ព្រះសីហនុៈ រដ្ឋបាលខេត្តព្រះសីហនុ បានប្រកាសផ្អាកការធ្វើចរាចរណ៍ជាបណ្ដោះអាសន្នលើកំណាត់ផ្លូវលេខ ១៤៦C ដែលតភ្ជាប់ពីផ្លូវជាតិលេខ ៤ ត្រង់ចំណុចក្បែរទីបញ្ជាការកងរាជអាវុធហត្ថក្រុងព្រះសីហនុ ទល់នឹងឆ្នេរអូរត្រេះ ចាប់ពីព្រឹកថ្ងៃព្រហស្បតិ៍នេះទៅ ដើម្បីជួសជុលកែលម្អឡើងវិញ បន្ទាប់ពីរងការខូចខាតដោយសារការដឹកជញ្ជូនលើសទម្ងន់ ក្នុងអំឡុងពេលមានភ្លៀងធ្លាក់ជាបន្តបន្ទាប់នាដើមរដូវវស្សានេះ។ យោងតាមសេចក្ដីប្រកាសចុះថ្ងៃទី ១៨ ខែ មិថុនា ឆ្នាំ ២០១៩ ដែលភ្នំពេញប៉ុស្តិ៍ទទួលបានកាលពីម្សិលមិញ។
សេចក្ដីប្រកាសបានបញ្ជាក់ថា៖ «ដើម្បីសម្រួលដល់ដំណើរការជួសជុលផ្លូវលេខ ១៤៦C នេះ ឲ្យប្រព្រឹត្តទៅបានដោយរលូន និងឆាប់រហ័ស រដ្ឋបាលខេត្តព្រះសីហនុ សូមប្រកាសផ្អាកការធ្វើចរាចរណ៍ លើកំណាត់ផ្លូវលេខ ១៤៦C ជាបណ្ដោះអាសន្ន ចាប់ពីថ្ងៃទី ២០ ខែ មិថុនា ឆ្នាំ ២០១៩ នេះតទៅ។ ក្រោយពីកំណាត់ផ្លូវនេះ ត្រូវបានធ្វើការជួសជុលនិងសាងសង់ចប់ជាស្ថាពរ រដ្ឋបាលខេត្តព្រះសីហនុ នឹងប្រកាសឲ្យប្រើប្រាស់ដូចធម្មតាឡើងវិញ»។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានប្រាប់ភ្នំពេញប៉ុស្តិ៍ថា ផ្លូវលេខ ១៤៦C ជាផ្លូវក្រវាត់ក្រុង មួយដែលត្រូវបានសាងសង់ឡើងក្នុងអំឡុងឆ្នាំ ២០១៤ ក្នុងគោលបំណងជួយកាត់បន្ថយភាពកកស្ទះចរាចរណ៍ក្នុងក្រុងព្រះសីហនុ ដោយផ្លូវនេះបានតភ្ជាប់ពីផ្លូវជាតិលេខ ៤ ត្រង់ចំណុចក្បែរទីបញ្ជាការកងរាជអាវុធហត្ថក្រុងព្រះសីហនុ ទល់នឹងឆ្នេរអូរត្រេះ មានប្រវែងជាង ៦ គីឡូម៉ែត្រ។
លោកបញ្ជាក់ថា៖ «បច្ចុប្បន្នផ្លូវនេះមានភាពខូចខាតប្រមាណ ៧០ ភាគរយ ដែលចាំបាច់ត្រូវធ្វើការជួសជុល កែលម្អឡើងវិញ ហើយដើម្បីសម្រួលដល់ការជួសជុលផ្លូវនេះឡើងវិញ យើងចាំបាច់ត្រូវផ្អាកការធ្វើចរាចរណ៍លើកំណាត់ផ្លូវនេះ ជាបណ្ដោះអាសន្ន»។
លោកភារម្យ បានបន្តថា ដំណើការជួសជុលផ្លូវនេះ អាចនឹងចំណាយពេលត្រឹមតែ ៤-៥ ថ្ងៃ ឬយ៉ាងយូរ ១ សប្ដាហ៍ នឹងត្រូវរួចរាល់ ប្រសិនបើគ្មានភ្លៀងធ្លាក់ជាឧបសគ្គនោះទេ។ ប៉ុន្តែលោក ជ្រា ថារ៉ាវុធ អនុប្រធានមន្ទីរសាធារណការ និង ដឹកជញ្ជូនខេត្តព្រះសីហនុ បានអះអាងដោយផ្អែកទៅលើទំហំនៃការខូចខាតថា ដំណើរការជួសជុលផ្លូវនេះ អាចប្រើរយៈពេលយ៉ាងតិច ២ សប្ដាហ៍ទើបរួចរាល់ ហើយអាចយូរជាងនេះប្រសិនបើមានភ្លៀងធ្លាក់។
លោក ថារ៉ាវុធ បានបញ្ជាក់ទៀតថា៖ «គ្រាន់តែចំណាយពេលជីកកាយ ដឹកដីចាក់បំពេញជង្ហុក និងឈូសឆាយពង្រាប គឺយើងត្រូវប្រើរយៈពេលយ៉ាងតិចជាង ១ សប្ដាហ៍ នេះមិនទាន់រាប់បញ្ជូលការចាក់គ្រួស ថ្ម និងស្រោចជ័រកៅស៊ូពីលើផង»៕