The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋបាលខេត្ត​ព្រមាន​ផ្ដាច់​ទឹក​ និង​អគ្គិសនី​ ចំពោះ​សកម្មភាព​ជីក​ចំណីផ្លូវ​គ្មាន​ការអនុញ្ញាត




រដ្ឋបាលខេត្ត​ព្រមាន​ផ្ដាច់​ទឹក​ និង​អគ្គិសនី​ ចំពោះ​សកម្មភាព​ជីក​ចំណីផ្លូវ​គ្មាន​ការអនុញ្ញាត

Content image - Phnom Penh Post
លោក គួច ចំរើន​ (​លើកដៃ​) ​ពេល​ពិនិត្យ​ផ្លូវ​កាលពី​ថ្ងៃ​ ៤ តុលា​។ រូប សហការី

រដ្ឋបាលខេត្ត​ព្រមាន​ផ្ដាច់​ទឹក​ និង​អគ្គិសនី​ ចំពោះ​សកម្មភាព​ជីក​ចំណីផ្លូវ​គ្មាន​ការអនុញ្ញាត

ព្រះសីហនុៈ រដ្ឋបាលខេត្ត​ព្រះសីហនុ​បាន​ព្រមាន​ផ្ដាច់ការ​ផ្គត់ផ្គង់​ទឹកស្អាត និង​ចរន្តអគ្គិសនី​រយៈពេល​ ៥ ​ខែ​ចំពោះ​ពលរដ្ឋ ប្រតិបត្តិករ និង​អង្គភាព​ជំនាញ​ពាក់ព័ន្ធ​ទាំងឡាយ​ដែល​ជីក​កកាយ​ និង​ឈូសឆាយ​ចំណីផ្លូវ​សាធារណៈ​គ្មាន​ការអនុញ្ញាត​ដែល​នាំឱ្យ​មាន​ការខូចខាត​ទ្រព្យសម្បត្តិ​សាធារណៈ​របស់​រដ្ឋ​។

ការព្រមាន​នេះ​បាន​ធ្វើ​ឡើង​កាលពី​ថ្ងៃទី​ ៥ ខែ​តុលា តាមរយៈ​សេចក្ដី​ជូនដំណឹង​ស្ដីពី «​ការហាមឃាត់​ការជីក​គាស់​កាយ​ និង​ឈូសឆាយ​លើ​ចំណីផ្លូវ​សាធារណៈ​របស់​រដ្ឋ​តាម​ដង​មហាវិថី វិថី និង​អនុវិថី​ទាំងអស់​ក្នុង​ខេត្ត​ព្រះសីហនុ​» ​និង​បន្ទាប់ពី​​បាន​ពិនិត្យ​ឃើញ​មាន​ពលរដ្ឋ​ក៏​ដូចជា​ប្រតិបត្តិករ និង​អង្គភាព​ជំនាញ​ពាក់ព័ន្ធ​មួយ​ចំនួន​បាន​​ជីក​គាស់​កាយ និង​ឈូសឆាយ​លើ​ចំណីផ្លូវ​សាធារណៈ​របស់​រដ្ឋ​ដោយ​គ្មាន​ការអនុញ្ញាត​ពី​រដ្ឋបាល​ខេត្ត​ព្រះសីហនុ ដែល​បាន​ធ្វើឱ្យ​ខូចខាត​ទ្រព្យសម្បត្តិ​សាធារណៈ​របស់​រដ្ឋ​ដោយ​អន្លើៗ​។

តាមរយៈ​សេចក្ដី​ជូន​ដំណឹង​នោះ​លោក​ គួច ចំរើន អភិបាលខេត្ត​ព្រះសីហនុ បាន​ណែនាំ​ឱ្យមាន​ដាក់ពាក្យ​ស្នើសុំ​មក​រដ្ឋបាល​ខេត្ត​មុន​នឹង​ជីក​គាស់​កាយ​ និង​ឈូសឆាយ​លើ​ចំណីផ្លូវ​សាធារណៈ​របស់​រដ្ឋ​ដើម្បី​រដ្ឋបាលខេត្ត​ចាត់​មន្ត្រី​ជំនាញ​ចុះ​ពិនិត្យ​លក្ខណៈ​បច្ចេកទេស​ដល់​ទីតាំង​ជាក់ស្ដែង​បាន​ទាន់ពេល​ចៀសវាង​ផលប៉ះពាល់ និង​រង​ការខូចខាត​នានា​ជាយថាហេតុ​។

