.jpg)
សមត្ថកិច្ចចុះបិទមន្ទីរពេទ្យសម្រាកព្យាបាលមួួយកន្លែង ក្រោយជាប់ពាក់ព័ន្ធជាមួយអ្នកជំងឺកូវីដ ១៩។ រូបថត រដ្ឋបាលខេត្តសៀមរាប
សៀមរាប៖ រដ្ឋបាលខេត្តសៀមរាប បានសម្រេចបិទមន្ទីរសម្រាកព្យាបាលមួយកន្លែងជាបណ្ដោះអាសន្ន ស្ថិតនៅភូមិមណ្ឌល ៣ សង្កាត់ស្លក្រាម ក្រុងសៀមរាប បន្ទាប់ពីរកឃើញអ្នកវិជ្ជមានជំងឺកូវីដ ១៩ ចំនួន ៤ នាក់ កាលពីថ្ងៃទី ០២ ខែ ឧសភា ឆ្នាំ ២០២១ ដោយអំពាវនាវឲ្យពលរដ្ឋដែលមានជាប់ពាក់ព័ន្ធត្រូវធ្វើចត្តាឡីស័ក ឬទៅផ្ដល់សំណាក។ នេះបើយោងតាមសេចក្តីប្រកាសព័ត៌មានរបស់រដ្ឋបាលខេត្ត ចេញផ្សាយកាលពីយប់ថ្ងៃទី ២ ឧសភា។
រដ្ឋបាលខេត្តសៀមរាបបានឱ្យដឹងថា៖ «ប្រជាពលរដ្ឋដែលបានពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមានកូវីដ ១៩ (នៅមន្ទីរព្យាបាលនេះ) ហើយធ្លាប់បានចេញ និងចូល ចាប់ពីព្រឹកថ្ងៃទី ២៩ ខែ មេសា ឆ្នាំ ២០២១ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត»។
រដ្ឋបាលខេត្តក៏បានអំពាវនាវឲ្យប្រជាពលរដ្ឋ ផ្តល់ព័ត៌មានមកកាន់លេខទូរស័ព្ទ ០១២ ៩៥៥ ៤៧៤ និង ០៧៧ ៧៨៩ ០០៧ ប្រសិនបើមានការប្រែប្រួលសុខភាព ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។
លោក ទៀ សីហា អភិបាលខេត្តសៀមរាបបានជំរុញ និងអំពាវនាវឱ្យប្រជាពលរដ្ឋរស់នៅក្នុងខេត្តសៀមរាប បង្កើនការប្រុងប្រយ័ត្នខ្ពស់ចូលរួមអនុវត្តវិធានការការពារ ៣ ការពារ ៣ កុំ និងត្រូវអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ជាពិសេសត្រូវអនុវត្តវិធានការរដ្ឋបាល និងវិធានការចត្តាឡីស័ក។
លោកថ្លែងថា៖ «បុគ្គលទាំងឡាយណាល្មើសនឹងវិធានការនេះ នឹងប្រឈមទទួលការផ្តន្ទាទោសពិន័យអន្តរការណ៍ ឬដាក់ពន្ធនាគារ ដោយអនុលោមតាមខ្លឹមសារច្បាប់ និងលិខិតបទដ្ឋានគតិយុត្តជាធរមាន។ ស្នងការនគរបាលខេត្ត មេបញ្ជាការកងរាជអាវុធហត្ថខេត្ត រដ្ឋបាលក្រុងសៀមរាប ប្រធានមន្ទីរ និងអង្គភាពពាក់ព័ន្ធ ចៅសង្កាត់ស្លក្រាម និងប្រជាពលរដ្ឋមេត្តាជ្រាប និងចូលរួមសហការអនុវត្តសេចក្តីជូនដំណឹងនេះ ដោយស្មារតីទទួលខុសត្រូវខ្ពស់»។
យោងតាមសេចក្តីជូនដំណឹងរបស់ក្រសួងសុខាភិបាលកាលពីថ្ងៃទី ២ ឧសភា បានឲ្យដឹងថា ខេត្តសៀមរាប គឺមានចំនួនអ្នកឆ្លងសរុប ៤៨ នាក់ ដោយមិនទាន់មានករណីស្លាប់នោះទេ ខណៈអ្នកកំពុងសម្រាកព្យាបាលមានចំនួន ២៦ នាក់ និងជាសះស្បើយចំនួន ២២ នាក់៕
