតដល់មានការដាក់សំណើ និងទទួលបានអនុញ្ញាតដោយមន្ត្រីជំនាញចុះទៅពិនិត្យឲ្យបានត្រឹមត្រូវ»។
លោក ស្រ៊ុន លីម តំណាងកំពង់ផែស្វយ័តលើកឡើងថា ដោយសំណង់អគារនេះមានភាពចាស់ទ្រុឌទ្រោមខ្លាំង និងជ្រាបទឹកទើបថ្នាក់ដឹកនាំកំពង់ផែស្វយ័តសម្រេចឲ្យធ្វើការជួសជុលភ្លាមៗតាមសំណើរបស់បុគ្គលិក ដែលជួបប្រទះស្ថានភាពលំបាក នៅពេលរស់នៅក្នុងអគារនេះ។ លោកបន្តថា ក្រោយពីទទួលបានការណែនាំជាថ្មីនេះខាងកំពង់ផែនឹងប្រញាប់រៀបចំឯកសារ ដើម្បីដាក់ស្នើទៅតាមនីតិវិធីច្បាប់ ប៉ុន្តែលោកមិនទាន់អាចបញ្ជាក់បានទេថា ការស្នើនេះនឹងដាក់នៅពេលណា។
លោកបញ្ជាក់ថា៖ «យើងមិនបានស្នើសុំ ដោយសារតែអគារហ្នឹង វាលិចទឹកខ្លាំងពេក ហើយបងប្អូនយើង ស្នើមកហើយធ្វើៗទៅស្មានតែមិនអី រហូតដល់មានការចុះមកហាមឃាត់ហ្នឹង។ ណាមួយវាលិចទឹកពេកយើងមិនបានធ្វើអីទេ គ្រាន់តែប្រក់ដំបូលទេ ហើយឥឡូវគេបានណែនាំឲ្យយើងសុំច្បាប់សុំអីទៅ ហើយយើងកំពុងរៀបចំ»៕