លោក​ ចំរើន បាន​បញ្ជាក់ថា​៖ «​ក្នុង​ករណី​បងប្អូន​មិន​អនុវត្ត​តាម​ការណែនាំ​ខាងលើ​នេះ រដ្ឋបាល​ខេត្ត​ព្រះសីហនុ​នឹង​ផ្អាក​ការផ្គត់ផ្គង់​ទឹក និង​ចរន្តអគ្គិសនី​ក្នុង​រយៈពេល​ ៥ ​ខែ​»​។

ជាមួយ​គ្នា​នេះ​លោក​ក៏បាន​លើក​ពី​ខ្លឹមសារ​មាត្រា​ ៧៧ នៃ​ច្បាប់​ស្ដីពី​ផ្លូវថ្នល់​មក​រំឭក​ដល់​ពលរដ្ឋ​ក៏ដូចជា ប្រតិបត្តិករ និង អង្គភាព​ជំនាញ​ពាក់ព័ន្ធ​ទាំងនោះ​​ផង​ដែរ ដើម្បី​ឱ្យ​ចូលរួម​លុប​បំបាត់​នូវ​សកម្មភាព​កិច្ចការ​សាធារណការ​ទាំងឡាយ​ដោយ​​គ្មាន​ការអនុញ្ញាត​ដែល​នាំឱ្យ​ខូចខាត​ដល់​ទ្រព្យសម្បត្តិ​រដ្ឋ​។

យោង​មាត្រា​ ៧៧ ​នៃ​ច្បាប់​ស្ដីពី​ផ្លូវថ្នល់​៖ «​ជន​ណា​ដែល​ធ្វើ​កិច្ចការ​សាធារណការ​ទាំងឡាយ​ដោយ​គ្មាន​ការអនុញ្ញាត​ពី​សមត្ថកិច្ច​គ្រប់គ្រង​ផ្លូវថ្នល់ និង​បណ្ដាល​ឱ្យ​ខូចខាត​ដល់​តួផ្លូវ ទ្រូងផ្លូវ ជាយ​ផ្លូវ គែម​ផ្លូវ និង​ដី​នៅសល់​នៃ​ចំណីផ្លូវ​ត្រូវ​តម្រូវឱ្យ​ជួសជុល​ឡើងវិញ​ឱ្យ​ដូច​ស្ថានភាព​ដើម​ និង​ត្រូវ​ផ្តន្ទាទោស​ដាក់​ពន្ធនាគារ​ពី​ ២ ​ឆ្នាំ ទៅ​ ៥ ​ឆ្នាំ និង​ពិន័យ​ជា​ប្រាក់​ពី​ ៤ ​លាន​រៀល​ដល់​ ១០ ​លាន​រៀល​»​។

លោក​ ឃាង ភារម្យ អ្នក​នាំពាក្យ​រដ្ឋបាលខេត្ត​ព្រះសីហនុ​បាន​បញ្ជាក់​ប្រាប់​ភ្នំពេញ​ប៉ុស្តិ៍​កាលពី​ថ្ងៃទី​ ៦ តុលា​ថា ចាប់ពី​ថ្ងៃ​ជូនដំណឹង​នេះ​ទៅ​រដ្ឋបាលខេត្ត​នឹង​អនុវត្ត​នូវ​វិធានការ​រដ្ឋបាល​ចំពោះ​សកម្មភាព​ណា​ដែល​នៅ​តែ​បន្ត​ការជីក​គាស់កាយ និង​ឈូសឆាយ​លើ​ចំណីផ្លូវ​សាធារណៈ​ដោយ​គ្មាន​ការអនុញ្ញាត​។

ក៏ប៉ុន្តែ​លោក​បាន​ថ្លែងថា​៖ «​យើង​សង្ឃឹមថា ប្រជាពលរដ្ឋ ប្រតិបត្តិករ និង​អង្គភាព​ជំនាញ​ពាក់ព័ន្ធ​ទាំងអស់​នឹងចូលរួម​អនុវត្តតាម​ខ្លឹមសារ​នៃ​សេចក្ដី​ជូនដំណឹង​នេះ​ឱ្យ​មាន​ប្រសិទ្ធភាព​»៕

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។