កំពង់ឆ្នាំងៈ ខណ្ឌរដ្ឋបាលជលផលខេត្តកំពង់ឆ្នាំងកាលពីម្សិលមិញបានធ្វើលិខិតស្នើសុំទៅតុលាការឲ្យប្រគល់ត្រាក់ទ័រ ២ គ្រឿង ដែលត្រូវបានកម្លាំងយោធាសឹករងស្រុកជលគិរីចាប់រឹបអូសពីអ្នកភូមិ ខណៈកំពុងភ្ជួររាស់ដីស្រែរបស់ពួកគេកាលពីថ្ងៃទី ១៩ ខែ មេសា ឆ្នាំ ២០២០ ដោយសង្ស័យថា ជាដីព្រៃលិចទឹកដែលត្រូវបានហាមឃាត់។
លោក លី ឡា នាយខណ្ឌរដ្ឋបាលជលផលខេត្តកំពង់ឆ្នាំងថ្លែងពីថ្ងៃអង្គារថា សំណើសុំឲ្យប្រគល់ត្រាក់ទ័រទៅឲ្យអ្នកភូមិវិញនោះបានធ្វើឡើងដោយយោងលើលទ្ធផលនៃការចុះអនុវត្តយន្តការត្រួតពិនិត្យនៅលើទីតាំងដីកើតហេតុដោយផ្ទាល់របស់គណៈកម្មការចម្រុះនៃគណៈបញ្ជាការឯកភាពស្រុកជលគិរី កាលពីថ្ងៃចន្ទដែលរកឃើញថា ដីស្រែនោះគឺពិតជាដីស្រែដែលពលរដ្ឋធ្លាប់អាស្រ័យផលជាង ២០ ឆ្នាំមកហើយ មិនមែនជាដីស្រែដែលទើបលួចរុករានថ្មីក្នុងរយៈពេល ១ ឆ្នាំ ឬ ២-៣ ឆ្នាំមុននោះទេ។
លោក ឡា បញ្ជាក់ថា៖ «ឥឡូវគណៈកម្មការចម្រុះបានចុះពិនិត្យស្រាវជ្រាវដល់ទីតាំងដីស្រែកើតហេតុនោះ ហើយរកឃើញថា វាពិតជាដីស្រែចាស់ប្រាកដមែន ដូច្នេះយើងចាំបាច់ត្រូវប្រគល់ត្រាក់ទ័រទាំងនោះទៅឲ្យពួកគាត់វិញ ប៉ុន្តែត្រូវរង់ចាំការសម្រេចពីតុលាការផងដែរ ព្រោះសំណុំរឿងនេះបានបញ្ជូនទៅដល់ដៃអយ្យការហើយ»។
ចំណែកលោក លី ផល្លីន អភិបាលរងស្រុកជលគិរីដែលបានដឹកនាំក្រុមគណៈកម្មការចម្រុះចុះស្រាវជ្រាវពីប្រវត្តិដី និងត្រួតពិនិត្យដោយផ្ទាល់នៅលើទីតាំងដីស្រែកើតហេតុបានប្រាប់ភ្នំពេញប៉ុស្តិ៍ថា ក្រោយពីពិនិត្យអង្កេត និងសាកសួរអំពីប្រវត្តិដី និងសំអាងហេតុរបស់អាជ្ញាធរមូលដ្ឋានភូមិ ឃុំ ក៏ដូចជាមន្ត្រីជំនាញ ដីស្រែនោះគឺពិតជាដីស្រែដែលប្រជាពលរដ្ឋបាននិងកំពុងបន្តអាស្រ័យផលតាំងពីឆ្នាំ ១៩៩៤ មកម្ល៉េះ។
លោក ផល្លីន ថ្លែងថា៖ «ក្រោយរកឃើញការពិតក្នុងនាមយើងជាអាជ្ញាធរ ពិតជាមានការអៀនខ្មាសខ្លាំងណាស់ដែលបានឃាត់ និងរឹបអូសត្រាក់ទ័ររបស់ពួកគាត់ មិនឲ្យភ្ជួររាស់ខណៈការបង្កបង្កើនផលស្រូវដើមរដូវវស្សាកំពុងមកដល់។ ដូច្នេះយើងត្រូវប្រញាប់ធ្វើលិខិតបញ្ជាក់ទៅតុលាការដើម្បីស្នើសុំយកត្រាក់ទ័រទាំងនោះប្រគល់ឲ្យពួកគាត់វិញប៉ុណ្ណោះ»។
