ព្រះសីហនុៈ រដ្ឋបាលខេត្តព្រះសីហនុបានសម្រេចមិនផ្តល់វិញ្ញាបនបត្រសម្គាល់អចលនវត្ថុជូនប្រជាពលរដ្ឋជាង ៣០០ គ្រួសារ ដែលស្ថិតនៅលើទីតាំងដីចំនួន ៥៨៤ ក្បាលដី ដែលកាន់កាប់ឯកសារ ដែលគ្មានតម្លៃគតិយុត្តសម្រាប់ប្រើប្រាស់ នៅសង្កាត់កោះរ៉ុង និងកោះរ៉ុងសន្លឹម ព្រមទាំងព្រមានចាត់វិធានការផ្លូវច្បាប់ដោយមិនលើកលែងចំពោះជនណាដែលប៉ះពាល់កម្មសិទ្ធិនៃទ្រព្យសម្បត្តិរបស់រដ្ឋ។
សេចក្តីជូនដំណឹងរបស់រដ្ឋបាលខេត្តព្រះសីហនុនៅថ្ងៃទី ២៩ ខែមករា ដែល ភ្នំពេញ ប៉ុស្តិ៍ ទទួលបានបានឱ្យដឹងថា ទីតាំងដីចំនួន ៥៨៤ ក្បាលដី ត្រូវបានគណៈកម្មការរដ្ឋបាលបានសម្រេចមិនផ្តល់វិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋទាំងនោះទេ ដោយហេតុផលថា ប្រជាពលរដ្ឋមិនមានអាសយដ្ឋានអចិន្រៃ្តយ៍នៅទីនោះ ទីតាំងដីគ្មានទិន្នន័យ ដីមានទំនាស់ និង ទីតាំងដីពាក់ព័ន្ធនឹងគម្រោងព្រលានយន្តហោះ។
យោងតាមសេចក្ដីជូនដំណឹងដដែលនេះបានបញ្ជាក់ថា ឯកសារសម្គាល់លេខ-ក្បាលដី (ចុងសន្លឹក) លិខិតផ្ទេរសិទ្ធិកាន់កាប់ប្រើប្រាស់ដីធ្លី ពាក្យស្នើសុំកាន់កាប់ប្រើប្រាស់ ដីធ្លី កិច្ចសន្យាទិញ-លក់ដោយមានប្រថាប់ត្រាអាជ្ញាធរសង្កាត់ ឬប្រថាប់ត្រាមេធាវី ឬកិច្ចសន្យាផ្ទេរសិទ្ធិដីធ្លីជា លក្ខណៈឯកជន (រវាងគូភាគី) គំនូសបង្ហាញទីតាំងដី និងឯកសារពាក់ព័ន្ធផ្សេងៗទៀត រួមនឹងក្បាលដីក្នុងប្លង់សុរិយោដីចំនួន ៥៨៤ ក្បាលដី ដែលគណៈកម្មការរដ្ឋបាល បានសម្រេចមិនផ្តល់ជូនជាកម្មសិទ្ធិ គឺជាឯកសារដែលគ្មានតម្លៃគតិយុត្តសម្រាប់ប្រើប្រាស់ ឬទាមទារសិទ្ធិលើដីធ្លីនៅលើកោះរុងនោះទេ។
លោកស្រី ជៀប សុធារី មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកខេត្តព្រះសីហនុបានថ្លែងថា រាល់ការសម្រេចរបស់អាជ្ញាធរខេត្តគួរតែមានការសម្រួលគ្នាបើសិនជាទីតាំងដីរបស់ក្រុមហ៊ុនប៉ះពាល់ទៅដល់ការប្រើប្រាស់របស់ប្រជាពលរដ្ឋ ព្រោះទីតាំងដីដែលត្រូវបានវាស់វែង និងមានលេខក្បាលដីហើយនោះ គឺជាដីធ្លីដែលប្រជាពលរដ្ឋបានកាន់កាប់ប្រើប្រាស់។
