ព្រះសីហនុៈ រដ្ឋបាលខេត្ដព្រះសីហនុកាលពីថ្ងៃចន្ទ ទី ១៣ ខែមករា បានស្នើដល់ពលរដ្ឋអាជីវករដែលមានតូបលក់ដូរនៅតាមបណ្ដោយឆ្នេរអូរត្រេះមួយចំនួនដែលមិនទាន់រុះរើតូបត្រូវសហការរុះរើតូបចេញដោយខ្លួនឯងយ៉ាងយូរត្រឹមក្នុងសប្ដាហ៍នេះដើម្បីអាចឱ្យរដ្ឋបាលខេត្ដកែលម្អសោភណភាពឆ្នេររក្សាទុកជាឆ្នេរសាធារណៈរបស់រដ្ឋ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងកាលពីម្សិលមិញថា ជាគោលការណ៍របស់រដ្ឋបាលខេត្ដ គឺមិនមានដំណោះស្រាយណាមួយដល់ប្រជាពលរដ្ឋនោះទេ ព្រោះឆ្នេរសមុទ្រជាឆ្នេរសាធារណៈរបស់រដ្ឋហើយប្រជាពលរដ្ឋបានមកប្រកបរបរនៅលើឆ្នេរសមុទ្រជាសម្បត្ដិរបស់រដ្ឋ។
លោក ភារម្យ ថ្លែងថា ក្រុមការងាររបស់រដ្ឋបាលខេត្ដ-ក្រុងព្រះសីហនុនឹងចុះរុះរើតូបដែលនៅសេសសល់ក្នុងសប្ដាហ៍នេះ។
លោក ភារម្យ ថ្លែងថា៖ «យើងអត់មានគោលការណ៍នៃការដោះស្រាយ សំណងអ្វីជូនដល់ពួកគាត់ទេ (ពលរដ្ឋម្ចាស់តូប)។ ទីតាំងនេះជាទីតាំងឆ្នេរសាធារណៈរបស់រដ្ឋ ហើយពលរដ្ឋមកកាន់កាប់ លក់ដូរនៅលើឆ្នេរសមុទ្ររបស់រដ្ឋ។ ពេលនេះជាពេលវេលាដែលរដ្ឋត្រូវការធ្វើការកែលម្អឆ្នេរនេះឡើងវិញដើម្បីរៀបចំសោភណភាពសណ្ដាប់ធ្នាប់ទុកឱ្យសាធារណជនមកលេងកម្សាន្ត»។
លោក ភារម្យ បន្ដថា រដ្ឋបាលខេត្ដសង្ឃឹម និងជឿជាក់ដល់ប្រជាពលរដ្ឋដែលកំពុងបន្ដធ្វើអាជីវកម្មនៅលើឆ្នេរអូរត្រេះចូលរួមសហការរុះរើតូបដោយខ្លួនឯងដោយគិតយកផលប្រយោជន៍ជាតិជាធំ ព្រោះឆ្នេរសមុទ្រកម្ពុជាជាឆ្នេរជាប់ចំណាត់ថ្នាក់ឆ្នេរស្អាតពិភពលោក។
លោកបញ្ជាក់ថា៖ «អ្វីដែលរដ្ឋបាលខេត្ដយើងកំពុងរៀបចំនេះគឺរៀបចំសម្រាប់បម្រើផលប្រយោជន៍សាធារណៈ មិនមែនធ្វើសម្រាប់ផលប្រយោជន៍បុគ្គលណាម្នាក់នោះទេ»។
រដ្ឋបាលខេត្ដព្រះសីហនុកាលពីថ្ងៃចន្ទ ទី ១៣ ខែមករា បានចេញសេចក្ដីប្រកាសព័ត៌មានមួយដោយបញ្ជាក់ថាកាលពីថ្ងៃទី ៤ ខែធ្នូ ឆ្នាំ ២០១៩ រដ្ឋបាលខេត្ដធ្លាប់បានចេញសេចក្ដីជូនដំណឹងដល់ម្ចាស់តូបដែលកំពុងលក់ដូរនៅលើឆ្នេរអូឈើទាល និងឆ្នេរអូត្រេះមានទីតាំងស្ថិតនៅភូមិ ៤ និងភូមិ ៦ សង្កាត់លេខ ៤ ក្រុងព្រះសីហនុឱ្យរុះរើតូប រោង និងស្ដង់លក់ដូរចេញពីលើឆ្នេរម្ដងរួចហើយ។