នៅថ្ងៃទី ១៩ ខែមេសា ក្រុមនគរបាល និងយោធាសឹករងស្រុកជលគិរីបានសហការគ្នាចុះល្បាតការពារសន្តិសុខនៅតាមមូលដ្ឋានក្នុងភូមិសាស្ត្រឃុំពាមឆ្កោក ហើយក៏បានប្រទះឃើញប្រជាពលរដ្ឋមួយក្រុមកំពុងភ្ជួររាស់ដីស្រែមួយកន្លែងដែលសមត្ថកិច្ចសង្ស័យថា ជាដីព្រៃលិចទឹក។
នៅពេលនោះកម្លាំងសមត្ថកិច្ចបានស្នើសុំគោលការណ៍ពីព្រះរាជអាជ្ញារង លោក ឡុង ស៊ីថា ដើម្បីឃាត់ទុកជាបណ្ដោះអាសន្ននូវត្រាក់ទ័រទាំង ២ គ្រឿងនោះ ប៉ុន្តែមិនបានឃាត់ខ្លួនពលរដ្ឋទាំងនោះទេ ដោយរង់ចាំការស្រាវជ្រាវជាបន្តទៀត។ នេះបើតាម លោក អ៊ាន វណ្ណី មេបញ្ជាការសឹករងស្រុកជលគិរីកាលពីថ្ងៃអង្គារ។
លោកថ្លែងថា៖ «ក្រោយការឃាត់ទុកជាបណ្ដោះអាសន្ននូវត្រាក់ទ័រយើងបានណែនាំប្រាប់ពួកគាត់ថា សំណុំរឿងនេះយើងនឹងបញ្ជូនទៅសមត្ថកិច្ចជំនាញរដ្ឋបាលជលផលហើយឲ្យពួកគាត់ចាំចូលទៅដោះស្រាយជាមួយសមត្ថកិច្ចជំនាញចុះ»។
លោកថា ការពិតឥឡូវនេះសំណុំរឿងនោះបានផុតពីដៃខ្ញុំហើយ។ ដូច្នេះបើសិនជាគណៈកម្មការចម្រុះរកឃើញថា ជាដីស្រែចាស់របស់ពលរដ្ឋនោះ ហើយបើតុលាការសម្រេចថា ត្រូវប្រគល់ត្រាក់ទ័រឲ្យពួកគាត់វិញពេលណាយើងនឹងប្រគល់ឲ្យពួកគាត់វិញនៅពេលនោះភ្លាម»។
លោក ឡុង ស៊ីថា អ្នកនាំពាក្យអយ្យការអមសាលាដំបូងខេត្តកំពង់ឆ្នាំងថ្លែងពីម្សិលមិញថា មកទល់ពេលនេះលោកនៅមិនទាន់ទទួលបានដំណឹង ឬឯកសារបញ្ជាក់ពីខាងសមត្ថកិច្ចជំនាញ និងអាជ្ញាធរមូលដ្ឋានស្ដីពីការស្នើសុំប្រគល់វត្ថុតាងត្រាក់ទ័រទាំង ២ គ្រឿងនោះទៅអ្នកភូមិវិញនៅឡើយទេ។
លោកបញ្ជាក់ថា៖ «សម្រាប់ករណីនេះ ខាងសមត្ថកិច្ចតុលាការយើងកំពុងបន្តនីតិវិធីទៅតាមផ្លូវច្បាប់ ព្រោះក្នុងពេលបង្ក្រាប អ្នកបើកត្រាក់ទ័របានរត់គេចខ្លួន»។ លោកបន្តថា ទោះយ៉ាងណាក្ដីបើសិនគណៈកម្មការជំនាញ និងអាជ្ញាធរមូលដ្ឋានអះអាងថា ដីនោះជាដីស្រែចាស់របស់អ្នកភូមិមែន ហើយដាក់សំណើមកតុលាការ ដើម្បីសុំនាំយកវត្ថុតាងត្រាក់ទ័រទាំង ២ គ្រឿងនោះទៅប្រគល់ឲ្យអ្នកភូមិវិញនោះតុលាការនឹងពិចារណាដោយផ្អែកទៅលើគោលការណ៍ច្បាប់៕