លោកស្រីថ្លែងថា៖ «ទម្រាំតែមានការវាស់វែងគឺមានការត្រួតពិនិត្យត្រឹមត្រូវហើយ ទើបបានចេញលេខកូដក្បាលដី ហើយនៅពេលបិទផ្សាយទិន្នន័យបណ្តោះអាសន្នក៏មានការប្តឹងតវ៉ា និងប្តឹងជំទាស់ដែរ ក្បាលដីខ្លះត្រូវបានប្តឹងដោយបរិស្ថានត្រូវបានប្តឹងដោយរដ្ឋបាលព្រៃឈើ និងបានដោះស្រាយគ្នារួចហើយ រវាងម្ចាស់ក្បាលដី និងភាគីដែលប្តឹង»។
ភ្នំពេញប៉ុស្តិ៍មិនអាចស្វែងរកទំនាក់ទំនងពីប្រជាពលរដ្ឋនៅសង្កាត់កោះរ៉ុង និងសង្កាត់កោះរ៉ុងសន្លឹមបានទេ។ ប៉ុន្តែ លោក យូ វាសនា តំណាងប្រជាពលរដ្ឋសហគមន៍មានទំនាស់ដីធ្លីនៅខេត្តព្រះសីហនុបានថ្លែងថា ប្រជាពលរដ្ឋនៅតំបន់កោះរ៉ុងមិនមានកាន់កាប់ដីច្រើនហិកតាឡើយ ភាគច្រើនមានតែកន្លះហិកតា ឬ ១ ហិកតាប៉ុណ្ណោះ។
លោកថ្លែងថា៖ «និយាយរួមទៅកន្ទេលធំបន្លំដេកទាំងអស់នៅកោះរ៉ុង អត់មានប្រជាជនណាមានដីច្រើនទេ ប្រជាជនយ៉ាងច្រើនណាស់ ដីគាត់មានត្រឹមកន្លះហិកតា ១ ហិកតាហ្នឹងធំបំផុតហើយ»។
រដ្ឋបាលខេត្តព្រះសីហនុបានបញ្ជាក់ថា មិនទទួលស្គាល់លើការផ្ទេរសិទ្ធិ ការទិញ-លក់ ជួល បញ្ចាំ ហ៊ីប៉ូតែក ប្រទានកម្មអច្ច័យទាន សន្តតិកម្ម ។ល។ និងសិទ្ធិទាំងឡាយដែលពាក់ព័ន្ធទៅនឹងទីតាំងទាំង ៥៨៤ ក្បាលដី និងដីដែលកាន់កាប់ខុសច្បាប់ដទៃផ្សេងទៀត លើកលែងក្បាលដីដែលត្រូវបានចុះបញ្ជីដីធ្លី និងចេញវិញ្ញាបនបត្រសម្គាល់ម្ចាស់អចលនវត្ថុដោយរដ្ឋបាលសុរិយោដីរួចហើយ។
លោក ឃាង ភារម្យ អភិបាលរង និងជាអ្នកនាំពាក្យរដ្ឋបាលខេត្តព្រះសីហនុ ប្រាប់ឱ្យដឹងថាទីតាំងដីចំនួន ៥៨៤ ក្បាលដី មានប្រជាពលរដ្ឋរស់នៅប្រមាណជាង ៣០០ គ្រួសារ។ រដ្ឋបាលខេត្តនឹងចាត់វិធានការផ្លូវច្បាប់ចំពោះជនប៉ះពាល់កម្មសិទ្ធិរបស់រដ្ឋដូចមានក្នុងមាត្រា ២៩៥ នៃច្បាប់ភូមិបាល និងមាត្រា ៨១ នៃច្បាប់ស្តីពីការគ្រប់គ្រង ប្រើប្រាស់ចាត់ចែងលើទ្រព្យសម្បត្តិរបស់រដ្ឋ។
សេចក្តីជូនដំណឹងរបស់រដ្ឋបាលខេត្តព្រះសីហនុចេញថ្ងៃទី ២៩ ខែមករា បញ្ជាក់ថា ទីតាំងដីស្ថិតនៅសង្កាត់កោះរ៉ុង និងសង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ជាប្រភេទដីកោះដែលជាទ្រព្យសម្បត្តិសាធារណៈរបស់រដ្ឋត្រូវបានរាជរដ្ឋាភិបាលសម្រេចធ្វើអនុបយោគពីដីសាធារណៈរបស់រដ្ឋ មកជាដីឯកជនរបស់រដ្ឋតាមអនុក្រឹត្យលេខ ០៥ អនក្រ.បក ចុះ ថ្ងៃទី ២១ ខែ មករា ឆ្នាំ ២០០៨ ដើម្បីធ្វើការអភិវឌ្ឍក្រោមលក្ខខណ្ឌជួលវិនិយោគ៕
វីដេអូ៖