បន្ទាប់ពីទទួលបានការជូនដំណឹង ម្ចាស់តូបនៅឆ្នេរអូឈើទាលបានចូលរួមសហការជាមួយអាជ្ញាធរដោយបានធ្វើការរុះរើតូប រោង និងស្ដង់លក់ដូររបស់ពួកគាត់ទាំង ១២៦ តូបជាស្ថាពរដោយគ្មានការតវ៉ា និងគ្មានបង្កអំពើហិង្សាអ្វីឡើយ ព្រមទាំងចូលរួមធ្វើការសម្អាតឆ្នេរខ្សាច់ឱ្យស្អាតដូចដើមឡើងវិញផងដែរ។
ដោយឡែកចំពោះបងប្អូនប្រជាពលរដ្ឋដែលកំពុងលក់ដូរនៅលើឆ្នេរអូត្រេះ (អូរត្រេះ ១ អូរត្រេះ ២) មួយចំនួនបានចូលរួមសហការក្នុងការរុះរើតូប រោង និងស្ដង់លក់ដូររបស់គាត់បានរួចរាល់ ប៉ុន្ដែនៅមានបងប្អូនមួយចំនួនទៀតមិនទាន់បានរុះរើនៅឡើយ។
ដូច្នេះរដ្ឋបាលខេត្ដព្រះសីហនុ ស្នើសុំកិច្ចសហការពីម្ចាស់តូបដែលកំពុងបន្តលក់ដូរនៅលើឆ្នេរអូរត្រេះ (អូរត្រេះ ១ អូរត្រេះ ២) ត្រូវរុះរើតូប រោង និងស្ដង់លក់ដូរចេញ។ ក្នុងករណីមិនអនុវត្ដតាមសេចក្ដីជូនដំណឹងនេះរដ្ឋបាលខេត្ដនឹងអនុវត្ដវិធានការរដ្ឋបាលរុះរើដោយមិនទទួលខុសត្រូវចំពោះការខូចខាតសម្ភារ ឬបាត់បង់ទ្រព្យសម្បត្ដិនោះទេ។
រដ្ឋបាលខេត្ដបានបញ្ជាក់ថា៖ «នឹងមិនអនុញ្ញាតិឱ្យមានការបន្ដលក់ដូរនៅលើឆ្នេរអូឈើទាល និងអូរត្រេះតទៅទៀតឡើយ ព្រោះត្រូវកែលម្អសោភណភាពឆ្នេរ រក្សាទុកជាឆ្នេរសាធារណៈ និងជាសម្បត្តិរួមរបស់ប្រជាពលរដ្ឋខ្មែរទូទៅមកទស្សនាកម្សាន្ត។
លោក ទី អៀន អាជីវករមានតូបលក់ដូរនៅឆ្នេរអូរត្រេះដែលត្រូវបានរដ្ឋបាលខេត្ដជូនដំណឹងឱ្យរុះរើចេញបានសម្ដែងការសោកស្ដាយដោយរដ្ឋបាលខេត្ដបានប្រកាន់គោលជំហរឱ្យពលរដ្ឋជាអាជីវករនៅឆ្នេរអូត្រេះប្រមាណ ៦២ តូបឱ្យរុះរើចេញទាំងមិនមានសំណង ឬដំណោះស្រាយណាមួយបែបនេះ ខណៈដែលពលរដ្ឋបានមកលក់ដូរជិត ២០ ឆ្នាំកន្លងមកហើយ។
លោកថ្លែងថា៖ «ពួកយើងចង់បានការដោះស្រាយពីលោកអភិបាលខេត្ដ។ ប៉ុន្ដែយើងពិបាកណាស់ ព្រោះការរុះរើនេះជាគោលជំហររបស់ខេត្ដ។ ថ្នាក់ដឹកនាំខេត្ដពួកគាត់ប្រៀបដូចឪពុកម្ដាយ ប៉ុន្ដែពួកគាត់គ្មានដំណោះស្រាយ គ្មានផ្ដល់ឱកាសឱ្យពលរដ្ឋជួបពិភាក្សាជាមួយគាត់ (អភិបាលខេត្ដ) សោះ»។ លោក អៀន ថ្លែងថា ជាគោលការណ៍របស់រដ្ឋបាលខេត្ដពលរដ្ឋនឹងអាចស្ដាប់ទទួលយកបាន និងធ្វើតាម ប៉ុន្ដែពលរដ្ឋសុំដល់រដ្ឋបាលខេត្ដវិញថាតើរដ្ឋមានគោលការណ៍អ្វីចំពោះពលរដ្ឋដែលបានមករស់នៅជិត ២០ ហើយ៕