ព្រះសីហនុៈ រដ្ឋបាលខេត្តព្រះសីហនុបានបន្តផ្អាកជាបណ្តោះអាសន្ននូវដំណើរការអាជីវកម្មរោងចក្រ ដាប់ប៊ែលយូ អីជីស៊ី មេនូហ្វេកធើរីង ដែលស្ថិតក្នុងតំបន់សេដ្ឋកិច្ចពិសេសក្រុងព្រះសីហនុនៅភូមិពូធឿង ឃុំបិតត្រាំង ស្រុកព្រៃនប់ រយៈពេលចំនួន ៥ ថ្ងៃបន្ថែមទៀត ចាប់ពីថ្ងៃនេះតទៅ ដោយសារនៅមិនទាន់អស់អ្នកពាក់ព័ន្ធនឹងជំងឺកូវីដ១៩នៅក្នុងរោងចក្រនេះ។
យោងតាមសេចក្តីសម្រេចលេខ ៦៧៥/សជណ ចុះហត្ថលេខាដោយលោក គួច ចំរើន អភិបាលខេត្តព្រះសីហនុនៅថ្ងៃទី ៨ ខែឧសភានេះឱ្យដឹងថាការប្រកាសបន្តផ្អាក ៥ ថ្ងៃទៀតនេះដោយយោងតាមការពិនិត្យវាយតម្លៃរបស់ក្រុមការងារនៃមន្ទីរការងារ និងបណ្តុះបណ្តាលវិជ្ជាជីវៈខេត្តព្រះសីហនុបានបញ្ជាក់ថានៅមិនទាន់អស់ករណីអ្នកពាក់ព័ន្ធជាមួយនឹងជំងឺកូវីដ១៩នៅក្នុងរោងចក្រនៅឡើយ។
កាលពីថ្ងៃទី ៣ ឧសភា រដ្ឋបាលខេត្តព្រះសីហនុធ្លាប់បានផ្អាកបណ្ដោះអាសន្ននូវដំណើរការអាជីវកម្មរោងចក្រ ដាប់ប៊លយូ អ៊ុជីស៊ី មេនូហ្វេកធើរឹង នេះចំនួន ៤ ថ្ងៃម្តងរួចហើយជាមួយនឹងរោងចក្រមួយទៀតឈ្មោះ ខេមអាយឃែរ ដើម្បីឱ្យក្រុមការងារស្រង់ឈ្មោះ និងយកវត្ថុសំណាកពីបុគ្គលិក កម្មករ និយោជិត បម្រើការងារនៅរោងចក្រ និងអ្នកពាក់ព័ន្ធទៅវិភាគរកមេរោគកូវីដ១។ ជាលទ្ធផលបញ្ជាក់ថាមានបុគ្គលិកកម្មករ និយោជិតរោងចក្រ និងអ្នកពាក់ព័ន្ធមានវិជ្ជមានមេរោគកូវីដ១៩ ជាបន្តបន្ទាប់។
កាលពីថ្ងៃទី ៣ ខែឧសភា លោក គួច ចំរើន ធ្លាប់បានបញ្ជាក់ថា ក្នុងអំឡុងផ្អាករោងចក្រនេះតម្រូវឱ្យនាយករោងចក្រសហការជាមួយក្រុមការងារនៃមន្ទីរការងារ និងបណ្តុះបណ្តាលវិជ្ជាជីវៈខេត្តព្រះសីហនុ ដើម្បីស្វែងរកអ្នកដែលមានការពាក់ព័ន្ធជាមួយអ្នកវិជ្ជមានកូវីដ១៩ ដើម្បីផ្តល់វត្ថុសំណាកដល់ក្រុមឆ្លើយតបបន្ទាន់នៃមន្ទីរសុខាភិបាលខេត្ត ដើម្បីវិភាគរកមេរោគកូវីដ១៩តាមការកំណត់។
លោក ចំរើន បានថ្លែងថា៖ «ក្នុងករណីលោក (នាយករោងចក្រ) មិនអនុវត្តតាមការណែនាំខាងលើ រដ្ឋបាលខេត្តព្រះសីហនុនឹងចុះអនុវត្តវិធានការតាមនីតិវិធីច្បាប់ជាធរមាន»។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុមិនអាចសុំការបញ្ជាក់បន្ថែមពីចំនួនអ្នកឆ្លងជំងឺកូវីដ១៩នៅតាមរោងចក្រនោះទេ ដោយលោកថាកំពុងជាប់រវល់នៅព្រឹកថ្ងៃនេះ។
ក៏ប៉ុន្តែបើតាមរបាយការណ៍ក្រសួងសុខាភិបាលគិតត្រឹមថ្ងៃទី ៤ ខែឧសភានៅខេត្តព្រះសីហនុមានអ្នកវិជ្ជមានកូវីដ១៩សរុបចំនួន ២ ០២៣ នាក់ អ្នកជាសះស្បើយមាន ៨៥១ នាក់ ស្លាប់ ៦ នាក់ និងកំពុងសម្រាកព្យាបាល ១ ១៦៥ នាក់៕